Տնտեսագետ, շուկայագետ Յուրի Մինասյանը դաժան ծեծի է ենթարկվել Երևան քաղաքի Պուշկինի փողոցի հարևանությամբ գտնվող «Բիթլզ» ակումբի բակում և գիտակցության չգալով՝ 8 օր անց՝ մարտի 14-ին, մահացել է։

Դեպքը տեղի է ունեցել 2024թ․ մարտի 6-ին՝ ժամը 01։30-ի սահմաններում։ «Բիթլզ» ակումբից մի խումբ մարդիկ, այդ թվում Յու․ Մինասյանը, դուրս են եկել բակային հատված, որտեղ սկսվել է վիճաբանություն։ Ծեծկռտուքի ընթացքում Յուրի Մինասյանը գլխի շրջանում ստացել է բազմաթիվ վնասվածքներ և գիտակցության չգալով՝ մարտի 14-ին մահացել է։

Գլխավոր դատախազությունից «Հետք»-ին փոխանցեցին, որ հարուցվել է քրեական հետապնդում՝ Քրեական օրենսգրքի 166-րդ հոդվածի 2-րդ մասի 10-րդ և 15-րդ կետերով (մեկ ուրիշին մարմնական վնասվածք պատճառելը կամ նրա առողջությանն այլ վնաս պատճառելը, որը կատարվել է խուլիգանական դրդումներով` անզգուշությամբ առաջացնելով հանցագործությունից տուժած անձի մահ)։

Դատախազության փոխանցմամբ՝ հայտարարվել է հետախուզում։ Քննչական կոմիտեից էլ փոխանցում են, որ հետախուզվողը Հ․Մ-ն է։

Լուսանկարը՝ Յուրի Մինասյանի ֆեյսբուքյան էջից