Հարցազրույց Հայ Առաքելական եկեղեցու Արցախի թեմի առաջնորդ Պարգև արքեպիսկոպոս Մարտիրոսյանի հետ

Սրբազան, ինչպե՞ս եք գնահատում իրավիճակը:

Ամբողջ ճակատով դաժան պատերազմ է ընթանում, խփում են ոչ միայն զորամասերին, խփում են քաղաքին, գյուղերին: Քաղաքացիական զոհեր էլ ունենք՝ երեխա, կին, երիտասարդ տղաներ: Պատերազմ է, լայնածավալ պատերազմ:

Փորձե՞լ եք կապ հաստատել Ձեր միջազգային գործընկերների հետ:

Այսօր ցերեկը հարցազրույց ունեցա, պիտի դիմեն շվեյցարացիներին՝ կաթոլիկ, հավատացյալ, բողոքական, խնդրեցի, որ մեզ համար աղոթք անեն և եթե կարող են իրենց բարոյական ու քաղաքական ձայնը բարձրացնեն, որ մի օր շուտ ավարտվի այս պատերազմը:

Այս պատերազմը կարծես թե մի քիչ տարբերվում է Ապրիլյան քառօրյա պատերազմից, Դուք ի՞նչ կարծիքի եք:

Շատ է տարբերվում, ավելի շատ զինատեսակներ են օգտագործում իրենք ու շատ մեծ քանակով անօդաչու թռչող սարքեր: Դե, պարզ է՝ «Սպայկ», «Սմերչ», «ՏՕՍ», տարբեր տիպի խոշոր տրամաչափի զինատեսակներ: Ամեն ինչ էլ օգտագործում են, և այս անգամ կարծես ավելի ճկուն, ավելի խելացի մոտեցան հարցին: Շատ կետային են աշխատում ճանապարհների վրա, հատուկ կարևոր կետերի վրա: Ավելի լավ են պատրաստված իրենք, և զգացվում է թուրք ինստրուկտորների ձեռքը:

Սրբազան, Ձեր խոսքին հայությունը միշտ սպասում է, ի՞նչ կոչով կդիմեք:

Առաջինը՝ խնդրում եմ բոլորս աղոթք անենք, ամբողջ ազգով աղոթենք՝ խաղաղություն գա, և երկրորդ՝ մեզ պետք է ազգային միաբանություն, պետք է զորավիգ կանգնենք մեր երիտասարդներին, որոնք ապահովում են մեր կյանքն ու անվտանգությունը և քաջ ոգի պահենք: Հուսանք ու հավատանք մեր ներուժին ու հաղթանակին, ուժերը լարենք, որ կարողանանք այս ահռելի ներխուժումը չեզոքացնել: Սա է պահանջվում մեզնից: