Այս «պատկերասրահով» օրական անցնում է 2000-ից ավելի մարդ, հանդիսատեսը գալիս և գնում է աշխարհի տարբեր ծայրերից։ Այն բաց է շուրջօրյա՝ շաբաթական 7 օր։

Ցուցասրահը «Զվարթնոց» միջազգային օդանավակայանն է, իսկ կտավի վրա գրիչով նշումներ անողը՝ դրանց հեղինակ, օդանավակայանում հերթական ցուցադրության գեղանկարիչ Արմեն Զաքարյանը. կտավների մակագրությունն է թարմացնում։

Արդեն հինգերորդ օրն է, ինչ նրա գործերը ցուցադրվում են օդանավակայանի մեկնումների սրահում։

«Շատ արտասովոր, հետաքրքիր է այս ցուցադրությունը. փաստորեն, իմ նկարներով դիմավորելու և ճանապարհելու եմ մարդկանց երկրի գլխավոր մուտքում»,- ասում է նկարիչը։

Արմենը 34 տարեկան է, Գեղարվեստի պետական ակադեմիան ավարտելուց հետո դասավանդել է ակադեմիայում և տարբեր ստուդիաներում։

2019թ․-ից Հայաստանի նկարիչների միության անդամ է։ Ցուցադրվել է տարբեր ցուցահանդեսներում թե' Հայաստանում, և թե' արտերկրում։

Արմենի բազմաշերտ գույներով նկարները օդանավակայանի անցորդներին պատմում են Հայաստանի բնաշխարհի, վերնակուլյար (առանց ճարտարապետի» ձևավորված միջավայրեր) ճարտարապետության, լեռնաշղթայի ֆոնին հայ կամավորի, խրամուղում ցրտին դիրքերը բարձրացող սերժանտի մասին.

Արմեն Զաքարյան

««Սերժանտը» կտավը պատկերված է տաք երանգներով, բայց ցույց է տալիս սառը մթնոլորտ։ Յուղաներկի հաստ շերտերով պատկերել եմ ձյան սպիտակ շերտերը։ Կիսախավարի մեջ, ցրտին դիրքապահ սերժանտը թիկունքից է պատկերված, անձնավորված չէ, բայց ինչ-որ առումով այն նաև ես եմ. ինքնս էլ սերժանտ եմ եղել ծառայության ժամանակ»,- պատմում է Արմեն Զաքարյանը։

Ցուցասրահի այս ձևաչափը «Զվարթնոց» օդանավակայանում գործում է 2016թ․-ից,  «ArtAm» ժամանակակից արվեստի ցուցասրահն է, որը նկարիչներին և լուսանկարիչներին հնարավորություն է տալիս անվճար ցուցադրել 26 նկար մեկնման և VIP սրահներում՝ մեկ ամիս ժամանակով։

Մասնակցելու համար նկարիչները պետք է նախօրոք հերթագրվեն «ArtAm Gallery» հարթակում։

Նախագիծն ուղղված է հայ արվեստագետների և հայկական մշակույթի տարածմանն ու զարգացմանը:

Օդանավակայանում ցուցահանդեսի համադրողը Արմինե Թումանյանն է, նա վստահ է, որ «արվեստը կարելի է ցուցադրել ամենուրեք, որտեղ կա տարածք և հանդիսատես»։

Արման Զաքարյանի աշխատանքները «Զավարթնոց» օդանավակայանում կարելի է տեսնել մինչև մարտի 13-ը։