Երեքշաբթի, 18 հունիսի
Օլիմպիական խաղեր

Հրաժեշտ 30-րդ ամառային օլիմպիական խաղերին

00:18, օգոստոսի 13, 2012
Ահա եւ վերջ: Ավարտվեցին ամառային 30-րդ օլիմպիական խաղերը: Լոնդոնը խաղերի տանտիրոջ իրավունքը փոխանցում է Ռիո դե Ժանեյրոյին: Օգոստոսի 29-ից սեպտեմբերի 9-ը Լոնդոնում կանցկացվեն նաեւ պարալիմպիկ խաղերը, որից հետո կարեւորագույն մարզական իրադարձությանը հարկ կլինի սպասել եւս 4 տարի՝ մինչեւ 2016 թ.: Իհարկե, այս ընթացքում՝ 2014-ին, կանցկացվեն պատանեկան եւ ձմեռային օլիմպիական խաղերը:

Հայաստանի օլիմպիական թիմը տուն կվերադառնա 1 արծաթով ու 2 բրոնզով

13:52, օգոստոսի 12, 2012
66 կգ քաշային ազատոճային ըմբիշ Դավիթ Սաֆարյանը չի կարող պայքարել բրոնզե մեդալների համար, քանի որ նրան հաղթած ղազախ Տանտարովը կիսաեզրափակչում պարտվեց հնդիկ Սուշիլ Կումարին: Այսպիսով՝ Հայաստանի վերջին մասնակիցն էլ դուրս մնաց պայքարից, եւ ուրեմն օլիմպիական թիմը տուն կբերի 1 արծաթ եւ 2 բրոնզ:

Դավիթ Սաֆարյանը բրոնզի հույսեր է պահպանում

12:51, օգոստոսի 12, 2012
Ազատոճային 66 կգ-ոց ըմբիշ Դավիթ Սաֆարյանը դուրս մնաց ոսկե մեդալների համար պայքարից: Ղազախ ըմբիշի հետ գոտեմարտում նա միավորներով հաղթեց 8-6 հաշվով, սակայն մրցափուլերով հաղթեց ղազախը՝ 2-1: Վերջին՝ երրորդ մրցափուլում վիճահարույց դրվագ տեղի ունեցավ, եւ մրցավարները 2-1 տեսքով միավորներ բաշխեցին մարզիկներին, սակայն հետո ղազախին տվեցին ոչ թե 1, այլ 2 միավոր, եւ նա դուրս եկավ կիսաեզրափակիչ:

Դավիթ Սաֆարյանը 1/4-ում է

12:03, օգոստոսի 12, 2012
Հայաստանի վերջին ներկայացուցիչը օլիմպիական խաղերում՝ 66 կգ քաշային ազատոճային Դավիթ Սաֆարյանը, 1/8-ում առանց գոտեմարտի անցավ հաջորդ փուլ, քանի որ նրա մրցակից եգիպտացի Օմար Ահմեդը դուրս չեկավ գորգ վնասվածքի պատճառով:

Հաջիմուրադը չի կարող պայքարել բրոնզի համար

18:52, օգոստոսի 11, 2012
Հայաստանը ներկայացնող դաղստանցի 84 կգ ազատոճային ըմբիշ Հաջիմուրադ Նուրմագոմեդովը զրկվեց նաեւ բրոնզե մեդալների համար պայքարելու հնարավորությունից, քանի որ նրան հաղթած իրանցի Լաշգարին կիսաեզրափակչում պարտվեց Ադրբեջանը ներկայացնող Շարիֆովին:

Հայաստանցի ըմբիշի հույսը իրանցու հաջողությունն է

17:53, օգոստոսի 11, 2012
84 կգ քաշային Հաջիմուրադ Նուրմագոմեդովը պարտվեց 1/8-ում իրանցի Լաշգարիին, որը 1/4-ում կմրցի ռուսաստանցի Անզոր Ուրիշեւի հետ: Հայաստանցի ըմբիշին պետք է, որ իրանցին մտնի եզրափակիչ, ինչն իրեն բրոնզի համար պայքարելու հնարավորություն կտա: Սակայն դա էլ հեշտ չի լինի, որովհետեւ ցանցի ներքեւի հատվածում, որտեղ հայտնվել է մեր մարզիկը, բավականին ուժեղ մրցակիցներ են հայտնվել:

Նուրմագոմեդովը հաղթանակով մեկնարկեց

16:37, օգոստոսի 11, 2012
Հայաստանցի 84 կգ քաշային ազատոճային ըմբիշ Հաջիմուրադ Նուրմագոմեդովը 4-3 հաշվով առավելության հասավ տաջիկ ըմբիշ Յուսուպ Աբդուսալոմովի նկատմամբ եւ դուրս եկավ 1/8 եզրափակիչ, որտեղ նրա մրցակիցը կլինի իրանցի Նասեր Էհսան Լաշգարին:

Արման Երեմյանը չկարողացավ մեդալ նվաճել

00:51, օգոստոսի 11, 2012
80 կգ քաշային թաեքվոնդոյիստ Արման Երեմյանը բրոնզե մեդալի համար պայքարում 3- 9 հաշվով պարտություն կրեց բրիտանացի Լուտալո Մուհամմադից եւ չկարողացավ նվաճել Հայաստանի 4-րդ մեդալը: Այսօր մեդալի համար պայքարից դուրս մնաց նաեւ 55 կգ ազատոճային ըմբիշ Միհրան Ջաբուրյանը:

Հայ թաեքվոնդոյիստը կպայքարի բրոնզի համար

21:06, օգոստոսի 10, 2012
Մեր մարզիկը այժմ կսպասի նախորդ փուլերում եզրափակչի մասնակից իսպանացի Գարսիային պարտված մարզիկների ելույթներին: Իրանցի Քարամիի եւ բրիտանացի Մուհամմադի միջեւ լավագույնը ճանաչվածը Արմանի հետ կվիճարկի օլիմպիական բրոնզը:

Արման Երեմյանը կիսաեզրափակչում է. մեդալից մեկ քայլ է բաժանում

19:29, օգոստոսի 10, 2012
Երեւանցի 80 կգ քաշային թաեքվոնդոյիստ Արման Երեմյանը իր հերթական հաղթանակը տարավ հոլանդացի Տոմի Մոլետի նկատմամբ 1/4-ում ու դուրս եկավ կիսաեզրափակիչ: Եզրափակչից եւ նվազագույնը արծաթե մեդալից Արմանին մեկ հաղթանակ է բաժանում:

Հայ ըմբիշը վերածվեց հանդիսատեսի

18:15, օգոստոսի 10, 2012
55 կգ քաշային ազատոճային ըմբիշ Միհրան Ջաբուրյանը դուրս մնաց հետագա պայքարից այն պատճառով, որ նրան հաղթած ճապոնացի Յումոտոն կիսաեզրափակչում պարտվեց վրացի Խինչեգաշվիլուն: Յումոտոն վրացուն զիջած նախորդ ըմբիշների հետ կպայքարի բրոնզի համար, իսկ Ջաբուրյանը կհետեւի միայն կողքից:

Ջաբուրյանը պարտվեց. նրա հույսը ճապոնացու եզրափակիչ մտնելն է

17:24, օգոստոսի 10, 2012
55 կգ քաշային ազատոճային Միհրան Ջաբուրյանը 10-1 ընդհանուր հաշվով պարտվեց ճապոնացի Շինչի Յումոտոյին: Երկրորդ մրցափուլում ճապոնացին 6-0 հաղթեց ու գոտեմարտը ավարտվեց ժամանակից շուտ:

Միհրան Ջաբուրյանը հաղթանակով մեկնարկեց

16:54, օգոստոսի 10, 2012
55 կգ քաշային ազատոճային ըմբիշ Միհրան Ջաբուրյանը մաքուր հաղթանակ տարավ հոնդուրասցի Խեսուս Էսկոբարի նկատմամբ:

Ամերիկացիներն առաջ անցան չինացիներից, իսկ Հայաստանը 50-րդն է 80-ի մեջ

15:22, օգոստոսի 10, 2012
Մեր 4 հարեւաններից առաջատարի դիրքերը շարունակում է պահել Իրանը, որն ունի 4- ական ոսկի եւ արծաթ ու 1 բրոնզ: Իրանը 14-րդ տեղում է: Վրաստանն իր 1-ական ոսկով, արծաթով ու բրոնզով 35-րդն է, իսկ Թուրքիան երեկ 1 ոսկի նվաճելուց հետո բարձրացել է 38-րդ հորիզոնական, թուրքերը նաեւ 1 բրոնզ ունեն: Ադրբեջանն էլ 2 արծաթով ու 3 բրոնզով 46-րդն է: Հավելենք, որ Ադրբեջանի 5 մեդալներից 3-ը (1 արծաթ եւ 2 բրոնզ) նվաճել են այլազգիներ:

Արման Երեմյանը հաղթեց կանադացի մրցակցին

15:02, օգոստոսի 10, 2012
Քիչ առաջ երեւանցի թաեքվոնդոյիստ Արման Երեմյանը 8-4 հաշվով հաղթեց կանադացի Սեբաստիեն Միշոյին եւ դուրս եկավ 1/4 եզրափակիչ, որտեղ նրա մրցակիցը կլինի հոլանդացի Տոմի Մոլետը: Արմանը առաջին ռաունդում զիջեց 0-2 հաշվով, երկրորդում 3- միավորանոց 2 հնարք կատարեց ու հաղթեց 6-0, իսկ երրորդ ռաունդն ավարտվեց 2-2:

Հայաստանը կիսում է 48-րդ տեղը Բելգիայի ու Մոնղոլիայի հետ

14:15, օգոստոսի 09, 2012
Ցուցակը կրկին գլխավորում են չինացիները՝ 36 ոսկի, 22 արծաթ, 19 բրոնզ, երկրորդ տեղում ամերիկացիներն են՝ 34, 22, 25: Մեծ Բրիտանիան երրորդն է՝ 22, 13, 13, իսկ Հարավային Կորեան՝ չորրորդը՝ 12, 7, 6: Հինգերորդ տեղ է բարձրացել Ռուսաստանը՝ 11, 19, 23:

Հայաստանը 44-րդ տեղն է կիսում Ադրբեջանի, Բելգիայի ու Հնդկաստանի հետ

23:21, օգոստոսի 07, 2012
Մեդալների թիմային ոչ պաշտոնական հաշվարկում 1 արծաթով ու 2 բրոնզով Հայաստանը բարձրացավ 44-րդ հորիզոնական, որը կիսում է Ադրբեջանի, Բելգիայի ու Հնդկաստանի հետ:

Հայաստանը երրորդ մեդալն ունի. Ալեքսանյանը բրոնզ նվաճեց

22:44, օգոստոսի 07, 2012
Գյումրեցի 21-ամյա 96 կգ քաշային հունահռոմեական ըմբիշ Արթուր Ալեքսանյանը բրոնզ նվաճեց՝ հաղթելով կուբացի Էստրադային: Արթուրը ոսկե մեդալի իրական հավակնորդ էր, սակայն պարտվեց իրանցի Ռեզայիին ու ստիպված էր բավարարվել բրոնզով:

Արթուր Ալեքսանյանը հաղթեց թուրքին. նա կպայքարի բրոնզի համար

21:07, օգոստոսի 07, 2012
Քիչ առաջ 96 կգ քաշային Արթուր Ալեքսանյանը հաղթեց թուրք Ջենկ Իլդեմին եւ բրոնզի համար այժմ կպայքարի կուբացի Էստրադայի հետ: Իսկ մեր մյուս ըմբիշը՝ 66 կգ քաշային Հովհաննես Վարդերեսյանը, կրկին պարտվեց. սփոփիչ մենամարտում նա տանուլ տվեց մեկ այլ կուբացի Մյուլենսին, որը կպայքարի բրոնզի ճանապարհին:

Կորեացին ու իրանցին կանաչ լույս վառեցին մեր ըմբիշների առաջ

18:36, օգոստոսի 07, 2012
Ալեքսանյանը թուրքին հաղթելու դեպքում կմրցի կուբացի Էստրադայի հետ եւ հաղթանակը նրան օլիմպիական բրոնզ կբերի: Վարդերեսյանի ճանապարհը մի քիչ երկար է, նա նախ պետք է հաղթի Մյուլենսին, հետո լիտվացի Վենցկաիտիսին եւ բրոնզի համար մարտում՝ ֆրանսիացի Գենոյին: Ավելի բարձր են գնահատվում Ալեքսանյանի հնարավորությունները:

Ալեքսանյանը կսպասի իրանցու հաջողությանը, որ պայքարի բրոնզի համար

17:28, օգոստոսի 07, 2012
Հիմա Արթուրը պիտի հուսա, որ իրանցին մտնի եզրափակիչ, ինչը մեր մարզիկին բրոնզի համար պայքարելու հնարավորություն կտա: Նման պատկեր է նաեւ 66 կգ քաշային Հովհաննես Վարդերեսյանի պարագայում, ով սպասում է կորեացի Կիմի ելույթներին:

Նիզականետորդուհի Քրիստինե Հարությունյանը վատագույն ցուցանիշն ուներ

17:08, օգոստոսի 07, 2012
Հարությունյանը նիզակը նետեց 47,65 մ, իսկ, օրինակ, խմբի առաջատար չեխ Սպոտակովան՝ 66,19 մ: Եզրափակիչ մտան երկու խմբերում լավագույն արդյունք ցույց տված 6-ական մարզուհիները:

Արթուր Ալեքսանյանը 1/4-ում է

16:54, օգոստոսի 07, 2012
21-ամյա 96 կգ քաշային Արթուր Ալեքսանյանը, ինչպես եւ սպասվում էր, առանց դժվարության հաղթահարեց 1/8-ում իտալացի Տիմոնչինիի արգելքը եւ մտավ 1/4: Այստեղ մեր ըմբիշը գոտեմարտելու է իրանցի Ռեզայիի հետ, որը հաղթել է թուրք Իլդեմին:

Վարդերեսյանը պարտվեց հենց առաջին մարտում

16:10, օգոստոսի 07, 2012
66 կգ քաշային հունահռոմեական ըմբիշ Հովհաննես Վարդերեսյանը իր առաջին իսկ մարտում հարավկորեացի Կիմի դեմ ոչնչով աչքի չընկավ:

Հայաստանը 47-րդն է 70-ի մեջ

14:07, օգոստոսի 07, 2012
Մեր հարեւաններից լավագույն արդյունքն ունի Իրանը, որին պարզերես են անում ծանրորդներն ու ըմբիշները:

Հայաստանն այսօր ներկայացված է երկու ըմբիշով

13:52, օգոստոսի 07, 2012
Այսօր օլիմպիական գորգ դուրս կգան 66 կգ քաշային հունահռոմեական ըմբիշ Հովհաննես Վարդերեսյանը եւ 96 կգ-ային Արթուր Ալեքսանյանը: Վիճակահանությամբ Վարդերեսյանը որակավորման փուլում հանդիպում ունի հարավկորեացի Կիմ Հյոնվուի հետ, որում հաջողության հասնելու պարագայում կմրցի կուբացի Պեդրո Մյուլենսի հետ: Վերջինս ազատված է որակավորման փուլի մարտերից: Վարդերեսյանի մարտը նախատեսված է Երեւանի ժամանակով 16:00-ին:

Յուրի Պատրիկեեւը հրաժեշտ տվեց օլիմպիական խաղերին

18:22, օգոստոսի 06, 2012
Ստացվեց այնպես, որ Պատրիկեեւը հենց որակավորման փուլում հաղթեց Աթենքի օլիմպիական չեմպիոն Հասան Բարոեւին, հետո պարտվեց իրանցուն, որն էլ իր հերթին զիջեց շվեդին: Յուրիի ու Հասանի նման մարզիկները, որոնք համարվում էին քաշի առաջատարներից, դուրս մնացին մեդալների մրցավազքից:

Պատրիկեեւի հույսը օլիմպիական բրոնզն է

17:46, օգոստոսի 06, 2012
Յուրի Պատրիկեեւը դուրս մնաց օլիմպիական ոսկու համար պայքարից, սակայն նա դեռ հնարավորություն ունի հասնել բրոնզի: Դա տեղի կունենա, եթե իրանցի Բաբաջանզադեն, ում պարտվեց Պատրիկեեւը, հասնի եզրափակիչ: Այդ դեպքում Յուրին իրանցուն պարտված մյուս մարզիկների հետ սփոփիչ մենամարտերում կվիճարկի օլիմպիական բրոնզի ճակատագիրը:

Յուրի Պատրիկեեւը հաղթահարել է Հասան Բարոեւի արգելքը

17:05, օգոստոսի 06, 2012
Պատրիկեեւը հայտնվել է մրցաշարի թեթեւ հատվածում, առավել եւս, որ արդեն հաղթահարել է Բարոեւին: Մյուս հատվածում են նրա հիմնական մրցակիցներից թուրք Կայալփը եւ կուբացի Միխաին Լոպեսը:

