Տեսանյութեր
Լուսանկարներ
Բժշկական արտադրատեսակների ներմուծումն այսուհետ կվերահսկվի. նախագիծ
Առողջապահության նախարարությունն առաջակում է «Հայաստանի Հանրապետության տարածք բժշկական արտադրատեսակների ներմուծման կարգը և անհրաժեշտ փաստաթղթերի ցանկը սահմանելու մասին» կառավարության որոշման նախագիծ՝ հստակեցնելու բժշկական արտադրատեսակների՝ Հայաստան ներմուծելու կանոնները: Նախագիծը մշակել է ԱՆ «Ակադեմիկոս Էմիլ Գաբրիելյանի անվան դեղերի և բժշկական տեխնոլոգիաների փորձագիտական կենտրոնը»։
Մինչ օրս Հայաստանում բժշկական արտադրատեսակների շրջանառության կարգավորում, ինչպես նաև՝ բժշկական արտադրատեսակների ներմուծման հսկողություն չի իրականացվել և այժմ էլ չի իրականացվում:
Պատճառը, ըստ Առողջապահության նախարարության, «Բնակչության բժշկական օգնության և սպասարկման մասին» օրենքում բժշկական արտադրատեսակների շրջանառության կարգավորման պահանջների ամբողջականության և եղած դրույթների կիրառումն ապահովող ենթաօրենսդրական ակտերի բացակայությունն էր:
Ըստ ԱՆ-ի՝ բժշկական արտադրատեսակներին վերաբերող պահանջների կատարման համար անհրաժեշտ է ընդունել այս որոշումը, որը կլինի Հայաստանում բժշկական արտադրատեսակների շրջանառության պետական կարգավորման հիմնական և կարևորագույն փաստաթղթերից մեկը, առանց որի հնարավոր չի լինի ամբողջությամբ հսկել բժշկական արտադրատեսակների շրջանառությունը։
«Որոշման նախագիծը պարունակում է հիմնաքարային դրույթներ Հայաստանի Հանրապետության տարածք բժշկական արտադրատեսակների ներմուծման վերաբերյալ ընդհանուր պահանջների, անհրաժեշտ ընթացակարգերի և մի շարք այլ հարցերի վերաբերյա»,-նշված է նախագծի հիմավորման մեջ։
Նախագծի ընդունմամբ կստեղծվեն իրավական հիմքեր Հայաստանում բժշկական արտադրատեսակների շրջանառության պետական կարգավորման համար, մասնավորապես՝ բժշկական արտադրատեսակների ներմուծման նկատմամբ հսկողություն իրականացնելու համար:
Մեկնաբանել