Գյումրիի քաղաքապետի որդու՝ Սպարտակ Ղուկասյանի՝ «Կենտրոն» հեռուստաընկերության աշխատակազմի եւ նրանց տեխնիկայի նկատմամբ դրսեւորած բռնարարքի մասին լրացուցիչ տեղեկություններ խնդրեցինք «Բարգավաճ Հայաստան» կուսակցության Շիրակի մարզային կառույցի լրատվության պատասխանատու Աղասի Աբրահամյանից: Վերջինիս փոխանցմամբ՝ լրագրողի եւ օպերատորի աշխատանքը խոչընդոտվել է ոչ միայն 6-րդ դպրոցում, այլեւ թիվ 5 երաժշտական դպրոցում, բժշկական քոլեջում եւ թիվ 1 դպրոցում:

«Ընտրությունների հետ կապված՝ հոր ու որդու մոտ միշտ սրացումներ են լինում, երեւի ներվերը չեն դիմանում, չգիտեմ, կամ գուցե ապացուցելու բան ունեն,- ասում է Աղասի Աբրահամյանը,- երկու տեսախցիկ են կոտրել, մյուս երկուսն էլ վնասել են, խոչընդոտել են լրագրողի աշխատանքին: Էս պահին մեր ունեցած տեղեկություններով՝ ինչ-որ նյութեր են նախապատրաստվում ոստիկանությունում, բայց հետեւելով մարզի ոստիկանության պետ Կարեն Բաբակեխյանի գործողություններին՝ մի փոքր կասկածում ենք, որ քրեական գործ կհարուցվի»: Վերջինս հերքում է կամերաները ջարդելու փաստը:

Ըստ Աղասի Աբրահամյանի՝ այս շոուն ավելի շուտ արջի ծառայություն կմատուցի թե ՀՀԿ-ին, թե անձամբ պատգամավորության թեկնածու Արման Սահակյանին: