Երևան քաղաքի ընդհանուր իրավասության դատարանը, նախագահությամբ դատավոր Արուսյակ Ալեքսանյանի, քիչ առաջ որոշեց գրավով ազատ արձակել «Ազատագրում» շարժման ղեկավար, բլոգեր Միքայել Բադալյանին, ով մեղադրվում է ահաբեկչության մասին սուտ հաղորդում տալու մեջ: Բադալյանի պաշտպաններից Էրիկ Ալեքսանյանը մեզ հետ զրույցում ասաց, որ դատարանը գրավի չափ է սահմանել 6 մլն դրամը:

Նշենք, որ Միքայել Բադալյանի պաշտաններ Էրիկ Ալեքսանյանն ու Ժիրայր Ղարագյոզյանը այսօր ավելի վաղ հայտնել էին, որ Բադալյանի առողջական վիճակը կտրուկ վատթարացել է, նրա մոտ ներքին արունահոսություն է սկսվել, նախաինսուլտային վիճակ, տեղափոխվել է Հանրապետական հիվանդանոց: Պայմանավորված Բադալյանի առողջական վիճակով՝ պաշտպանները միջնորդություն էին ներկայացրել՝ Բադալյանին կալանքից անհապաղ ազատ արձակելու վերաբերյալ, որը այսօր մակագրվել էր դատավոր Արուսյակ Ալեքսանյանին: Խափանման միջոցի հարցի քննությունը սկսվել էր այսօր, ժամը 22:00-ին:

Հիշեցնենք, որ քրեական գործը վերաբերում է ապրիլի 11-ին Բադալյանի տելեգրամյան ալիքով տարածված մի գրառման, որում վերջինս նշում է, թե արտակարգ իրավիճակ ստեղծելու համար ահաբեկչություններ են հնարավոր Հայաստանի տարածքում։  Գրառմամբ ասվում է, որ  ՀՀ վարչապետ Նիկոլ Փաշինյանը «փորձում է խափանել ապրիլի 19-ին Մոսկվա ուղևորությունը»։

Ըստ բլոգերի՝ Փաշինյանը դա ուզում է անել Հայաստանում արտակարգ իրավիճակ ստեղծելով, որի համար «կօգտագործվի ահաբեկչական «Սասնա Ծռեր» կազմակերպությունը, որը միգուցե Հայաստանի տարբեր հատվածներում ահաբեկչական գործողություններ կատարի»։