Հոկտեմբերի 12-ին՝ կեսգիշերվա սահմաններում, տեղի է ունեցել «Հարավկովկասյան երկաթուղի» ընկերության բեռնատար շարժակազմի անկում: Զոհեր չկան: Այս մասին հայտնում են ընկերության լրատվական ծառայությունից։ 

36 վագոնից բաղկացած գնացքը մասնակի բեռնված է եղել ցեմենտի արտադրության համար նախատեսված հումքով, ինչպես նաև՝ ուներ դատարկ վագոններ: 

«Բացի շարժակազմից, վնասվել է նաև երկաթուղային գիծը: Ներկայում ընկերությունը կատարում է վթարավերականգնողական աշխատանքներ: Տվյալ հատվածով երթևեկությունը ժամանակավորապես դադարեցվել է, ինչի կապակցությամբ չեղարկվել են Երևան-Գյումրի-Երևան մերձքաղաքային ուղևորագնացքները, ինչպես նաև Երևան-Թբիլիսի-Երևան միջազգային երթուղին: 

Անկման պատճառները պարզվում են: ՀԿԵ-ն հայցում է ուղևորների և ընկերության գործընկերների ներողամտությունը պատճառած անհարմարությունների համար»,- ասված է ընկերության մամուլի հաղորդագրության մեջ:

Լուսանկարները «Հետքին» են տրամադրել վթարի ականատեսները։