Ջուլֆալակյանը 16 տարի անց Հայաստանին օլիմպիական արծաթ բերեց

23:17, օգոստոսի 05, 2012
Օգոստոսի 5-ը հաջող էր Հայաստանի ներկայացուցիչների համար. 1 արծաթ եւ 1 բրոնզ: Այս ցուցանիշով մեր թիմը միանգամից հայտնվեց ոչ պաշտոնական թիմային հաշվարկի 43-րդ տեղում, որը կիսում է Բելգիայի, Ինդոնեզիայի, Մոնղոլիայի, Նորվեգիայի ու Սերբիայի հետ:

Բախտը չժպտաց Յուրի Պատրիկեեւին. նա հանդիպելու է իր հին ծանոթ Հասան Բարոեւին

21:41, օգոստոսի 05, 2012
Կարելի է ասել, որ բախտը չի ժպտացել հունահռոմեական ոճի գերծանրքաշային (120 կգ) Յուրի Պատրիկեեւին: Վաղը կայանալիք մրցաշարում մեր մարզիկը որակավորման փուլում մրցելու է իր վաղեմի հակառակորդ, նախկին թիմակից, ռուսաստանցի Հասան Բարոեւին, այնինչ շատ ավելի թույլ մարզիկներ ազատված են որակավորման փուլից:

88-կիլոգրամանոց Հռիփսիմեն 3-րդն է հսկաների մենամարտում. Հայաստանի առաջին մեդալը

21:14, օգոստոսի 05, 2012
Հռիփսիմեն մեր առաջին կին ծանրորդն է, որ օլիմպիական մեդալ նվաճեց, ավելին՝ նա առաջին կին մարզիկն է, որ անկախ Հայաստանի պատմության մեջ մեդալ է նվաճել: Եվ բացի այդ՝ նա Հայաստանի 3-րդ կին մարզիկն է, որ պատմության մեջ բարձրացել է օլիմպիական հարթակին: 1972-ին մյունխենյան խաղերում սկավառականետորդուհի Ֆաինա Մելնիկը դարձավ օլիմպիական չեմպիոն, իսկ 1980-ին մոսկովյան օլիմպիադայում Սիրվարդ Էմիրզյանը երկրորդն էր ջրացատկում: Մի խոսքով՝ Հռիփսիմեն պատմություն կերտեց:

Այսօր մենք կունենանք անկախ Հայաստանի երկրորդ ոսկին կամ արծաթը

19:26, օգոստոսի 05, 2012
Հասկանալու համար, թե ինչ հաջողության է հասել 25-ամյա Ջուլֆալակյանը, ասենք, որ առաջին ու առայժմ վերջին անգամ նույն հունահռոմեական ոճի ըմբիշ Արմեն Նազարյանն է 1996-ին նվաճել օլիմպիական ոսկին, նույն տարում էլ ազատոճային Արմեն Մկրտչյանը նվաճեց առայժմ մեր միակ արծաթը: Այսինքն՝ այսօր մենք կունենանք երկրորդ ոսկին կամ արծաթը:

Հայ ըմբիշը կիսաեզրափակիչ մտավ. մեդալից մեկ քայլ է բաժանում

18:32, օգոստոսի 05, 2012
Եզրափակիչ մտնելու դեպքում, բնականաբար, արծաթն ապահովված կլինի: Իսկ կիսաեզրափակիչում պարտվելը հնարավորություն կտա պայքարել բրոնզի համար:

Արսեն Ջուլֆալակյանը քառորդ եզրափակչում է

17:24, օգոստոսի 05, 2012
Կիկինովին հաղթելու դեպքում Ջուլֆալակյանը կմրցի Ահմադով-Դատունաշվիլի ադրբեջանավրացական զույգի հաղթողի հետ:

Նորայր Բախտամյանը երկրորդ անգամ դուրս մնաց որակավորման փուլից

14:24, օգոստոսի 05, 2012
Երեւանցի հրաձիգ Նորայր Բախտամյանը չկարողացավ հաղթահարել 50 մ ատրճանակի որակավորման փուլը: Մեր մարզիկը 38 մասնակիցների մեջ 557 միավորով զբաղեցրեց 18-րդ տեղը: Իսկ առաջատար հարավկորեացի Չոին վաստակել է 569 միավոր:

Մեդալի հույսով

12:00, օգոստոսի 05, 2012
Այս պահին որակավորման է մասնակցում 50 մ ատրճանակի հրաձգությունում մեր ներկայացուցիչ Նորայր Բախտամյանը, իսկ ժամը 17:03-ին 74 կգ հունահռոմեական ըմբիշ Արսեն Ջուլֆալակյանը 1/8 եզրափակիչում կմրցի ղրղըզ Դանիյար Կոբոնովի հետ:

Ծառուկյան-Վարդանյան լեզվակռվի խմորը կարծես դեռ երկար է ջուր քաշելու

16:11, օգոստոսի 04, 2012
Ընդամենը ի գիտություն պարոն Վարդանյանի հավելեմ, որ Գագիկ Ծառուկյանը ՀԱՕԿ նախագահն է եւ բնականաբար չի կարող պատասխանատվություն կրել նեղ մասնագիտական խնդիրների համար։ Իսկ եթե պարոն Վարդանյանը, որպես ոլորտի մասնագետ, իրապես սրտացավ էր, ապա կարող էր ոչ թե գնահատականներ հնչեցնել՝ ով է պրոֆեսիոնալ, իսկ ով՝ ոչ, այլ խնդիրները քննարկել ծանրամարտի հավաքականի մարզչի, կամ ֆեդերացիայի մարզիչ հետ։

54 երկիր արդեն մեդալ ունի

13:02, օգոստոսի 04, 2012
Նախկին ԽՍՀՄ երկրներից լավագույն արդյունքն ունեն ղազախները՝ 4 ոսկի: Այս ցուցանիշով նրանք հաշվարկում 9-րդն են: Ռուսները, չնայած 23 մեդալ ունեն, սակայն 10-րդն են, որովհետեւ 3 ոսկի, 12 արծաթ, 8 բրոնզ: Ուկրաինացիները 2 ոսկի եւ 4 բրոնզ ունեն, որով հայտնվել են 18-րդ տեղում: Բելառուսները 22-րդն են՝ 1, 1, 2: Վրացիներն ունեն 1 ոսկե, իսկ ադրբեջանցիներն ու ուզբեկները՝ 1-ական բրոնզե մեդալ:

25-ից 12-ը հաստատ ձեռնունայն կվերադառնան

10:57, օգոստոսի 04, 2012
Արսենը 7,62 արդյունքով 11-րդն էր երկրորդ խմբում: Խմբերի առաջատարները ցույց տվեցին 8,11 մ: Եթե մեր մարզիկները ցույց տային իրենց լավագույն որակները, ապա կանցնեին եզրափակիչ, որը տեղի կունենա այսօր: Թե Վարդանը, թե Արսենը այս մրցաշրջանում ցատկել են 8,20 մ, ինչը նրանց լավագույն ցուցանիշն է, սակայն, ինչպես տեսնում ենք, Լոնդոնում շատ անհաջող են ելույթ ունեցել:

ԲՀԿ-ն՝ Յուրի Վարդանյանին. «Չարժե Ձեզ մտնել բարդ ինտելեկտուալ քաղաքական բանավեճերի մեջ»

16:31, օգոստոսի 03, 2012
Հարգելի պարոն Վարդանյան, մեծ հարգանքով Ձեր հանդեպ ուզում եմ նշել, որ ՀՀ ԱԺ պատգամավոր, ԲՀԿ խոսնակ Տ. Ուրիխանյանի կողմից որևէ վիրավորանք Ձեզ չի հասցվել, այլ պարզապես հայտնվել է կարծիք, թե լավ կլիներ՝ Ձեր բացակայության տարիներին ոչ թե ԱՄՆ-ում լինեիք, այլ Հայաստանում ու ներդնեիք Ձեր ավանդը տվյալ սպոտաձևի զարգացման գործում: Ինչ է, համաձայն չէ՞ք:

Յուրի Վարդանյանի 5 կետերը

15:28, օգոստոսի 03, 2012
Ես զուտ մասնագիտական տեսակետից արտահայտեցի իմ կարծիքը, որին անդրադառնալն այժմ հարկ չեմ համարում: Սակայն իմ բարյացակամ խոսքը, այն էլ` ցավով արտահայտված, որոշ շրջանակներում այլ կերպ ընդունվեց, ավելին` անհիմն քաղաքականացվեց:

Ծանրամարտի Հայաստանի օլիմպիական թիմը խորը ճգնաժամի մեջ է

13:54, օգոստոսի 03, 2012
Հերթական 0-ն օլիմպիական խաղերում ու կրկին ծանրորդի կատարմամբ: Քիչ առաջ 85 կգ քաշային գյումրեցի ծանրորդ Արա Խաչատրյանը, պոկում վարժությունում պատվիրելով ամենաբարձր նախնական քաշը՝ 165 կգ, ձախողեց իր բոլոր 3 փորձերը ու դուրս մնաց պայքարից: Հիշեցնենք, որ սա B խումբն է, իսկ A խումբը, որտեղ ընդգրկված են կարգով ավելի բարձր մարզիկներ, ելույթ կունենա 22:00-ին:

Վաղը կտեսնենք Արա Խաչատրյանին եւ հեռացատկորդներին

12:27, օգոստոսի 02, 2012
Վաղը՝ Երեւանի ժամանակով 13:00-ին, լոնդոնյան հարթակ դուրս կգա 85 կգ քաշային գյումրեցի ծանրորդ Արա Խաչատրյանը: Մեր մարզիկն ընդգրկված է B խմբում, որում հանդես կգան 11 մարզիկներ: Արան համարվում է խմբի առաջատարը: Տեսականորեն նա մեդալի հավակնորդ է, եւ էական չէ, որ ընդգրկվել է կարգով ցածր խմբում: Այդուհանդերձ, A խմբում բավական զորեղ կազմ է հավաքվել՝ հանձին իրանցիներ Ռոստամիի եւ Մորադիի, բելառուս Ռիբակովի, չինացի Լուի, ռուսաստանցի Աուխադովի եւ լեհ Զելինսկու:

Դադարեցրեք «փոխհրաձգությունը», պարոնայք ծանրամարտիկներ

00:16, օգոստոսի 02, 2012
Մարզասերներին հուզող միակ հարցն այս պահին մեդալների բացակայությունն ու անհաջող ելույթներն են, իսկ անձնական հարաբերությունները կարելի է պարզել (եթե, իհարկե, դրա կարիքն ունեք) մամուլի էջերից դուրս, ինչը, միեւնույնն է, ձեզ նման ճանաչված մարդկանց պատիվ չի բերում...

Տապալում տապալման հետեւից

20:14, օգոստոսի 01, 2012
Հրում վարժությունը, որում ավանդաբար հայ մարզիկները ընդհանուր առմամբ ավելի վստահ են հանդես եկել, այս օրերին մեր ծանրորդների անեծքն ու սարսափն է դարձել: Կրկին հարց է ծագում. ինչպիսի՞ հաշվարկներ են անում մարզիչները, որոնց սաները պարզապես չեն կարողանում հաղթահարել ծանրությունն ու կատարել առաջադրանքը: Սրանք կիլոգրամներ են, որոնք բարձրացվել են մարզումների ժամանակ: Ուրեմն ի՞նչ է պատահում ելույթից առաջ: Այս հարցերի պատասխանները պետք է տրվեն հենց իրենց՝ մարզիկների, մարզիչների ու ղեկավարների կողմից: Երկրպագուները որքան համբերատար, նույնքան էլ պահանջող են:

Մելինե Դալուզյանը կմրցի 8 հոգու հետ

13:17, օգոստոսի 01, 2012
Այսօր Լոնդոնի օլիմպիական խաղերում Հայաստանը կներկայացնի գյումրեցի ծանրորդուհի Մելինե Դալուզյանը: Մեր օլիմպիական գլխավոր հույսերից մեկը հանդես կգա 69 կգ քաշային կարգում: Մելինեն առաջին անգամ է մասնակցում օլիմպիական խաղերին: 2008-ի պեկինյան օլիմպիադայից առաջ նա վնասվածք ստացավ, եւ Պեկին մեկնեց Հռիփսիմե Խուրշուդյանը, ով բավարարվեց 11-րդ տեղով:

Այսպես չի կարելի. հայ մարզասերին հարգել է պետք

00:49, օգոստոսի 01, 2012
Ի վերջո, մենք ընդամենը 25 պատվիրակ ենք ներկայացրել, որոնցից մոտ 7-8-ն են մեդալի իրական հավակնորդ: Նրանց վրա հսկայական ֆինանսական միջոցներ են ծախսվում, պատասխանատուներն էլ խոստովանում են, որ ամեն ինչ արվում է: Իսկ արդյունքու՞մ... ոչինչ, միայն կորսված հույսեր:

Արդեն 37 երկիր մեդալ է նվաճել

14:31, հուլիսի 31, 2012
Նախկին ԽՍՀՄ երկրներից 2-ական ոսկի են նվաճել Ռուսաստանն ու Ղազախստանը, ռուսները նաեւ 3 բրոնզ են նվաճել: 1-ական չեմպիոն ունեն Լիտվան, Վրաստանը, Ուկրաինան: Ադրբեջանն ու Ուզբեկստանը 1-ական բրոնզ ունեն: Մեր հարեւաններից մեդալներ չունեն Թուրքիան եւ Իրանը:

Լողորդ Միքայել Քոլոյանի արդյունքը վատագույններից էր

13:26, հուլիսի 31, 2012
Այսօր երեւանցի լողորդ Միքայել Քոլոյանը մեկնարկեց 100 մ ազատ լողաոճում եւ որակավորման 3-րդ ութնյակում ցույց տվեց վատագույն արդյունքը: Նա 100 մ-ը հաղթահարեց 53,82 վրկ-ում: Բնականաբար, Քոլոյանը դուրս մնաց հետագա պայքարից: Նրա արդյունքը ամենացածրերից է: Քոլոյանից ավելի վատ են հանդես եկել միայն 11 լողորդներ, իսկ ընդհանուր առմամբ լավագույն ցուցանիշը 52 լողորդների մեջ ցույց է տվել ամերիկացի Նատան Ադրիանը՝ 48,19 վրկ:

Առաջատարը կրկին չինացիներն են

14:11, հուլիսի 30, 2012
13 երկիր արդեն ոսկե մեդալ է նվաճել: Դրանց թվում են նախկին ԽՍՀՄ երկրներից Ղազախստանը (2 հատ), Ռուսաստանը, Վրաստանը (1-ական): Մեր հարեւաններից Ադրբեջանն էլ արդեն մեդալ ունի՝ 1 բրոնզի տեսքով: Նույնպիսի հաջողության են հասել ուկրաինացիները:

Առաքել Միրզոյանից մեդալի հույսեր կան

13:31, հուլիսի 30, 2012
Այսօր Լոնդոնում հայ օլիմպիականների չենք տեսնի: Իսկ ահա վաղը լողավազանում կտեսնենք երեւանցի լողորդ Միքայել Քոլոյանին, ով ուժերը կչափի 100 մ ազատ ոճում: Դե իսկ օրվա գլխավոր իրադարձությունը հայ մարզասերների համար կլինի 69 կգ քաշային ծանրորդների մրցությունը, որտեղ կտեսնենք Առաքել Միրզոյանին: Այն բանից հետո, երբ վնասվածքի պատճառով շարքից դուրս եկավ Տիգրան Մարտիրոսյանը, ծրագրվածի համաձայն՝ նրա տեղը պետք է լրացնի պահեստային Վանիկ Ավետիսյանը, որը նույնպես հանդես է գալիս 69 կգ քաշային կարգում:

Արմեն Նազարյանը նույնպես դարձավ հանդիսատես

15:15, հուլիսի 29, 2012
Ձյուդոյիստ Արմեն Նազարյանը նույնպես հանդիսատես դարձավ: 66 կգ քաշայինների 1/8 եզրափակիչում նա պարտվեց լեհ Պավել Զագրոդնիկին: Վերջինս նախ վազա-արի վաստակեց, հետո Արմենը հավասարեցրեց հաշիվը, սակայն ոսկե միավորի համար պայքարում՝ ավելացված ժամանակում, ստացավ երկրորդ զգուշացումը, ինչը մրցակցին յուկո բերեց, եւ Արմենը լքեց պայքարը:

