HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Վահե Սարուխանյան

Հայաստանի հավաքականը կրկին 100-րդն է աշխարհում

ՖԻՖԱ-ն այսօր հրապարակել է ազգային հավաքականների դասակարգման սեպտեմբեր ամսվա ցուցակը: Հայաստանի հավաքականը, չնայած հաշվետու ժամանակահատվածում 2-1 հաշվով հաղթել է Լիխտենշտայնին, ապա 0-2 զիջել ՆՀՀ Մակեդոնիային, մնացել է 100-րդ հորիզոնականում, որը կիսում է Պաղեստինի հետ: ՖԻՖԱ-ի ցուցակում ընդգրկված է 211 հավաքական:

Համաշխարհային ցուցակը գլխավորում են Բելգիան եւ աշխարհի չեմպիոն Ֆրանսիան: Լավագույն տասնյակում են նաեւ Բրազիլիան, Խորվաթիան, Ուրուգվայը, Անգլիան, Պորտուգալիան, Շվեյցարիան, Իսպանիան, Դանիան:

Ազգերի լիգայի խաղարկությունում Հայաստանի մրցակիցներից ՆՀՀ Մակեդոնիան խմբում 2 հաղթանակ տանելուց հետո առաջադիմել է 2 հորիզոնականով ու հիմա 68-րդն է: Լիխտենշտայնը Հայաստանին պարտվելուց հետո հաղթել էր Ջիբրալթարին, ինչի շնորհիվ 2 տեղով առաջ է եկել 178-րդ հորիզոնական: Ջիբրալթարն էլ 2 պարտությունից հետո նահանջել է մինչեւ 198-րդ տեղը (-3):

Նախկին ԽՍՀՄ երկրներից լավագույն ցուցանիշը Ուկրաինայինն է, որն այժմ 29-րդն է: Ի դեպ, ուկրաինացիները գրանցել են ամսվա լավագույն առաջընթացը 6 դիրքով: Ռուսաստանը 46-րդն է, հաջորդում են Բելառուսը (80), Ղրղըզստանը (91), Վրաստանը (93), Ուզբեկստանը (96), Էստոնիան (98), մյուսները Հայաստանից ավելի ցածր դիրքերում են:

Հայաստանի հարեւաններից Իրանը 33-րդն է, Թուրքիան՝ 38-րդը, Վրաստանը, ինչպես նշեցինք, 93-րդն է, իսկ Ադրբեջանը՝ 108-րդը:

Հաջորդ աղյուսակը ՖԻՖԱ-ն կհրապարակի հոկտեմբերի 25-ին: Մինչ այդ՝ հոկտեմբերի 13-ին, Հայաստանի ընտրանին Երեւանում կընդունի Ջիբրալթարին, իսկ ամսի 16-ին՝ ՆՀՀ Մակեդոնիային:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter