Արարատ Խանդոյանի փաստաբանը դատարան է դիմել պայմանական վաղաժամկետ ազատման համար
Ոստիկանության ներկայացուցչի նկատմամբ բռնություն գործադրելու համար դատապարտված Արարատ Խանդոյանի փաստաբան Արա Ղարագյոզյանը դիմել է Շիրակի մարզի ընդհանուր իրավասության դատարան՝ վաղաժամկետ ազատման համար։ Այս մասին «Հետք»-ի հետ զրույցում հայտնեց փաստաբանը։ Այսօր Գյումրիի նստավայրում նշանակված նիստը չի կայացել, քանի որ դատախազ Կիրակոսյանը չի ներկայացել նիստին։ Փաստաբանը նշեց, որ մոտ երկու շաբաթ առաջ միջնորդություն է ներկայացրել դատարան՝ իր պաշտպանյալին վաղաժամկետ ազատելու համար։ «Այսօրվա նիստը չկայանալու պատճառով Արարատ Խանդոյանը վրդովվեց, ասաց, որ դատական համակարգը չի փոխվել»,- հայտնեց փաստաբանը։ Արա Ղարագյոզյանը նշեց՝ քանի որ փոփոխվել է պայմանական վաղաժամկետ ազատման մասին օրենքը, ապա պայմանական վաղաժամկետ ազատման համար որոշումը կայացնում է դատավորը՝ հիմնվելով քրեակատարողական հիմնարկի ներկայացրած բնութագրի վրա։
Օրենքը կարգավորվում է Քրեական օրենսգրքի 76-րդ հոդվածով։
Դատավոր Արտակ Թադեւոսյանի նախագահությամբ այսօրվա նիստը հետաձգվել է, հաջորդ նիստը կկայանա հուլիսի 12-ին։
Փաստաբան Արա Ղարագյոզյանը նշեց, որ Արարատ Խանդոյանը գտնվում է «Արթիկ» Քրեակատարողական հիմնարկում։ Հիշեցնենք, որ 2017-ի հունիսի 27-ին դատավոր Մնացական Մարտիրոսյանը Արարատ Խանդոյանին դատապարտել էր 3,5 տարվա ազատազրկման՝ նրան մեղադրելով 2016թ. հուլիսի 20-ին Երևան քաղաքում տեղի ունեցած հասարակական անկարգությունների ժամանակ ոստիկանության ներկայացուցչի նկատմամբ բռնություն գործադրելու մեջ: Իսկ 2017-ի դեկտեմբերի 11-ին Վերաքննիչ դատարանը անփոփոխ էր թողել վճիռը։ Արարատ Խանդոյանը մոտ երկու տարի է՝ կալանավայրում է։
Մեկնաբանել