Առողջապահության ոլորտում թափոնների հետ կապված գործողությունների  ընթացքում մարդու օրգանիզմի վրա վնասակար ու վտանգավոր ազդեցության բացառման նպատակով կան սանիտարական նորմեր ու կանոններ, հիգիենիկ նորմատիվներ: Դրանց պահանջների կատարման նկատմամբ վերահսկողությունը պարտավոր է իրականացնել ՀՀ առողջապահության նախարարությունը:

Ըստ ՀՀ առողջապահության նախարարության տվյալներին, 31.12.2011թ. դրությամբ, լիցենզավորված 2793 առողջապահական կազմակերպություններից «Էկոլոգիա Վ.Կ.Հ.», «Առողջության զարգացման կենտրոն» և «Ջինջէկո» ՍՊԸ-ների հետ թափոնների ոչնչացման, վնասազերծման նպատակով պայմանագրեր են կնքել թվով 330 խոշոր բազմապրոֆիլ և մասնագիտացված հիվանդանոցներ, առողջության կենտրոններ (առողջապահական կազմակերպությունների ընդամենը 12.0%-ը):

Հենց վերոնշյալ ՍՊԸ-ներն է, որ ՀՀ կառավարության որոշումներով վտանգավոր թափոնների վնասազերծման լիցենզիա են ունեցել: Սակայն պետք է նկատի ունենալ, որ հիշյալ 330 հիվանդանոցների և կենտրոնների բժշկական թափոնները կազմում են առողջապահական կազմակերպությունների ընդհանուր թափոնների շուրջ 77.0 տոկոսը: Բնականաբար, հարց է առաջանում, թե մյուսներն ի՞նչ են արել իրենց մոտ առաջացած թափոնները, այդ թվում նաև` վտանգավոր, ինչպես են վարվել դրանց հետ: Ընդգծենք որ սանիտարական կանոնների և նորմերի համաձայն` առողջապահական կազմակերպություններում բժշկական թափոնների մինչև 15%-ը կազմում են վտանգավոր թափոնները:

Ավելին. վտանգավոր թափոնների փոխադրումը «Էկոլոգիա Վ.Կ.Հ.», «Առողջության զարգացման կենտրոն» և «Ջինջէկո» ՍՊԸ-ների կողմից 2009 և 2010 թթ. իրականացվել է առանց համապատասխան լիցենզիաների: Այսպիսով խախտվել է ՀՀ կառավարության 30.01.2003թ. «Հայաստանի Հանրապետությունում վտանգավոր թափոնների վերամշակման, վնասազերծման, պահպանման, փոխադրման և տեղադրման գործունեության լիցենզավորման կարգը հաստատելու մասին» թիվ   121-Ն որոշման` այդ ժամանակահատվածում գործող պահանջը: 

«Թափոնների առաջացման, օգտագործման և հեռացման մասին» տարեկան  վարչական վիճակագրական հաշվետվություններ 2009թ. ներկայացրել են ընդամենը 118, իսկ 2010թ.` 123 կազմակերպություններ և անհատ ձեռնարկատերեր: Ըստ այդմ, 2009 թ. առաջացել են 951.1 տոննա, իսկ  2010 թ.` 979.9 տոննա 3-րդ և 4-րդ դասի վտանգավորության թափոններ:

Վերոնշյալը փաստում է, որ առողջապահական կազմակերպությունների ընդամենը 4.4% են ներկայացրել վարչական վիճակագրական հաշվետվություններ` հակառակ որ դրանց ներկայացումը նախատեսված է ՀՀ կառավարության 07.12.2006թ. «Թափոնների պետական հաշվառման կարգը սահմանելու մասին» թիվ 1739-Ն որոշման պահանջով: Այսինքն` այս վերջին որոշման պահանջը նույնպես խախտվել է: