Այս պահին սփյուռքահայ գործարար Սարո Հարթունյանին պատկանող «Ջի Էյջ Սթորիջ էնտերփրայզս» ՍՊ ընկերության բոլոր աշխատակիցները գտնվում են կառավարությանն առընթեր Պետական եկամուտների կոմիտեի շենքում՝ պահանջելով վերացնել ընկերության հաշիվների վրա դրված կալանքը:

Հիշեցնենք, որ 2012 թ. հունվարի 30-ին ՀՀ կառավարությանն առընթեր պետական եկամուտների կոմիտեի քննչական վարչության քննիչ Ռաֆայել Մկրտչյանը կայացրել է սփյուռքահայ ներդրող Սարո Հարթունյանի պատկանող «Ջի Էյջ Սթորիջ Էնթերփրայզս» ՍՊ ընկերության բանկային հաշվեհամարների վրա կալանք դնելու որոշում՝ արգելելով հաշիվներից գումարի կանխիկացումը, կանխիկ կամ փոխանցմամբ ելքագրումը:

Որպես հետեւանք, կաթվածահար են եղել ընկերության աշխատանքները, ընկերությունը վճարումներ չի կարողանում անել, աշխատակիցներն աշխատավարձ չեն կարողանում ստանալ:

«2012-ին ընդհանրապես աշխատավարձ չենք ստացել: Թող մեր աշխատավարձերը տան: Ասում ենք՝ տվեք, նրանք էլ ասում են. «Քննիչը կալանք ա դրել», մենք էլ եկել ենք այստեղ, որ մեր հարցին լուծում տրվի: Հիմա ո՞ւմ դիմենք, ի՞նչ անենք, կամ մենք ի՞նչ կապ ունենք, թող մեր աշխատավարձերը տան, գնանք: Էրեխեք ունենք, ընտանիք, ոնց ապրենք»,- ասում է ընկերության աշխատակիցներից Մուշեղ Եսայանը:

Առավոտվանից այստեղ են, սակայն նրանց դեռ ոչ ոք չի ընդունել: Փոխարենը, ինչպես հավաստում են ընկերության աշխատակիցները, իրենք դիմել են գործով որպես քննիչ ներգրավված Ռաֆայել Մկրտչյանին, ով, լսելով, որ նշված ընկերության աշխատակիցները եկել են բողոքելու, պարզապես ասել է. «Հաջողություն»:

«Զինվոր ունեմ, չեմ կարողանում նրան այցելության գնալ: Հիմա առանց փողի ո՞վ կարող է ինչ անել»,- բողոքում է աշխատակիցներից Սիրանուշ Շմավոնյանը:

Ընկերության աշխատակիցների խոսքով՝ իրենք սպասելու են այնքան ժամանակ, մինչեւ իրենց հարցին լուծում տրվի:

«Ուրիշ տարբերակ չկա. ո՞ւր ենք գնում առանց փողի»,- ասում է մեկ այլ աշխատակից Տատյանա Առաքելյանը:

Մանրամասները՝ ավելի ուշ: