HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Վահե Սարուխանյան

Դեսպան Թումանյանի ու որդու ընտանիքներն օտարել են չեխական ընկերությունները

Իրանում ՀՀ արտակարգ եւ լիազոր դեսպան Արտաշես Թումանյանի ու նրա որդու ընտանիքներն օտարել են իրենց չեխական ընկերությունները, որոնց մասին գրել էինք: Հիշեցնենք, որ 2015-ից դեսպանի պաշտոնը զբաղեցնող Ա. Թումանյանն իր կնոջ ու դստեր հետ Պրահայում դեռ 2008 թ. հիմնադրել էր «Unitezza Group» ՍՊԸ-ն (կանոնադրական կապիտալը 200.000 դրամ կամ 4,5 մլն դրամ), որի 52 տոկոսի սեփականատերն ինքն էր: Օրենքի տեսանկյունից խնդիրն այն էր, որ պաշտոնը ստանձնելիս դեսպանը չէր հայտարարագրել իր բաժնեմասը:

Հրապարակումից հետո Ա. Թումանյանը պարզաբանում էր ուղարկել խմբագրություն, որում նշել էր հետեւյալը. «Սկսած 2006 թ. ՀՀ-ում գրանցված «Lisam» ընկերությունը, որի խորհրդի նախագահ եմ եղել 2006-2015 թթ., զբաղվել է իրավաբանական եւ գործարար խորհրդատվությամբ: Ընթացիկ գործունեությանը զուգահեռ ընկերության ներկայացուցիչները եղել են նաեւ մի շարք արտասահմանյան երկրներում (ՌԴ, Ղազախստան, Իտալիա, Չեխիա) տնտեսական համագործակցության ծրագրեր քննարկելու նպատակով: Չեխիայում հանդիպումների ընթացքում եղել են առաջարկություններ ԱՊՀ երկրների հետ տնտեսական գործունեություն իրականացնելու ուղղությամբ: Չեխիայում ընկերություն հիմնադրելուց եւ մեկ տարվա նախնական աշխատանքից հետո չի հաջողվել որեւէ ծրագիր իրականացնել, որից հետո որոշում է կայացվել լուծարել այն: Հարկ եմ համարում նշել, որ hetq.am կայքում հրապարակված տեղեկատվությունն ինձ համար անակնկալ էր, քանի որ 2009 թ. դիմում է ուղարկվել չեխական համապատասխան մարմիններին՝ ընկերությունը լուծարելու վերաբերյալ»:

Այդուհանդերձ, ինչպես նշել էինք, դեսպանի ընտանիքի ընկերությունն այդպես էլ չի լուծարվել: Միաժամանակ բարձրաստիճան պաշտոնատար անձանց էթիկայի հանձնաժողովը մեր հրապարակումից հետո Ա. Թումանյանին առաջարկել էր ուղղում կատարել պաշտոնը ստանձնելու առիթով ներկայացրած հայտարարագրում՝ լրացնելով նշված ընկերությունում ունեցած մասնաբաժնի վերաբերյալ տվյալները: Այս բացթողումը շտկվել է:

Օրեր առաջ՝ օգոստոսի 10-ին, Արտաշես Թումանյանը, կինը՝ Անահիտ Շահվերդյանը, դուստրը՝ Լիլիթ Թումանյանը, եւ փեսան՝ Կարեն Գրիգորյանը, «Unitezza Group»-ը հանձնել են չեխական Լիբչեվեսում գրանցված Ռոման Դուդենկովին: Վերջինս ՍՊԸ-ն ձեռք բերելուց հետո փոխել է դրա հասցեն եւ անունը՝ դարձնելով «Atlas foundation»:

Օգոստոսի 10-ին նույն անձին իրենց «Tumanyan Group» ընկերությունն են օտարել նաեւ դեսպանը որդին ու հարսը՝ Սամվել Թումանյանն ու Լաուրա Բադալյանը: Այս ընկերության հասցեն եւ անունը եւս փոխվել են. այն դարձել է «Bohemia Star company»:  

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter