Երեւանի Կամերային երաժշտության տան դիմացի այգում տեղակայված վահանակը տեղեկացնում է, որ կառուցվում է. «սրճարան, բիստրո, բար, ջրավազան, սանհանգույց, շվաքարան, խաղահրապարակ, ավտոհանգրվան» (Տես նաեւ' Երեւանցին այլեւս օդ չունի շնչելու):

Սրճարանային համալիրի նախագիծը 2004-ի մայիսի 19-ին հաստատել է Երեւանի գլխավոր ճարտարապետ Սամվել Դանիելյանը:

Իրականում այս նախագծի հաստատումն ապօրինի է, որովհետեւ չկա քաղաքապետի որեւէ որոշում, որը կարող էր հիմք հանդիսանալ նախագիծը հաստատելու համար: 1998թ. Երեւանի քաղաքապետ Սուրեն Աբրահամյանն այգին խնամելու նպատակով այն վարձակալության է տվել «Ֆլորա լենդ» ընկերությանը: 2001թ.-ին նախկին քաղաքապետ Ռոբերտ Նազարյանի որոշմամբ թույլտվություն է տրվել «Ֆլորա լենդ»-ին' այդ տարածքում ինչ-որ շինարարական աշխատանքներ իրականացնել: Բայց 1 տարվա ընթացքում նախագիծ չի հաստատվել, հետեւաբար, ըստ օրենքի, այդ որոշումն ուժը կորցրել է: Թե ինչու է հանրային այգում նման նախագիծ հաստատել Ս. Դանիելյանը, պետք է պարզեն իրավապահ մարմինները:

Կենտրոն համայնքի թաղապետ Գագիկ Բեգլարյանը մեծ ուրախությամբ է թույլատրել այգում զվարճանքի վայրեր կառուցել: Նա սիրում է ժամանակ անցկացնել նման վայրերում, բացի այդ' քաջություն է պետք ունենալ' մերժելու համար պաշտոնյային:

Իսկ այդ պաշտոնյան Քաղծառայության խորհրդի նախագահ Մանվել Բադալյանն է:

Սա կոռուպցիայի դասական օրինակ է, որի մասին «երազում են» իրավապահ մարմինները: Գործարք է, որի մեջ ներքաշված են քաղաքապետարանը' գլխավոր ճարտարապետով, թաղապետարանը' թաղապետով եւ, իհարկե, Քաղծառայության խորհրդի նախագահը: Հասարակությունը քայլն արել է' շինարարության դեմ բողոքի ակցիաները շարունակվում են, իրավապահները դեռ մտմտում են. բավական է մի հրահանգ, եւ նրանք «փայլուն» կկատարեն իրենց գործը: Իսկ նման հրահանգ Հայաստանում կարող է տալ միայն երկրի նախագահը: