Ներքին գործերի նախարարության ներքին անվտանգության և հակակոռուպցիոն վարչությունում նշանակվել է ծառայողական քննություն՝ ձերբակալված Սամվել Վարդանյանին՝ ձերբակալվածների պահման վայր տեղափոխելու ճանապարհին դիմակավորված անձանց կողմից ծեծի ենթարկելու մասին հայտարարության հիման վրա: Այս մասին «Հետքին» փոխանցեց ՆԳՆ մամուլի խոսնակ Նարեկ Սարգսյանը:

• Դիմակավորված անձինք ձերբակալվածին ավտոմեքենայից քարշ են տվել խոտերի մեջ, գլուխը հարվածել գետնին, հայհոյել ու իջեցրել տաբատը

Հիշեցնենք, որ այսօր մամուլի ասուլիս էին հրավիրել փաստաբաններ Ռուբեն Մելիքյանն ու Վարազդան Հարությունյանը՝ հայտնելով, որ երեկ Ազգային ժողովի «Քաղաքացիական պայմանագիր» խմբակցության պատգամավոր Հակոբ Ասլանյանի հետ երթուղային ավտոմեքենայում վիճաբանության մեջ մտած Սամվել Վարդանյանին քննչական վարչությունից ձերբակալվածների պահման վայր տեղափոխելու ճանապարհին բռնության են ենթարկել: Վարչության շենքից 1-2 րոպե հեռանալուց հետո, ճանապարհին ուղեկցող երկու ոստիկանի մոտ միաժամանակ բնական կարիքները հոգալու անհրաժեշտություն է առաջացել և Սամվելին թողել են ավտոմեքենայի մեջ ու գնացել: Դիմակավորված անձինք մոտեցել են, ձեռնաշղթաներով կապված Սամվելին դուրս հանել ավտոմեքենայից և ծեծի ենթարկել՝ պատճառելով մարմնական վնասվածքներ: Դեպքի մասին նրա փաստաբաններն իմացել են պատահմամբ, երբ այսօր ԱԺ պատգամավորները տեսակցության են գնացել Սամվելին, և վերջինս մանրամասներ է փոխանցել:

Սամվել Վարդանյանի փաստաբան Ռուբեն Մելիքյանն ասաց, որ ծառայողական քննությունն ունի զրոյական արդյունավետություն: Ըստ փաստաբանի՝ ոչ թե ծառայողական քննություն պետք է նշանակվեր, այլ նախաձեռնվեր քրեակն վարույթ: