HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Արաքս Մամուլյան

Փաշինյանի հայտարարությունը Սյունիքում. «Հայաստանի Հանրապետությունն այլևս ձեր սեփականությունն է»

«Հայաստանում այլևս իշխանությունը ժողովրդին է, տեղական իշխանների ժամանակն անցել է, Հայաստանի Հանրապետության քաղաքացին այլևս անկախ է»,- Սյունիքի մարզի Գորիս քաղաքում այսօր քաղաքացիների հետ հանդիպման ժամանակ հայտարարեց վարչապետ Նիկոլ Փաշինյանը:

Վերջինս աշխատանքային այցով կառավարության այլ անդամների հետ Սյունիքի մարզում է: Մինչև Գորիս այցելելը եղել է Սիսիան քաղաքում ու այնտեղ ևս քաղաքացիների հետ հանդիպում ունեցել:

«Սիսիանում մի կին ասում էր, որ Հայաստանում սեփականություն չունի, և որ երեխաներն իրեն առաջարկում են գնալ իրենց մոտ՝ արտերկիր: Ասում եմ՝ ինչո՞ւ չունեք, ամբողջ Հայաստանի Հանրապետությունն այլևս ձեր սեփականությունն է»,- Սիսիանի քաղաքացիների հետ հանդիպումից որոշ մանրամասներ պատմեց Նիկոլ Փաշինյանն ու վստահեցրեց, որ սրանք պարզապես խոսքեր չեն, որ Հայաստանում այլևս որոշողը քաղաքացին է, որ այլևս անձեռնմխելի անձինք ու արտոնյալներ չեն լինելու:

Արդեն մի քանի օր է՝ Գորիս քաղաքը պատրաստվում էր Փաշինյանի այցին, այսօր վաղ առավոտից քաղաքի կենտրոնական փողոցներում մեծաթիվ ոստիկաններ էին կուտակված՝ վարչապետի այցի ժամանակ քաղաքում կարգուկանոն պահպանելու նպատակով: Նրան տեսնելու էին եկել ոչ միայն Գորիս քաղաքի, այլ հարակից գյուղերի բնակիչներ:

Քաղաքացիներից շատերը ներկայացնում էին դատական համակարգում իրենց ունեցած խնդիրները:

Քաղաքացի Սերժ Մկրտչյանը տևական ժամանակ շինարարական աշխատանքներ է կատարելիս եղել, հետագայում դատապարտվել է խոշոր չափի հարկերից խուսափելու համար: Նիկոլ Փաշինյանի հետ հանդիպման ժամանակ հայտարարեց, որ նախկին իշխանությունների ժամանակ խաբեության զոհ է դարձել: Սերժ Մկրտչյանն է կառուցել Գորիս քաղաքի դատարանի շենքը: Գորիսում նրա վերաբերյալ հումոր է շրջանառվում, թե դատարանի շենքը կառուցվելուց հետո առաջին «դատվողն» է եղել այդ շենքում:

Նիկոլ  Փաշինյանն առաջարկեց սահմանված կարգով ընթացք տալ իրենց հուզող իրավական հարցերին՝ վստահեցնելով, որ Հայաստանում այսուհետ ապահովվելու է բոլոր գործերի նկատմամբ իրավասու անձանց անկողմնակալ ու անաչառ մոտեցումը:

Հանդիպման ընթացքում քաղաքացիները Փաշինյանի համար «դուխով» գրությամբ գլխարկ ուղարկեցին բեմ, վերջինս գլխարկը դրեց գլխին ու մեկ նկատառում արեց. հեղափոխության խորհրդանիշ դարձած «դուխով» լոզունգը վերջին շրջանում օգտագործվում է կոմերցիոն նպատակներով՝ ընդհուպ բուքմեյքերական գրասենյակների կողմից, ու կոչ արեց գոնե այս նպատակով չօգտագործել այն:

«Դուխով»-ը ոչ թե ես եմ, այլ դուք»,- քաղաքացիներին դիմելով՝ ասաց Փաշինյանը: Վերջինս հանդիպում ունեցավ նաև Սյունիքի մարզի համայնքապետերի հետ, ապա ուղևորվեց Քաջարան:

Նրան դժվարությամբ հաջողվեց ճեղքել քաղաքացիների շղթան: Վերջիններս ցանկանում էին ինչ-որ բան փոխանցել վարչապետին, ինչպես նաև ներկայացնել իրենց հուզող հարցերը, որոնք հանդիպման ժամանակ չէին հասցրել ներկայացնել:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter