Մայիսի 30-ին «Ճանաչիր քո երկիրը» երիտասարդական նախաձեռնությունն ահազանգել էր «Խոսրովի անտառ» պետական արգելոցի տարածքում գտնվող Հավուց Թառի վանական համալիրի (10-րդ դար), Աղջոց վանքի (13-րդ դար) և Կաքավաբերդ ամրոցի (9-րդ դար) ուխտավորներից գումար գանձելու փաստի մասին:

«Խոսրովի անտառ» պետական արգելոցի տնօրեն Վորոնցով Բարսեղյանը մամուլի միջոցով պարզաբանումներ է տվել, սակայն դա ոչ միայն չի փարատել «Ճանաչիր քո երկիրի» մտահոգությունը, այլև առաջ է բերել նոր հարցեր:

«Այսօր եթե եկեղեցի ես գնում, չե՞ս վճարում: Մայր Աթոռ ես գնում, 1000 դրամ վճարում ես. ինչո՞ւ այս կոթողները այցելելու համար չպետք է վճարել»,- հայտարարել էր Վորոնցով Բարսեղյանը' առանց մանրամասնելու, թե Մայր Աթոռի կոնկրետ ո՞ր հատվածում են իրենից պահանջում վճարել 1000 դրամ:

Վորոնցով Բարսեղյանը նաև հայտարարել է, որ Խոսրովի արգելոցի տարածքում գտնվող եկեղեցիները, ինչպես Հավուց Թառը կամ Աղջոց վանքը, Հայ առաքելական եկեղեցում գրանցված չեն և գտնվում են արգելոցի տնօրինության ներքո:

«Փաստացի, այս խոսքերի տրամաբանությունը հետևյալն է. մենք ենք տնօրինում սրբատեղիները, ինչ կուզենք կանենք: Միևնույն ժամանակ Բարսեղյանը չի մեկնաբանել, թե ուխտավորի համար ի՞նչ նշանակություն ունի սրբատեղիի իրավական կարգավիճակը»,- հայտնում է երիտասարդական նախաձեռնությունը:

Այն Խոսրովի անտառի տնօրենի հայտարարությունները դիտարկում է որպես արգելոցի վարած ապազգային քաղաքականության արդարացման փորձ և Հայ Առաքելական եկեղեցու հնագույն կոթողների' հայերի կողմից ճանաչմանն ուղղված խոչընդոտ:

«Եվս մեկ անգամ կոչ ենք անում Ամենայն Հայոց Կաթողիկոս Գարեգին Բ-ին, մշակույթի նախարար Հասմիկ Պողոսյանին և բնապահպանության նախարար Արամ Հարությունյանին ձեռնարկել համապատասխան միջոցներ»,- հայտարարում է «Ճանաչիր քո երկիրը»: