Երևանի կենտրոնում գտնվող, բազմաթիվ երկրաշարժերին և սովետական մսաղացին դիմակայած Ս. Աստվածածին (Կաթողիկե) եկեղեցին (13-րդ դ.) այսօր վտանգված է: Այս անգամ խոսքը ոչ թե քանդելու մասին է, այլ պատմական միջավայրի աղճատման:

Նոր նախագծով նախատեսվում է փոքրածավալ Կաթողիկեին կից կառուցել ծավալով տասնապատիկ ավելի մեծ Ս. Աննա եկեղեցին, իսկ մի քանի մետր հեռավորության վրա' եռահարկ կաթողիկոսական երևանյան նստավայրը:

Շինարարական աշխատանքներն արդեն սկսվել են: Թե նոր եկեղեցու, թե նոր նստավայրի դեպքում կիրառվել է բավականին ակտիվ ճարտարապետություն, որը ամբողջովին ճնշում է փոքրածավալ ու զուսպ ճարտարապետությամբ Կաթողիկե եկեղեցին:

Կառուցվող շինություններն իրենց ծավալով ազդում են ոչ միայն Կաթողիկեի, այլև ամբողջ խաչմերուկի ու շրջակա ճարտարապետության վրա:

Պահանջում ենք անհապաղ դադարեցնել ապօրինի շինարարությունը, անցկացնել նախագծերի բաց մրցույթ և տարածքի բարեկարգման ծրագրի վերաբերյալ անցկացնել հասարակական լսումներ:

Հարգանքներով՝
«Հիմա» երիտասարդական նախաձեռնություն