Չինացիներն առայժմ լավագույնն են լոնդոնյան խաղերում

14:17, հուլիսի 29, 2012
Այս պահին օլիմպիական թիմային հաշվարկում առաջատարը անորսալի չինացիներն են, որոնք 4 ոսկի եւ 2 բրոնզ են նվաճել, երկրորդ տեղում իտալացիներն են՝ 2-ական ոսկի եւ արծաթ ու 1 բրոնզ, ԱՄՆ-ի հաշվին գրանցված է 1 ոսկի, 2-ական արծաթ եւ բրոնզ, Բրազիլիան ու Հրվ. Կորեան նվաճել են 1-ական բոլոր գույնի մեդալներից:

Լողորդուհի Անահիտ Բարսեղյանը նախավերջինն էր

14:06, հուլիսի 29, 2012
Հայաստանցի լողորդուհի Անահիտ Բարսեղյանը 100 մ թիկնալողում այսօր ցույց է տվել 1 րոպե 8,19 վրկ արդյունք, ինչը 45 մասնակիցների մեջ 44-րդն էր: Որակավորման փուլը հաղթահարել են 16 լողորդուհիներ, որոնցից լավագույնը եղել է ավստրալուհի Էմիլի Սեբոմը: Նա 100 մ-ը հաղթահարել է 58,23 վրկ-ում, ինչը նոր օլիմպիական ռեկորդ է:

Արմեն Նազարյանը մաքուր հաղթանակ է տարել

13:56, հուլիսի 29, 2012
Հրազդանցի ձյուդոյիստ Արմեն Նազարյանը այսօր իր առաջին մարտում մաքուր հաղթանակով՝ իպոնով, հաղթել է Պապուա Նոր Գվինեայի ներկայացուցիչ Օվինոուին եւ դուրս եկել 66 կգ քաշայինների 1/8 եզրափակիչ:

Անդրանիկ Հակոբյանը դուրս մնաց նոկաուտով

01:46, հուլիսի 29, 2012
75 կգ քաշային Անդրանիկ Հակոբյանը հիասթափեցրեց հայ երկրպագուներին: Ամերիկացի Տերել Գաուշայի հետ մարտում, ունենալով առավելություն, վերջին վայրկյանների ընթացքում էջմիածնեցի մարզիկը նախ նոկդաունի ենթարկվեց, ապա ակնթարթներ անց կրկին հայտնվեց ռինգի հատակին: Մրցավարները գրանցեցին նոկաուտ: Հայաստանցի միակ բռնցքամարտիկը դուրս մնաց պայքարից այսպիսի տխուր վերջաբանով:

Լոնդոնյան խաղերի առաջին հայ չեմպիոնը՝ ռուսաստանցի Արսեն Գալստյանը

19:53, հուլիսի 28, 2012
Ավարտվեց 60 կգ քաշային կարգի տղամարդկանց ձյուդոյի մրցաշարը: Մեր հայրենակից, ռուսաստանցի Արսեն Գալստյանը իպոնով՝ մաքուր հաղթանակով հաղթեց ճապոնացի Հիրաոկային: Սա Ռուսաստանի առաջին մեդալն է, այն էլ՝ ոսկե: Բացի այդ՝ Արսենը առաջին ռուսաստանցի չեմպիոն ձյուդոյիստն է:

Գյումրեցի ձյուդոյիստը կորցրեց մեդալ նվաճելու հնարավորությունը

18:16, հուլիսի 28, 2012
Հովհաննես Դավթյանը բաց թողեց լավ հնարավորությունը եւ դուրս մնաց մեդալների համար պայքարից: 60 կգ քաշային մեր ձյուդոյիստը երկու զգուշացում ստացավ եւ արդյունքում միավոր նվիրեց ֆրանսիացի Միլոուսին: Վերջինս կմրցի Սոբրիով-Գալստյան զույգի պարտվողի հետ: Բրոնզե մեդալի մյուս զույգը կազմելու են բրազիլացի Կիտադաին եւ Վերդե-Հիրաոկա զույգի պարտվողը:

Նվերներ՝ պոտենցիալ օլիմպիական չեմպիոններին

17:50, հուլիսի 28, 2012
Այսօր ՀՀ-ում Միացյալ Թագավորության դեսպան Ջոնաթան Էյսը հյուրընկալվել էր «Էրեբունի» ԲԿ-ի ծննդատանը, որտեղ նվերներ հանձնեց 30-րդ լոնդոնյան ամառային խաղերի բացման ժամանակ ծնված երկու փոքրիկներին՝ Լուիզային եւ Հրաչյային:

Նորայր Բախտմյանը դուրս է մնացել պայքարից

17:10, հուլիսի 28, 2012
Երեւանցի հրաձիգ Նորայր Բախտամյանը 10 մ օդամուղ ատրճանակի մրցաձեւում որակավորման փուլում 44 մասնակիցների մեջ զբաղեցրել է 16-րդ տեղը, ինչը բավարար չէր եզրափակիչ դուրս գալու համար: Նման բախտի են արժանացել լավագույ 8 արդյունք ցույց տված հրաձիգները: Բախտամյանը 6 կրակոցից 600 հնարավորից վաստակել է 579 միավոր, իսկ, օրինակ, առաջատարը` հարավկորեացի Ջոնգո Ջինը` 588 միավոր:

Դավթյանը կպայքարի բրոնզի համար

16:34, հուլիսի 28, 2012
Հովհաննես Դավթյանը քիչ առաջ դուրս մնաց ոսկե մեդալի համար պայքարից: Քառորդ եզրափակչում մեր մարզիկը երկու զգուշացում ստացավ եւ մրցակցին միավոր տրվեց, ինչն էլ պատճառ դարձավ պարտության: Իտալացի Վերդեն Դավթյանին հաղթելուց հետո կիսաեզրափակչում կմրցի ճապոնացի Հիրոակի Հիրաոկայի հետ, մյուս զույգը կազմել են ուզբեկ Սոբիրովն ու ռուսաստանցի Գալստյանը:

Երեւանցի մարմնամարզիկը 32 հոգու մեջ զբաղեցրել է 8-րդ տեղը

16:12, հուլիսի 28, 2012
Երեւանցի մարմնամարզիկ Արթուր Դավթյանը քիչ առաջ ավարտել է իր ելույթները որակավորման փուլում: 3 խմբերից առաջինում ընդգրկված մեր մարզիկը 32 հոգու մեջ զբաղեցրել է 8-րդ տեղը` հավաքելով 82.865 միավոր:

Մեր հայրենակիցը կարող է դառնալ Հովհաննես Դավթյանի մրցակիցը

15:55, հուլիսի 28, 2012
Ձյուդոյի 60 կգ քաշայինների 1/4 եզրափակչում կայացել է արդեն երկու մենամարտ: Ուզբեկ Ռիշոդ Սոբիրովը հաղթել է բրազիլացի Ֆելիպե Կիտադաիին ու դուրս եկել կիսաեզրափակիչ: Նրա մրցակիցը լինելու է մեր հայրենակից, ՌԴ քաղաքացի Արսեն Գալստյանը, որը հաղթել է հարավկորեացի Գվանգ-Հյոն Չոիին:

Հովհաննես Դավթյանը 1/4 եզրափակչում է

15:45, հուլիսի 28, 2012
Հովհաննես Դավթյանը շարունակում է իր հաղթարշավը: Նրա հերթական «զոհը» դարձավ ղազախ ձյուդոյիստ Կոսաեւը, որին Հովհաննեսը հաղթեց իպոնով: Ասել է թե` մեր մարզիկը մաքուր հաղթանակ տարավ ժամանակից շուտ: 60 կգ քաշայինների 1/4 եզրափակչում մեր մարզիկի հաջորդ մրցակիցը կլինի իտալացի Էլիո Վերդեն:

Առաջին ոսկին՝ Չինաստանին

15:32, հուլիսի 28, 2012
Չինացի կին հրաձիգ Յի Սիլինգը դարձել է 30-րդ ամառային օլիմպիական խաղերի առաջին ոսկե մեդալակիրը: 10 մ օդամուղ հրացանի մրցությունում չիուհին չի ունեցել իր հավասարը եւ պատմության մեջ է մտել իբրեւ լոնդոնյան խաղերի առաջին չեմպիոն:

Դավթյանի հաջորդ մրցակիցը ղազախ Կոսաեւն է

14:47, հուլիսի 28, 2012
Գյումրեցի ձյուդոյիստ Հովհաննես Դավթյանի մրցակիցը 1/8 եզրափակիչում ղազախ մարզիկ Երկեբուլան Կոսաեւն է: Հաջողության հասնելու դեպքում քառորդ եզրափակչում մեր ձյուդոյիստը կմրցի Վերդե (Իտալիա)-Կաստիլյո (Մեքսիկա) զույգի հաղթողի հետ:

Հովհաննես Դավթյանը հիացնում է. նա հաղթեց ադրբեջանցուն

14:27, հուլիսի 28, 2012
Քիչ առաջ գյումրեցի ձյուդոյիստ Հովհաննես Դավթյանը իր երկրորդ հաղթանակը տարավ: 1/16 եզրափակիչում նա հաղթեց ադրբեջանցի Իլգար Մուշկիեւին եւ դուրս եկավ 1/8 եզրափակիչ:

Առաջին հաղթանակը օլիմպիական խաղերում

13:55, հուլիսի 28, 2012
60 կգ քաշային Հովհաննես Դավթյանը հաղթանակով է սկսել իր ելույթները Լոնդոնում: 1/32-րդում մեր ձյուդոյիստը հաղթել է գերմանացի Թոբիաս Էնգլմայերին եւ դուրս եկել 1/16 եզրափակիչ:

Քիչ անց պայքարը կսկսի Հայաստանի առաջին պատվիրակ, ձյուդոյիստ Հովհաննես Դավթյանը

12:29, հուլիսի 28, 2012
Հայաստանի ներկայացուցիչներից ձյուդոիստ Հովհաննես Դավթյանը (60 կգ) ժամը 12:44-ին 1/32-րդում կմրցի գերմանացի Թոբիաս Էնգմայերի հետ: 17:28-ին կսկսվեն մխիթարական գոտեմարտերը եւ բրոնզե մեդալի մրցությունները, իսկ եզրափակիչը կկայանա 19:10-ին:

Լոնդոնի օլիմպիական խաղերի մեկնարկը` Հայաստանում

11:46, հուլիսի 27, 2012
Այս գիշեր ամբողջ աշխարհի ուշադրությունն ու հայացքն ուղղված կլինի դեպի Լոնդոն, ուր պատմության մեջ արդեն երրորդ անգամ կմեկնարկեն ամառային Օլիմպիական խաղերը:

Մեկնարկում են 30-րդ ամառային օլիմպիական խաղերը

19:17, հուլիսի 26, 2012
25-ից 9-ը ներկայացնում են Գյումրին, 7-ը Երեւանից են, 2-ական ներկայացուցիչ ունեն Արմավիրը (Էջմիածին, Բաղրամյան) եւ Կոտայքը (Հրազդան, Քասախ), 1-ը՝ Լոռին (Վանաձոր):

 
 
  Պատրաստված է՝

Մեր մասին

Հասցե՝ Հայաստանի Հանրապետություն,
Երեւան-0010, Բուզանդի 1/3, 8-րդ հարկ
Հեռ.՝ +374 10 563363
Էլ-փոստ՝ info@hetq.am

Մեջբերումներ անելիս հղումը «Հետքին» պարտադիր է:
© 2013 Հետք online: Բոլոր իրավունքները պաշտպանված են:
Աջակցեք «Հետքին»