Թիվ 12 ընտրատարածքում մեծամասնական ընտրակարգով առաջադրված «Ժառանգության» ներկայացուցիչ Անահիտ Բախշյանն այսօր լրագրողների հետ հանդիպման ժամանակ նշեց, որ այս քարոզարշավում կան որոշ դրական փոփոխություններ, մասնավորապես՝ հեռուստատեսությունը հավասար լուսաբանում է բոլոր քաղաքական ուժերի գործունեությունը: «Ժառանգությունն» այս ընթացքում ոչ մի կոնֆլիկտային իրավիճակում չի հայտնվել: Սակայն Ա. Բախշյանը գիտի, որ ՀՀԿ-ի կողմնակիցները դռնեդուռ գրանցում են բոլորի անձնական տվյալները: Նրա խոսքերով՝ մինչև հիմա ԲՀԿ-ն գյուղերում պարարտանյութ է բաժանում, իսկ ՕԵԿ-ը՝ մուրաբա:

Այնուհետև Անահիտ Բաշխյանը հայտարարեց, որ ինքը խոշոր դրամական պարգև է խոստանում նրան, ով իրեն կներկայացնի ընտրակաշառք տալու և վերցնելու փաստ՝ լուսանկար, ձայնագրություն, տեսանյութ, որն իր համար հետագայում կծառայի որպես ապացույց:

Ա. Բախշյանը ձայնագողության մեջ մեղադրեց իրենց ընդդիմադիր համարող բոլոր քաղաքական ուժերին՝ ԲՀԿ-ին, ՀՅԴ-ին և ՀԱԿ-ին. «Եթե ԲՀԿ-ն իսկապես ընդդիմադիր ուժ է, ապա պետք է դուրս գա կոալիցիայից»:

«Ես չեմ ասի, թե մենք միակն ենք, բայց իրական ընդդիմադիր քաղաքական ուժը 2007 թ.-ից ԱԺ-ում, կարծում եմ, «Ժառանգությունն» է եղել, որ ինչ գծով մտել է, նույն գծով էլ ավարտում է»,- նշեց Ա. Բախշյանը:

Վերջինս գտնում է, որ այս անգամ հասարակությունն ավելի է հետաքրքրված ընտրություններով, որովհետև այս ընթացքում այն ավելի քաղաքացիական է դարձել:

Ա. Բախշյանը նաև հայտարարեց, որ «Ժառանգությունը» չի մասնակցելու միասնական շտաբի գործունեությանը: Իսկ ՀՀԿ-ի հետ հնարավոր չէ լինի կոալիցիա. «Ժառանգությունը» չի պատրատվում սատարել Սերժ Սարգսյանի թեկնածությունը նախագահական ընտրություններին, քանի որ իրենք ունեն նախագահի իրենց թեկնածուն:

Թիվ 12 ընտարատարածքում առաջադրված Գոհար Վեզիրյանը հարցրեց Ա. Բախշյանին, թե ինչու է նա առաջադրվել հենց 12 ընտրատարածքում, երբ նա Մալաթիա-Սեբաստիայի բնակիչ է, իսկ այնտեղ կարող էր մրցապայքարի մեջ մտնել Սամվել Ալեքսանյանի դեմ: Ա. Բախշյանը պատասխանեց, որ ինքն այնտեղ 8 տարի եղել է դպրոցի տնօրեն, շատ սերմեր ունի ցանած, հետևաբար ունի լուրջ ընտրազանգված:

Գ. Վեզիրյանը հակադարձեց՝ նշելով, թե այդ 8 տարիների փոխարեն ինքն այնտեղ արդեն 30 տարվա բնակիչ է: Նրա խոսքերով՝ իր թիմն այսօր աշխատում է շատ կազմակերպված, իսկ իր «տնետուն ծրագիրը» գործում է շատ արդյունավետ:

Գոհար Վեզիրյանը համոզված է, որ իշխանությունները թիվ 12 ընտարատարածքում իրեն են համարում լուրջ թեկնածու, և այդ է պատճառը, որ այսօր հենց իր պաստառներն են պոկում: Իսկ դա նպատակ ունի շեղել իր ուշադրությունը:

«Շատ կարևորում է իշխանությունը Գոհար Վեզիրյանին»,- հեգնանքով ասաց Ա. Բախշյանը:

«Նախանձո՞ւմ եք»,- ծիծաղելով հարցրեց Գ. Վեզիրյանը:  

Ա. Բախշյանը նշեց, որ այժմ շատ բան չի ասում, ամեն ինչ պարզ կլինի մայիսի 7-ին, երբ ինքն ու Գ. Վեզիրյանը կրկին կհանդիպեն՝ քննարկելու ընտրությունների արդյունքները:

Գ. Վեզիրյանն էլ պատասխանեց, որ այդ օրն ինքը չի կարող, զբաղված է լինելու, քանի որ տոնելու է իր հաղթանակը: