HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Արաքս Մամուլյան

Արսեն Բաբայանը չի ընդունում իրեն առաջադրված մեղադրանքը

Ազգային ժողովի աշխատակազմի ղեկավարի նախկին տեղակալ Արսեն Բաբայանը չի ընդունում իշխանության յուրացմանն օժանդակելու և պաշտոնեական կեղծիք կատարելու վերաբերյալ իրեն առաջադրված մեղադրանքը: Այս մասին այսօր դատարանի դիմաց գտնվող լրագրողներին ասաց Բաբայանի պաշտպաններից Երվանդ Վարոսյանը:

Այսօր՝ ժամը 18:30-ին, Երևան քաղաքի ընդհանուր իրավասության դատարանի Կենտրոնի նստավայրում, նախագահությամբ դատավոր Կարեն Ֆարխոյանի, նշանակված էր Բաբայանի ձերբակալման դեմ նրա պաշտպանների բողոքի քննությունը: Այս նույն ժամանակաշրջանում, սակայն, Հատուկ քննչական ծառայությունը Բաբայանի մասնակցությամբ քննչական գործողություն էր իրականացնում, մասնավորապես՝ նրան մեղադրանք էր առաջադրում: Քիչ ուշ պարզվեց, որ այսօր ձերբակալման դեմ բողոքը չի քննվելու, թեև, պաշտպանների պնդմամբ, դատարանը պարտավոր էր քննել և 24 ժամվա ընթացքում որոշում կայացնել:

«24 ժամն արդեն անցել է, նիստ չի եղել, Արսեն Բաբայանին դատարան չեն ներկայացրել։ Դատավորը պետք է հանձնարարեր վարույթն իրականացնող մարմնին ներկայացնել կասկածյալին, ինչը չի արվել: Հավանաբար, դատարանը վարույթն իրականացնող մարմնի հետ կապի արդյունքում իմացել է, որ կալանքի միջնորդություն պետք է քննվի, նիստը նշանակել են վաղը, որ օրենքի խախտմամբ այդ երկու հարցը լուծեն»,- ասաց Երվանդ Վարոսյանը:

Պաշտպանը նշեց, որ Բաբայանի ձերբակալման դեմ բողոքի քննությունը նշանակվել է վաղը՝ հոկտեմբերի 23-ին, ժամը 17:40-ին: Նա նաև նշեց, որ իր պրակտիկայի ընթացքում առաջին անգամ չի կարող իրավական գնահատական տալ առաջադրված տեքստին:

«Մեղադրանքն Արսեն Բաբայանի հետ առնչություն չունի, առնչություն ունի ՀՀ Սահմանադրական դատարանի և այն պրոցեսի հետ, որն այսօր կատարվում է Սահմանադրական դատարանի շուրջ: Ես` որպես իրավաբան, իրավական գնահատական այդ առաջադրված տեքստին տալ չեմ կարող»,- ասաց փաստաբանը:

Ըստ մամուլում շրջանառվող լուրերի՝ ԱԺ աշխատակիցներից մեկը Բաբայանի դեմ ցուցմունք է տվել: Երվանդ Վարոսյանը նշեց, որ որևէ անձ իր պաշտպանյալի դեմ ցուցմունք չի տվել:

Հիշեցնենք, որ Արսեն Բաբայանը ձերբակալվել է երեկ՝ հոկտեմբերի 21-ին՝ պաշտոնեական կեղծիք կատարելու կասկածանքով: Բաբայանի ձերբակալման մասին լուրից հետո իրավական ոլորտի մի շարք ներկայացուցիչներ բարձրաձայնեցին այն մասին, որ արարքի վրա, որը կատարելու մեջ Բաբայանը կասկածվում է, համաներում է տարածվում: ՀՔԾ-ն այժմ նրան վերագրում է ավելի խիստ արարք, որի վարույթը համաներմամբ կարճման ենթակա չէ:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter