Կիրակի, 23 սեպտեմբերի

Էջմիածնի ճանապարհաշինական բոլոր աշխատանքներն իրականացրել է Մանվել Գրիգորյանի ընկերությունը



Էջմիածին քաղաքում 2016-2018թթ. ճանապարհաշինական աշխատանքները կատարվել են միայն «Կուարլինի» ՍՊԸ-ի կողմից: Ընկերության 100% բաժնետերը արդեն նախկին քաղաքապետ Կարեն Գրիգորյանի հայրն է՝ ԱԺ պատգամավոր Մանվել Գրիգորյանը: Միայն նշված ժամանակահատվածում համայնքային բյուջեից քաղաքապետի հոր ընկերությանը վճարվել է մոտ 287 մլն դրամ:

Մասնակի վերանորոգման՝ փոսալցման և հիմնանորոգման նպատակով համայնքապետարանը այս տարի արդեն կնքել է մոտ 125 մլն դրամի պայմանագիր: Արդեն կատարվել են մոտ 41 մլն դրամի աշխատանքներ: Այս մասին տեղեկատվություն տրամադրել են Էջմիածնի քաղաքապետարանից:

Էջմիածին քաղաքում վերջին տարիներին իրականացված ասֆալտապատման աշխատանքները բավականին անորակ են եղել: Քաղաքի բնակիչները կատակով նշում են, որ «սեզոնային» ասֆալտ է արվում: Քաղաքի մասին լավ տպավորություն ստեղծելու համար նախկին քաղաքապետ Կարեն Գրիգորյանն ուշադրություն է դարձրել միայն կենտրոնական ճանապարհներին: Երբեմն նույն ճանապարհահատվածը վերանորոգվել է ամեն տարի:, օրինակ՝ հրապարակի մերձակա ճանապարհները: Պատկերն այլ է «երկրորդական» փողոցներում, որտեղ փոսերը շրջանցել հնարավոր չէ:

Քաղաքապետարանի տրամադրած տեղեկատվության համաձայն Էջմիածնում հիմնանորոգման ենթակա ճանապարհային ծածկույթի մակերեսը կազմում է 340 հազ. քմ:

Նշենք, որ «Կուարլինի» ՍՊԸ-ն հիմնադրվել է 1994թ.՝ Արշալույս գյուղի բնակիչներ Սամվել Մովսիսյանի, Աշոտ Մովսիսյանի և Ռուզաննա Գրիգորյանի կողմից: Վերջիններս ամուսիններ են: Վերջիններս ընկերությունից դուրս են եկել 2004թ.-ին: Նշված տարում «Կուարլինի» ՍՊԸ-ի սեփականատեր է դարձել Գևորգ Այվազյանը: Ամիսներ անց նա էլ է դուրս եկել ընկերությունից և բաժնետեր է դարձել Արշալույս գյուղի բնակիչ Արմեն Սայադյանը: 2011թ. դեկտեմբերի 19-ին Ա. Սայադյանի փոխարեն ընկերության 100% բաժնետեր է դարձել պաշտոնաթող գեներալ Մանվել Գրիգորյանը:

Ընկերության տնօրենը Արտակ Պողոսյանն է: Վերջինս Մանվել Գրիգորյանի դատավոր դստեր՝ Նաիրա Գրիգորյանի ամուսինն է:

Ուշագրավն այն է, որ Արմեն Սայադյանը կարիքավոր է դարձել և Արշալույսի համայնքապետարանից ստանում է սոցիալական օգնություններ: 2016-2018թթ. «Կուարլինի» ՍՊԸ-ն Էջմիածին քաղաքում իրականացրել է 27.461,42քմ մակերեսով մասնակի վերանորոգման և 26.057,82 քմ՝ հիմնանորոգման աշխատանքներ:

Հիշեցնենք, որ Մանվել Գրիգորյանին մեղադրանք առաջադրվել քրեական օրենսգրքի 235-րդ հոդվածի 2-րդ մասով՝ ապօրինի կերպով ռազմամթերք ձեռք բերելու և այլ անձանց հետ նախնական համաձայնությամբ պահելու համար, ինչպես նաև քրեական օրենսգրքի 179-րդ հոդվածի 3-րդ մասի 1-ին կետով՝ մի խումբ անձանց հետ նախնական համաձայնությամբ յուրացման եղանակով իր վստահությանը հանձնված առանձնապես խոշոր չափերով ուրիշի գույք հափշտակելու համար:

Այդ ընթացքում լիազորությունները դադարեցնելու դիմում ներկայացրեց նաև Մանվել Գրիգորյանի որդին՝ Էջմիածնի քաղաքապետ Կարեն Գրիգորյանը:

«Հետք»-ը Մանվել Գրիգորյանի և մերձավորների ունեցվածքին անդրադարձել էր դեռևս տարիներ առաջ և տեղեկացրել, որ պատգամավորի ընկերությունները հարկերը չեն վճարում:

Մանվել Գրիգորյանը եղել է նաև Տրանսպորտի և կապի նախարարության «գործընկերը»

Մանվել Գրիգորյանին պատկանող ընկերության հետ պայմանագրեր է կնքել նաև Տրանսպորտի և կապի նախարարությունը: Մասնավորապես, Արմավիրի մարզի Բամբակաշատի համայնքի 800մ ճանապարհի ասֆալտապատման  աշխատանքների կատարման նպատակով նախարարությունը 2016թ. հունիսի 21-ին 34 մլն 520 հազար դրամի պայմանագիր է կնքել «Կուարլինի» ՍՊԸ-ի հետ:

Տրանսպորտի, կապի և տեղեկատվական տեխնոլոգիաների նախարարության կողմից հրապարակած տեղեկատվության համաձայն՝ Համաշխարհային բանկի ֆինանսավորմամբ  վարկային ծրագրերով 20092016թթ. իրականացված ճանապարհաշինական  աշխատանքներում ներգրավված է եղել նաև պատգամավորի ընկերությունը: Մասնավորապես, ԱԺ պատգամավոր Հերմինե Նաղդալյանին պատկանող «Սիսիանի ԲՈՒԱՏ» ՍՊԸ-ն և «Կուարլինի» ՍՊԸ-ն համատեղ, 04.02.2012թ, կնքված պայմանագրով իրականացրել են «Արաքս- Մեծամոր և Մեծամոր-Գայ-Հովտաշատ կմ4+100-կմ8+926» ավտոճանապարհի վերանորոգման աշխատանքները, որի դիմաց վճարվել են մոտ 1 մլրդ 21 մլն դրամ:

Իսկ նույն տարվա հուլիսի 17-ին կնքված պայմանագրի հիման վրա դարձյալ նույն ընկերություններն իրականացրել են «Մ5-Ամասիա-Նալբանդյան-Ջանֆիդա-Փշատավան 0+000 - կմ 14+480, Արմավիր-Նորավան-Լուկաշին-Խանջյան կմ0+000-կմ6+560» ավտոճանապարհի վերանորոգման աշխատանքներ: Պայմանագրային արժեքը կազմել է մոտ 1 մլրդ 477 հազար դրամ:

12.06.2015թ, կնքված պայմանագրի հիման վրա «Կուարլինի» ՍՊ, «Սիսիանի ԲՈՒԱՏ» ՍՊ և «Ավտոճանապարհային մեքենաներ» ՓԲ ընկերությունները համատեղ վերանորոգել են «Արմավիր - Նորապատ - Մրգաշատ - Արևիկ - Եղեգնուտ - Երասխահուն, կմ 0+000 - կմ 7+800» ավտոճանապարհը: Պայմանագրի արժեքը կազմել է մոտ 1 մլրդ 80 մլն դրամ:


Գլխավոր էջ



Մեկնաբանություններ (3)
1. Կարեն03:33 - 5 հուլիսի, 2018
Էջմիածին ջան, շուտ լուծարռք պայմանագիրը ու տենդեռ հայտարարեք։ 1 տարում կարգին ճանապարհներ կունենաք։
2. GB06:04 - 6 հուլիսի, 2018
Seems to me these uneducated Soviet-era oligarchs don't understand the real meaning of corruption! This is why the new government must keep them out of politics!
3. Ալեքսեյ09:16 - 12 հուլիսի, 2018
Ես կարծում եմ "Հետքը" պետք է հետևողական լինի և այդ ողջ տեղեկատվությունը հասցնի Քննչական Կոիտեին, որպեսզի հայտնաբերվեն Մանվել Գրիգորյանի բոլոր հանցավոր կապերը այլ պաշտոնյաների հետ և այդ սարդոստայնում պարզվի նրա իրական դեմքը և կատարած հանցագործությունների թիվը
Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