Մարգարին և սպրեդ՝ կարագի շփոթեցնող մակնշմամբ. արտադրողը մոլորեցնում է սպառողին
«Հետք»-ը բազմիցս անդրադարձել է հայկական շուկայում իրացվող սննդամթերքի մակնշման խախտումներին։
Այս անգամ ներկայացնում ենք, թե ինչպես է արտադրողը մոլորեցնում սպառողին՝ մարգարինն ու սպրեդը «փաթեթավորելով»՝ իբրև սերուցքային կարագ։
Մարգարինը ճարպային արտադրանք է՝ բաղկացած մոդիֆիկացված կամ չմոդիֆիկացված բուսական յուղերից (կենադանական ծագման յուղերով կամ առանց դրանց) ոչ պակաս, քան 20% յուղայնությամբ, կաթով կամ առանց կաթի։
Չի արգելվում մարգարինի մեջ ավելացնել կենդանական ծագման յուղ, սակայն այդ մասին մակնշման մեջ պարտադիր պետք է նշվի։
Մարգարինը հանդիսանում է «Ճարպայուղային արտադրանքի տեխնիկական կանոնակարգ» տեխնիկական կանոնակարգի (ՄՄ ՏԿ 024/2011) կարգավորման առարկա և հստակ պահանջներ ունի թե՛ որակի, թե՛ մակնշման մասով։
Նույն տեխնիկական կանոկարգով է կարգավորվում նաև սպրեդը։ Այն ևս ճարպային ապրքանը է՝ յուղի ոչ պակաս քան 39 % պարունակությամբ։ Այն պատրաստվում է կաթնային յուղից, կամ (և) սերուցքից, սերուցքային կարագից, մոդիֆիկացված կամ չմոդիֆիկացված բուսական յուղերից։
Այս երկու ճարպայուղային արտադրանքներում թույլատրվում է օգտագործել սննդային հավելումներ, որոնց մասին ևս պետք է տեղեկացնել սպառողին։
ՄՄ ՏԿ 024/2011 սահմանում է, որ մարգարինի և սպրեդի փաթեթի վրա անպայման պետք է նշվի տրանսճարպերի վերաբերյալ տեղեկություն, որոնց թույալտրելի քանակը 2 %-ից ոչ ավելի է։
Այս փոփոխությունը ԵԱՏՄ տարածքում ուժի մեջ է մտել դեռևս 2018թ հունվարի 1-ից։ Համարվում է, որ սննդի մեջ 2 %-ից ավելի տրանսճարպերի օգտագործումը կարող է վտանգավոր լինել առողջության համար։
Ճարպայուղային արտադրանքի սպառողական փաթեթի վրա պարտադիր դյուրընթեռնելի տառատեսակով պետք է նշված լինի ապրանքատեսակի անվանումը, որպեսզի չմոլորեցնի սպառողներին (մարգարին, սպրեդ, արձածաղկի ձեթ և այլն)։ Սա հստակորեն ամրագրված է ՄՄ ՏԿ 024/2011-ում։
Սակայն սպառողին գրավելու համար, երբեմն արտադրողներ դիմում են խորամանակ քայլերի, որոնցով և խախտում են «Սննդամթերքի անվտանգության մասին» օրենքն ու ՄՄ ՏԿ 024/2011 տեխնիկական կանոնակարգը, քանի որ մոլորության մեջ են գցում գնորդին։
Օրերս շուկայում հանդիպել ենք ռուսական «Жировой комбинат» ընկերության արտադրության «Саратовский» մարգարինը, որի փաթեթի մակնշման ենտամաում է միայն նշված, որ ապրանքը մարգարին է, այն էլ՝ անկյունային հատվածում և դժվարընթեռնելի տառատեսակով։
Ավելին, մեծ տառատեսակով ապրանքի վրա գրված է «Сливочный», ГОСТ 32188-2013, օգտագործված է կովի և կաթի նկար, որոնք թյուր պատկերացնում են ստեղծում ապրանքի մասին։
«մարգարին» անվանումը հայերեն մակնշման մեջ՝ միայն փաթեթի հետևի մասում
Ապրանքի առաջին բաղադրատարրը ռաֆինացված դեզադորացված բուսական յուղն է։
Հաջորդ նմանատիպ ապրանքներից է ռուսական «Бытовой комбинат» ընկերության արտադրության «Россиянка» 72 % տոկոսանոց սպրեդը:
Փաթեթի վրա դարձյալ, սպառողի մոտ վստահություն ներշնչելու համար փակցված է ГОСТ Р 52100 նշանը և դիմային տեսանելի հատվածում նշված չէ, որ այն սպրեդ է։
Փոխարենը նշված է տոկոսայնությունն ու ավելացված է՝ «мягкий вкус сливочного масла» (սերուցքային կարագի նուրբ համ), ինչից տպավորություն է ստեղծվում, որ ապրանքը սերուցքային կարագ է, այլ ոչ բուսական ծագման սպրեդ։
ՄՄ ՏԿ 024/2011-ն արգելում է մարգարինի և ճարպայուղային որևէ արտադրանքի մակնշման մեջ «масло» (կարագ) և նրա արմատից կազմված բառերի օգտագործումը։ Իսկ այստեղ արտադրողը ոչ միայն տեսանելի հատվածում չի նշել, որ տվյալ ապրանքը սպրեդ է, այլ նշել՝ «мягкий вкус сливочного масла», ինչը սպառողին կարող է մոլորեցնել։
Նախորդ ապրանքի պես փաթեթի հետևի հատվածում մանր տառերով է նշված, որ ապրանքը սպրեդ է։ Սա երևում է հայերեն մակնշման մեջ (սպրեդ՝ սերուցքային համով), որը փակցված է օրիգինալ մակնշման վրա։ Վերջինիս առաջինը բաղադրատարրը ռաֆինացված դեզոդորացված բուսական յուղն է։
«սպրեդ» անվանումը՝ մակնշման հետևի մասում
Այս երկու ապրաքներն էլ ներկրում է «ՍԱՍ Գրուպ» ընկերությունը։
Ապրանքի արտադրման ժամկետն էլ այնպիսի հատվածում է, որ վաճառողն այն նայելու համար ստիպված էր հայերեն մակնշումը մի փոքր հեռացնել։
Եթե հանդիպել եք մակնշման խախտումով ապրանքներ, գրեք մեզ՝ [email protected] հասցեին կամ մեր ֆեյսբուքյան՝ Անվտանգ սնունդ/ «Հետք» էջին։
Մեկնաբանություններ (2)
Մեկնաբանել