Եթե աշխատանքից ազատել՝ ապա երկօրյա սեղմ ժամկետներում, եթե օրենքի սահմաններում պատասխանել ուղարկված հարցումներին՝ ապա խախտումներով եւ անհասկանալի ժամկետներում:

Շիրակի մարզպետարանի առողջապահության եւ սոցիալական վարչության պետի նախկին պաշտոնակատար Հասմիկ Պետրոսյանն արդեն երկրորդ ամիսն է՝ փորձում է հասկանալ վարչապետի աշխատակազմին կից գործող քաղաքացիական ծառայության գրասենյակի աշխատակիցների գործելաոճը:

«Ինձ աշխատանքից ազատելու միջնորդագիրը ներկայացնելիս պահանջ էր դրվել այն իրագործել 2 օրվա ընթացքում, առանց՝ իրենց հայտնաբերած անհամապատասխանության հիմքերի լրացուցիչ ստուգման: Հիմա, երբ այդ անհամապատասխանության վերաբերյալ շտկումներն արված են, ես երկրորդ ամիսն է՝ չեմ կարողանում որեւէ հստակ պատասխան ստանալ իմ ուղարկած հարցումներին»,- դժգոհում է Հասմիկ Պետրոսյանը:

Բժիշկ-վերականգնողաբան Հասմիկ Պետրոսյանը Շիրակի մարզպետարանի առողջապահության եւ սոցիալական վարչության պետի պաշտոնակատար նշանակվել էր 2018թ-ի նոյեմբերի 8-ին: Փաստաթղթերի փաթեթն այդ ժամանակ ուղարկվել է վարչապետի աշխատակազմին կից գործող քաղաքացիական ծառայության գրասենյակ, որտեղից պատասխան էր ստացվել, որ ամեն ինչ կարգին է:

Սակայն 2019թ-ի մարտի 27-ին գրասենյակից միջնորդագիր գրություն է ուղարկվել Շիրակի մարզպետարան՝ Հասմիկ Պետրոսյանին աշխատանքից ազատելու պահանջով՝ պատճառաբանությամբ, թե փաստաթղթերում հայտնաբերվել է անհամապատասխանություն: Մարզպետ Տիգրան Պետրոսյանը մարտի 28-ին տեղյակ է պահել պահանջի մասին Հասմիկ Պետրոսյանին եւ հայտնել, որ պետք է վարվի օրենքի սահմաններում: Մարտի 29-ին Հասմիկ Պետրոսյանն ազատվել է աշխատանքից:

«Անհամապատասխանություն կոչվածը վերաբերում էր իմ նախկին աշխատավայրում՝ «Սամարիթեր» հիվանդանոցում ղեկավար պաշտոն զբաղեցնելուն,- պարզաբանում է Հասմիկ Պետրոսյանը,- ես ունեմ 5 տարվա մասնագիտական ստաժ եւ 5 տարվա բաժանմունքի վարիչի ստաժ, այսինքն ինձ մարզպետարանի համապատասխան վարչության պետի ժամանակավոր պաշտոնակատար նշանակելիս որեւէ խախտում չի եղել: Իմ նշանակումից 5 ամիս անց քաղծառայության գրասենյակից որոշում են հարցում անել Պետական եկամուտների կոմիտե, որտեղից ստանում են պատասխան, որ էլեկտրոնային համակարգում պաշտոնի անունը գրված չէ: Բայց եկեք հասկանանք, որ դա իմ մեղքը չէ, այլ այն անձինը, որ դեռ 2013թ-ին պիտի այդ տվյալը ներմուծեր էլեկտրոնային համակարգ ու թերացել է: Այդ մասին ես չեմ իմացել եւ անտեղյակ էր հիվանդանոցի նոր տնօրինությունը»:

Զրուցակցիս փոխանցմամբ «Սամարիթեր» հիվանդանոցի նոր ղեկավարն ու հաշվապահը շատ արագ վերականգնել են բացթողումը: Ապրիլի 8-ին Հասմիկ Պետրոսյանը դիմել է քաղաքացիական ծառայության գրասենյակ եւ տեղեկացրել կատարված փոփոխությունների մասին: Մեկ ամսից ավելի սպասում է հարցման պատասխանին: Հասմիկ Պետրոսյանն ասում է, որ իր դիմումը ստանալուց  հետո գրասենյակից ապրիլի 15-ին հարցում են ուղարկել «Սամարիթեր» հիվանդանոց: Ապրիլի 25-ին ստանալով պատասխանը՝ գրասենյակից որոշել են հարցում կատարել ՊԵԿ-ին միայն մայիսի 3-ին:

«Իրենց գործելակերպը ոչ մի տրամաբանության մեջ չի տեղավորվում,-նկատում է զրուցակիցս,- կարելի էր միանգամից երկու հարցումն էլ անել: Ես մի քանի օր առաջ հեռախոսային զրույց էլ եմ ունեցել գրասենյակի աշխատակիցների հետ, իրենք իմ հարցմանը չպատասխանելը պատճառաբանում են նրանով, որ ՊԵԿ-ից դեռ պատասխան չեն ստացել: Ինձ թվում է ուղղակի ժամանակ են ձգում»:

Հասմիկ Պետրոսյանը որոշել է արտադատական բոլոր միջոցները սպառելուց հետո հարցը տեղափոխել դատաիրավական հարթություն, եթե քաղաքացիական ծառայության գրասենյակում հապճեպ կայացրած որոշումը չփոխվի: