Ազգային-ժողովրդավարական Բևեռի մամուլի ծառայությունը հայտարարություն է տարածել Քննչական կոմիտեի հաղորդագրության վերաբերյալ՝ ըստ որի խուզարկություն է իրականացվել Ազգային-ժողովրդավարական Բևեռի գրասենյակ ծառայող տարածքում։ Այն ներկայացնում ենք ստորև․

«Սույն թվականի մարտի 26-ին Քննչական կոմիտեն հայտարարություն է տարածել, որտեղ նշվում է, որ խուզարկություն է իրականացվել Ազգային-ժողովրդավարական Բևեռ կազմակերպության գրասենյակ ծառայող տարածքում, որի արդյունքում հայտնաբերվել են 2 մարտական նռնակ և քննության համար հետաքրքրություն ներկայացնող բազմաթիվ փաստաթղթեր և առարկաներ։

• ՔԿ. ոստիկանության Նոր Նորքի բաժնում ահաբեկչության դեպքով 3 անձի նկատմամբ քրեական հետապնդում հարուցելու միջնորդություն է ներկայացվել

Այս տեղեկատվությունը տարածվել է նաև հայաստանյան ԶԼՄ-ներում (հիմնականում իշխանական):

Լիազորված ենք պարզաբանում տալ, որ Ազգային-ժողովրդավարական Բևեռի գրասենյակ ծառայող որևէ տարածքում խուզարկություն չի արվել, ուստի որևէ զենք-զինամթերք և քննության համար հետաքրքրություն ներկայացնող բազմաթիվ փաստաթղթեր ու առարկաներ չէին կարող հայտնաբերվել։

Այս ապատեղեկատվությունը հերյուրանք է, որը նպատակ է հետապնդում Հայաստանի համար ճակատագրական իրադարձություններից առաջ քաղաքական ասպարեզից հեռացնելու Ազգային-ժողովրդավարական Բևեռին՝ քաղաքական ուժին հրեշացնելու ճանապարհով»,- ասված է հայտարարության մեջ։

Լուսանկարը՝ Ազգային-ժողովրդավարական Բևեռի ֆեյսբուքյան էջից