Շաբաթ, 18 օգոստոսի

Գագիկ Ծառուկյանին պատկանող ճոպանուղում յոթ ամիս է՝ փորձաքննություն է իրականացվում



2006 թվականից մինչ օրս արտակարգ իրավիճակների նախարարությունը չի կարողացել Ծաղկաձորում շահագործվող ճոպանուղում անցկացնել տեխնիկական անվտանգության փորձաքննություն։

Հիշեցնենք, որ 2017 թվականին արտակարգ իրավիճակների նախարարության «Տեխնիկական անվտանգության ազգային կենտրոն» ՊՈԱԿ-ը Ծաղկաձորում հանգիստը կազմակերպող անձանց զգուշացրել է, որ ճոպանուղին շահագործվում է տեխնիկական անվտանգության օրենսդրության պահանջների կոպտագույն խախտումներով, որի պատճառով կարող են արտադրական դժբախտ դեպքեր եւ տեխնածին վթարներ տեղի ունենալ։

ՊՈԱԿ-ի փոխանցմամբ՝ ճոպանուղին պարտավոր էր գրանցվել արտադրական վտանգավոր օբյեկտների ռեեստրում և տարեկան առնվազն մեկ անգամ ենթարկվել տեխնիկական անվտանգության փորձաքննության, ինչի մասին բազմիցս տեղեկացրել էր շահագործողին, սակայն այդ հորդորները անտեսվել էին:

2018-ի հունվարին արտակարգ իրավիճակների նախարարությունը «Հետք»-ին հայտնել է, որ պետական հրդեհային և տեխնիկական անվտանգության տեսչությունը պայմանավորվածություն է ձեռք բերել Ծաղկաձորի ճոպանուղին շահագործող ընկերության հետ՝ մոտակա ժամանակահատվածում տեխնիկական անվտանգության փորձաքննություն իրականացնելու վերաբերյալ:

Նախարարության նշած մոտակա ժամանակից անցել է յոթ ամիս, սակայն ԱԺ պատգամավոր Գագիկ Ծառուկյանին պատկանող ճոպանուղում փորձաքննության արդյունքները դեռևս ամփոփված չեն։ 

Արտակարգ իրավիճակների ներկայիս նախարարը «Ծառուկյան» դաշինքի քվոտայով նախարար նշանակված Հրաչյա Ռոստոմյանն է։ 

ԱԻՆ-ի փոխանցմամբ՝ փետրվարի 2-ին «Տեխնիկական անվտանգության ազգային կենտրոն» ՊՈԱԿ-ի և ճոպանուղու սեփականատեր «Լեռնատուր» ՍՊԸ-ի միջև կնքվել է ճողապանուղու տեխնիկական անվտանգության փորձաքննության պայմանագիրը, որը սակայն դեռևս ընթացքի մեջ է։

2006 թվականից մինչ օրս արտակարգ իրավիճակների նախարարությունը ունեցել է չորս նախարար։ Սակայն նրանցից ոչ ոքի չի հաջողվել օրենքով նախատեսված փորձաքննությունն իրականացնել։

Իրավաբանական անձանց պետական ռեգիստրի տվյալնելով՝ Ծաղկաձորի ճոպանուղին շահագործում է «Լեռնատուր» ընկերությունը, որի 50% բաժնեմասը պատկանում է Հայաստանի ազգային օլիմպիական կոմիտեին (ՀԱՕԿ): Կոմիտեի նախագահը պատգամավոր Գագիկ Ծառուկյանն է, իսկ ՀԱՕԿ կայքի տվյալներով ԱԻՆ նախարար Հրաչյա Ռոստոմյանը շարունակում է մնալ կոմիտեի գլխավոր քարտուղար։

Իսկ ընկերության մնացած 50%-ի սեփականատերը «Հեսպեր Վենչըրս» ՍՊԸ-ն է, որը գրանցված է ԱՄՆ-ի Արկանզաս նահանգում։ Քաղաքապետարանի հրապարակած փաստաթղթերից մեկից կարողացանք պարզել, որ գործարքներից մեկում այս ընկերության լիազորված անձ է ներկայացել Արայիկ Կեսոյանը, ով 2017 թվականի ապրիլի 2-ի ընտրություններին «Ծառուկյան դաշինք»-ից պատգամավորի թեկնածու էր առաջադրված: Բացի այդ, Արայիկ Կեսոյանը Գագիկ Ծառուկյանին պատկանող «Մուլտի Գրուպ» կոնցեռնի գլխավոր տնօրենի տեղակալն է:


Գլխավոր էջ

Տպել    |  In English



Մեկնաբանություններ (2)
1. Aram20:55 - 12 օգոստոսի, 2018
The hidden levels of corruption are everywhere and most are not very hard to unearth. The challenge is to have enough people in the nascent government to deal with them and eradicate them before the public loses its patience and faith with the promises made by the new administration.
2. Todd Fabacher05:43 - 13 օգոստոսի, 2018
Just FYI...Hesper Ventures LLC is an Arkansas For-Profit Corporation, The company's filing status is listed as Revoked and its File Number is 800013313. https://www.bizapedia.com/ar/hesper-ventures-llc.html
Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