HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Արաքս Մամուլյան

Կալանքի տակ գտնվող Դոն Պիպոն իր դեմ նախապատրաստվող սպանության գործով առաջին նիստին չէր բերվել

Արմավիրի մարզի ընդհանուր իրավասության դատարանի էջմիածնի նստավայրում այսօր մեկնարկեց քրեական աշխարհում «Դոն Պիպո» անունով հայտնի Արթուր Ասատրյանի, ինչպես նաև երկու այլ քրեական հեղինակությունների՝ «Զապ» մականունով հայտնի Անդրանիկ Սողոյանի և «Օշականցի Գևորիկ» մականունով հայտնի Գևորգ Մելիքյանի դեմ նախապատրաստվող սպանության գործով առաջին դատական նիստը:

Վերջիններս դատարանում չէին: Անդրանիկ Սողոյանն ու Գևորգ Մելիքյանը չէին ներկայացել, իսկ տուժողի կարգավիճակ ունեցող Ասատրյանն օրեր առաջ կալանավորվել է: Մեղադրվում է իր դեմ նախապատրաստվող սպանության գործով անցնող անձանցից երեքին՝ Արկադի Քոչինյանին, Արտակ Այվազյանին ու Վազգեն Ղազախեցյանին առևանգելու մեջ: Ասատրյանը ցանկություն չի՞ հայտնել դատարան ներկայանալու, թե՞ նրան չեն ներկայացրել, մեզ հայտնի չէ. դատարանում տուժողների չներկայանալու պատճառների վերաբերյալ տեղեկություններ չհրապարակվեցին:

Արթուր Ասատրյանի, Գևորգ Մելիքյանի և Անդրանիկ Սողոյանի դեմ նախապատրաստվող սպանության գործով ամբաստանյալները բերվել էին դատարան: Նրանցից միայն մեկի՝ Զոհրաբ Ղումաշյանի պաշտպաններն էին նիստին ներկայացել: Մյուսների պաշտպանները դատարան գրություն էին ուղարկել ու հայտնել, որ այլ ծանրաբեռնվածության պատճառով այսօրվա նիստին ներկայանալ չեն կարող:

Նման պայմաններում դատական նիստը հետաձգվեց, սակայն մինչ այս ամբաստանյալ Արկադի Քոչինյանը հայտարարեց, որ ինքը հրաժարվում է պաշտպան ունենալու իր իրավունքից ու դատարանին խնդրեց  գործի նյութերը տրամադրել իրեն, որպեսզի ծանոթանա դրանց: Մեղադրյալը նշեց, որ իրեն գործն ամբողջ ծավալով պետք չէ, և բավարար են միայն իր դեմ եղած նյութերը: Դատավոր Վահե Խալաթյանը տևական ժամանակ փորձում էր ամբաստանյալին բացատրել, որ իր համար դժվար կլինի միայնակ «գլուխ հանել» մեծածավալ գործի հատորներից, սակայն Քոչինյանը պնդեց, որ այս պահին հրաժարվում է իր պաշտպանից: Դատարանը, սակայն այս պահին գործի վարույթից չհեռացրեց Քոչինյանի հանրային պաշտպան Արմինե Ֆանյանին: Մեղադրող դատախազ Արամ Արամյանը հիշեցրեց, որ պաշտպանից հրաժարման հարցին  պետք է անդրադառնալ այդ պաշտպանի ներկայությամբ:

Հաջորդ դատական նիստը հուլիսի 20-ին է:

Հիշեցնենք, որ 2017թ. մայիսի 24-ին ոստիկանությունը հաղորդագրություն տարածեց այն մասին, որ Էջմիածին քաղաքի բնակարաններից մեկից ձերբակալվել է 3 անձ, որոնք, ըստ ոստիկանության ունեցած օպերատիվ հետախուզական տեղեկությունների՝ նախապատրաստելիս են եղել սպանություն, և այդ նպատակով Էջմիածնում վարձել այն բնակարանը, որտեղից, ըստ ոստիկանության, իրենք հայտնաբերվել են: Երեք անձինք, ովքեր այս գործով ձերբակալվեցին, Արտակ Այվազյանը, Արկադի Քոչինյանն ու Վազգեն Ղազախեցյանն էին: Օրեր անց ձերբակալվեց նաև Զոհրաբ Ղումաշյանը: Վերջիններս հետագայում կալանավորվել են ու առ այսօր գտնվում են կալանքի տակ: Գործի նախաքննության սկզբնական փուլում նրանք մեղադրվում էին Արթուր Ասատրյանի սպանությունը նախապատրաստելու մեջ, սակայն նախաքննության ավարտին նրանց մեղադրանքը լրացվեց ու այժմ մեղադրվում են ոչ միայն Ասատրյանի, այլ նաև Գևորգ Մելիքյանի և  Անդրանիկ Սողոյանի դեմ սպանություն նախապատրաստելու մեջ:

Վերը նշված մեղադրյալների վերաբերյալ գործը ուղարկվել է դատարան, իսկ նրանցից երեքին առևանգելու վերաբերյալ գործի քննությունը դեռևս շարունակվում է: Հենց այս գործի շրջանակներում է, որ Դոն Պիպոն կալանավորվել է:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter