«Ես, Արմեն ջան, ականջիդ օղա արա, Հայաստան փող բերող տղա եմ, տանող չեմ: Ալամ աշխարհին մեծ մանրադիտակով չէ, աստղադիտարանով էլ որ նայես, իմ վրա կեղտ չես կարա գտնես: Իսկ ով քաղաքականությունը կեղտ ա համարում, ինքը ընդամենը «պռոստը» կեղտ ա: Եթե իրանք աղբը դարձնում են աղբանոց, դա ուրիշ հարց ա: Քաղաքականությունը ճշգրիտ և ոչ բոլորին հասու է, դա արվեստ ա»,- այսօր՝ լրագրողների հետ հանդիպման ժամանակ, դիմելով «Ժառանգություն» խմբակցության պատգամավոր Արմեն Մարտիրոսյանին, հայտարարեց ՀՀԿ-ական պատգամավոր Վարդան Այվազյանը:

Անդրադառնալով գործարար Սիլվա Համբարձումյանին՝ Վ. Այվազյանը նշեց, որ եթե գործարարն իրեն մեղադրում է պարտք լինելու մեջ, ապա թող նշի հանքավայրի անունն ու տարեթիվը: Այնուհետև ամեն ինչ պարզ կլինի:

«Նա ձեր քենին չի՞»,- հարցրեց լրագրողներից մեկը:

«Քավ լիցի»,- ծիծաղելով պատասխանեց Վ. Այվազյանը:

Վերջինս նշեց, որ չի ցանկանում անդրադառնալ գործարար կնոջ մեղադրանքներին, իսկ իր մայրը միշտ խորհուրդ էր տալիս հեռու մնալ «կանանց շառից»:

«Իրան (Սիլվա Համբարձումյանին - հեղ.) շատ վատ էր զգացել, որ իրա ազգանունը մոռացել էի (Սիլվան ա էլի), «Հակոբյան» էի ասել: Իսկ իրա հետ ծանոթ եմ եղել նախարար լինելուց հետո»,- հավելեց Վ. Այվազյանը: