Խորհրդարանական այս ընտրություններն անցածից տարբերվեցին բռնությունների չնչին քանակությամբ, զանգվածային լցոնումների քանակը նույնպես նվազագույնի էր հասցված, Ընտրական օրենսգիրքը գրեթե ամբողջությամբ բարեփոխման էր ենթարկվել, սակայն «բարեփոխման» էին ենթարկվել նաև ընտրախախտումներ և ընտրակեղծիքներ իրականացնելու տեխնոլոգիաները:

«Ճիշտ է՝ լցոնումներ որպես այդպիսիք չկային, բայց կար ավելի սարսափելի մի բան՝ «մարդկային լցոնումներ», «կլոնավորված մարդկանց քվեարկություն»,- այսպես է ամփոփում քվեարկության օրվա արդյունքները Հայաստանի հելսինկյան կոմիտեի նախագահ Ավետիք իշխանյանը:

Իրավապաշտպանը ասուլիսի ժամանակ ներկայացրեց այն հիմնական ընտրախախտումները և քվեարկության օրը տեղ գտած բացթողումները, որոնք արձանագրել է Արաբկիր համայնքի թիվ 4 ընտրատեղամասում իրենց կազմակերպությունը ներկայացնող դիտորդական խումբը.

• Քվեարկության պահին ընտրողի անձնագրում դրոշմվող կնիքի արագ՝ նախատեսված 12 ժամից շուտ անհետացում:

• Դիտորդների և վստահված անձերի մոտ համապատասխան վկայականների բացակայություն:

• Բաց քվեարկության բազմաթիվ դեպքեր:

• Մեծ քանակությամբ կողմնակի անձանց առկայություն ընտրատեղամասերում:

• Ընտրական հանձնաժողովի անդամների շրջանում մասնագիտական ցածր պատրաստվածություն, ինչի հետևանքով քվեաթերթիկների հաշվարկման գործընթացը որոշ տեղամասերում ավարտվում էր նախատեսված ժամից մի քանի ժամ ուշ՝ ձգվելով մինչև առավոտյան ժամը 7-8-ը:

• Հաշվարկման ժամանակ դատարկ ծրարների առկայություն, ինչը կարող է հայտնի «կարուսել» ընտրակեղծիքի վկայությունը լինել:

Իշխանյանի դիտարկմամբ՝ համեմատաբար «քաղաքակիրթ» ընտրությունների անցկացման ավանդույթները պահպանվել են Երևանում՝ Կենտրոն, Արաբկիր համայնքներում, և Վանաձորում: Իսկ մնացած վայրերում, հատկապես շրջաններում, ընտրության խստությունը հարաբերական է եղել տեղի «ֆեոդալի» խստությանը:

Իսկ թե ինչու է իրենց խումբը դիտորդական առաքելություն իրականացրել հենց թիվ 4 ընտրատեղամասում, Իշխանյանն ասաց, որ պատճառներից մեկը ներքին պայմանավորվածությունն էր այլ կազմակերպությունների հետ՝ տեղամասերում միմյանց չծածկելու, բացի այդ՝ սպասվում էր, որ թեժ պայքար է ընթանալու, քանի որ այդ տեղամասում էին առաջադրված երեք հայտնի հասարակական և քաղաքական գործիչներ՝ «168 ժամ» թերթի խմբագիր Սաթիկ Սեյրանյանը, Արամ Մանուկյանը «ՀՀՇ»-ից և «Ժառանգության» ներկայացուցիչ Զարուհի Փոստանջյանը: Սակայն հաղթեց մեկը, ով գործնականում ընդհանրապես «չէր խոսում»` «ՀՀԿ»-ն ներկայացնող Արտակ Սարգսյանը: