Դատական դեպարտամենտը հայտնում է, որ հուլիսի 13-ին Վանաձոր քաղաքում Բարձրագույն դատական խորհուրդը հանդիպում-խորհրդակցություն է անցկացրել Լոռու մարզի առաջին ատյանի ընդհանուր իրավասության դատարանի դատավորների հետ:

Հանդիպման նպատակն է եղել անձամբ շփվել դատավորների հետ, տեղում ծանոթանալ հուզող խնդիրներին, ինչպես նաև նրանց իրազեկ դարձնել Խորհրդի գործունեությանն ու անելիքներին:

Բարձրագույն դատական խորհուրդը կարևորում է դատարանների ծանրաբեռնվածության բազմագործոն խնդիրների ուսումնասիրությունը, հիմնավորվածությունը, լուծման հնարավոր ուղիների իրավաչափությունը, ինչպես նաև դատարանների նյութատեխնիկական ապահովման անհրաժեշտությունը:

Խորհուրդն անդրադարձել է նաև պետաիշխանական հարաբերություններում դատական իշխանության ֆունկցիոնալ գործունեության հստակեցման կարևորությանը՝ իշխանության մյուս ճյուղերի նկատմամբ դատական իշխանության հակակշռող ու զսպող դերակատարությամբ:

Առանձնակի կարևորվել է նաև արդարադատության ոլորտում կոռուպցիոն դրսևորումների բացառումը, Բարձրագույն դատական խորհրդի 2018թ. ապրիլի 12-ի որոշման հետևողական իրացումը, էլեկտրոնային արդարադատության ներդրումն ու դատական իշխանության բարեփոխումներին ուղղված այլ ծրագրերի կյանքի կոչումը:

Հարցերի առնչությամբ դատավորները հայտնել են իրենց դիրքորոշումները, կարծիքներն ու դիտարկումները:

Քննարկում-խորհրդակցությունից հետո, սահմանված ժամանակացույցի համաձայն, Բարձրագույն դատական խորհուրդն անցկացրել է Լոռու մարզի առաջին ատյանի ընդհանուր իրավասության դատարանի նախագահի ընտրություն:

Դատարանի նախագահ է ընտրվեց Մուշեղ Հարությունյանը՝ 7 ձայնով:

Այսօր կազմակերպվել և անցկացվել է նաև Արմավիրի մարզի առաջին ատյանի ընդհանուր իրավասության դատարանի նախագահի նոր ընտրություն:

Բարձրագույն դատական խորհրդի քվեարկության արդյունքում՝ դատարանի նախագահ է ընտրվել Հրաչիկ Սարգսյանը: