Մեծ Բրիտանիայի հետախուզության շտաբ-բնակարանի թանկարժեք վերանորոգման ժամանակ կապալառուն` երկրի ամենամեծ շինարարական խումբը, կարեւոր փաստաթղթեր է կորցրել, որոնք մանրամասն ներկայացնում են շենքի դասավորությունը: Փաստաթղթերի մի մասն այդպես էլ չի գտնվել։

Լոնդոնում MI6 (Գաղտնի հետախուզական ծառայություն) բրիտանական հետախուզական շտաբում վերանորոգման ժամանակ շինարարները կորցրել են արժեքավոր փաստաթղթեր, որոնք մանրամասն ներկայացնում են շենքի դասավորությունը և դրա անվտանգության համակարգերը: Այս մասին հայտնում են «CNN»-ը և «The Sun»-ը։ 

Նրանց տեղեկություններով` դեպքը տեղի է ունեցել «միլիոնավոր ֆունտ ստերլինգ» արժողությամբ շենքում վերանորոգման աշխատանքների ժամանակ, որում ներգրավվել է «Balfour Beatty» ընկերությունը՝ երկրի ամենամեծ շինարարական խումբը: Փաստաթղթերը պետք է պահվեին հատուկ ապահով սենյակում, որտեղ կարող էին մուտք գործել միայն վերանորոգման մի քանի ղեկավարներ: Այնուամենայնիվ, որոշ փաստաթղթեր պարզապես անհետացել են շենքից:

«Նրանք ցույց տվեցին շենքի դասավորությունը և, մասնավորապես, ազդանշանի և անվտանգության այլ համակարգերի գտնվելու վայրը: Այս փաստաթղթերը ոսկու արժեք ունեին թշնամի գործակալների և ահաբեկիչների համար»,- The Sun-ը մեջբերում է անում անանուն աղբյուրից: CNN- ը պարզաբանում է, որ խոսքն այն փաստաթղթերի մասին է, որոնք պատկանել են կապալառուին, ոչ թե բրիտանական իշխանություններին:

Հետագայում անհետացած փաստաթղթերի մի մասը գտնվել է շենքի ներսում, բայց մնացածն այդպես էլ չի հայտնաբերվել: Սակայն, ըստ The Sun-ի, բրիտանական հետախուզությունը վստահ է, որ տեղեկատվությունը չի հասել թշնամուն:

The Sun-ի պնդմամբ` դեպքից հետո «Balfour Beatty» ընկերության հետ պայմանագիրը դադարեցվել է: Ընկերությունում ու արտասահմանյան գրասենյակում, որում կառուցվածքայնորեն ներառված է MI6-ը, հրաժարվել են մեկնաբանություններ տալուց։

Պատրաստեց Գայանե Հովսեփյանը` ըստ https://www.rbc.ru/-ի

Լուսանկարում` Մեծ Բրիտանիայի Գաղտնի հետախուզական ծառայության շտաբ-բնակարանը (Թոբի Մելվիլ/Ռոյթերս)