Դատախազը «մայր կավատի» համար պահանջեց 14 տարվա ազատազրկում
Դուբայում եւ մարմնավաճառների շրջանում հայտնի կավատ Անուշ Մարտիրոսյանի գործի քննությունը տեղափոխվել է Կենտրոն եւ Նորք-Մարաշ համայնքների առաջին ատյանի դատարան` Երեւանի քրեական դատարանի լուծարման պատճառով: Հիշեցնենք, որ այս գործի շրջանակներում Անուշի հետ դատվում են նաեւ նրա հարազատ քույրերը` Սոֆյա Մարտիրոսյանը եւ Սոնյա Գաբրիելյանը, ինչպես նաեւ Մարիամ Մարտիկյանը:
Փետրվարի 24-ի նիստում դատարանը լսեց ամբաստանյալներ Սոնյա Գաբրիելյանին եւ Մարիամ Մարտիկյանին: Վերջինս հրաժարվեց իր նախաքննական ցուցմունքից, որում նշել է, որ թեւեւ գիտակցել է, որ Նորան եւ Միլենան (վերջինիս անունը փոխված է, նա Անուշի հերթական զոհերից է եւ այս գործով տուժող ճանաչված անձերից մեկը) Էմիրություններում պետք է շահագործվեն, սակայն Գայանե Ղալթախչյանին միջնորդել է նրանց համար հրավերք ուղարկել եւ ֆինանսավորել Դուբայ տեղափոխվելու ծախսերը:
«Էդ ցուցմունքները ճիշտ չեն, որովհետեւ ճիշտն ասել եմ, բայց քննիչ Հովհաննես Գեւորգյանը չի ընդունել իմ ճիշտը»,- դատարանում հայտարարեց Մարիամ Մարտիկյանը:
Դատավոր Եվա Դարբինյանը նկատեց. «Բայց Ձեր ցուցմունքներում ասվածը պնդել եք նաեւ Անուշ Մարտիրոսյանի հետ առերես հարցաքննության ժամանակ: Ի՞նչ է, քննիչը նորից ստիպել է ճիշտը չգրե՞լ»:
«Չէ, չէր ստիպում, բայց դե… Քննիչն է ինձ հուշել… »,- պատասխանեց Մարիամը:
Ի տարբերություն մյուս ամբաստանյալների` Սոնյա Գաբրիելյանը լիովին ընդունեց իրեն առաջադրված մեղադրանքը եւ դատարանում ցուցմունք տալուց հրաժարվեց: Նա մեղադրվում է «Պոռնկությամբ զբաղվելուն նպաստելու» եւ «Սուտ ցուցմունք տալու համար կաշառելու» մեջ: Հիշեցնենք, որ Սոնյան 1500 ԱՄՆ դոլար կաշառք էր տվել Միլենային, որպեսզի նա հետ վերցնի Անուշի դեմ տված ցուցմունքները:
Դատարանը հրապարակեց նախաքննության ընթացքում Սոնյա Գաբրիելյանի տված ցուցմունքը: Երբ դատավորն ընթերցում էր այն, Անուշն անեծք խորհրդանշող ձեռքի շարժումն ուղղում էր քրոջ` Սոնյայի ուղղությամբ եւ բողոքում. «Դրանցից (տուժողներից) բեթար բաներ ես գրել»: Իսկ այդ ցուցմունքում Սոնյան խոստովանել էր, որ Անուշը Դուբայում զբաղվել է կավատությամբ, եւ ինքը այս կամ այն կերպ հանդես է եկել օժանդակողի դերում: Ի վերջո, պաշտպանների հարցադրումներին ի պատասխան` Սոնյան նշեց, թե դրանք սխալ է գրել եւ իրեն մեղավոր է ճանաչում միայն կաշառք տալու համար:
Գործում եղած բոլոր ապացույցները հետազոտելուց հետո դատարանն անցավ վիճաբանությունների ունկնդրմանը: Սակայն հաջորդ` մարտի 11-ի նիստին պաշտպան Մկրտիչ Վասակյանը միջնորդեց դատաքննությունը վերսկսել. «Քանի որ մեղադրանք է առաջադրվել կազմակերպված խմբին, միջնորդում եմ այդ խմբի անդամներ Գայանե Ղալթախչյանին, Մարիետա Մուրադյանին, ոմն Գագոյին եւ Ապերին կանչել դատարան եւ հարցաքննել»,- ասաց պաշտպանը:
Մեղադրող Արթուր Դավթյանն առարկեց` հայտնելով, որ նշված անձինք գործում ներգրավված են որպես մեղադրյալներ, նրանց մի մասը գտնվում է հետախուզման մեջ, իսկ մյուս մասի ինքնությունը դեռեւս պարզված չէ. «Այդ ուղղությամբ քրեական գործից անջատված մասով իրականացվում է քննություն»,- տեղեկացրեց Ա. Դավթյանը:
Դատարանը միջնորդությունը մերժեց, եւ դատախազ Արթուր Դավթյանը հրապարակեց մեղադրական ճառը, որում մասնավորապես նշված էր. « …Իր հանցավոր գործունեությունն արդյունավետ կազմակերպելու նպատակով Անուշ Մարտիրոսյանը Դուբայում բնակվող Գայանե Ղալթախչյանի, Մարիետա Մուրադյանի, գործով անձը չպարզված ոմն Սյուզանի, Հայաստանում բնակվող Նորա Ստեփանյանի, քրոջ` Սոֆյա Մարտիրոսյանի, գործով անձը չպարզված ոմն Անոյի, Կառայի, մոսկվաբնակ գործով անձը չպարզված ոմն Գագոյի, Արտակի, Ապերի եւ Արոյի հետ, նախնական համաձայնությամբ միավորվելով, ստեղծել է կազմակերպված հանցավոր խումբ: Ընդ որում` խմբի անդամներն ունեցել են հստակ դերաբաշխում. նրանցից ոմանք, գտնվելով Հայաստանում, հավաքագրել են աղջիկներին եւ ճանապարհել Մոսկվա` հստակ իմանալով, որ այնտեղ գտնվող խմբի անդամները կիրականացնեն նրանց տեղափոխումը Դուբայ: Իսկ Մոսկվայում գտնվողները, դարձյալ Անուշ Մարտիրոսյանի հետ համագործակցված, դիմավորել են աղջիկներին եւ ապահովել նրանց տեղափոխումը Դուբայ: Հանցավոր խմբի մյուս անդամները, այդ թվում` Անուշ Մարտիրոսյանը, արդեն Դուբայ քաղաքում դիմավորել են աղջիկներին եւ ներգրավել սեռական շահագործման մեջ: Կազմակերպված հանցավոր խմբի յուրաքանչյուր անդամ աղջիկների շահագործումից առաջացած շահույթներից ստացել է իր բաժինը` հանցագործությանն իր ներգրավվածությանը համապատասխան»:
Մեղադրողը դատարանին միջնորդեց Սոնյա Գաբրիելյանին դատապարտել 1 տարի 1 ամսվա, Սոֆյա Մարտիրոսյանին եւ Մարիամ Մարտիկյանին` 6- ական տարվա, իսկ Անուշ Մարտիրոսյանին, հաշվի առնելով հանցագործությունների կատարման մեջ նրա առավել ակտիվ դերակատարությունը, 14 տարվա ազատազրկման:
«Է, ըտենց լավ չի. 20 տարի տայիք, վաբշե գնդակահարություն ուզեիք»,- բորբոքված ասաց Անուշ Մարտիրոսյանը: Այնուհետեւ, նայելով մեր ուղղությամբ, ավելացրեց. «Թերթում կգրեք, որ ինքը (նկատի ուներ մեղադրող Արթուր Դավթյանին) մեղավոր չի, իրան ինչ ասել են, էդ ա անում: Էս ամբողջը դատախազությունն ա սարքել, որովհետեւ 2 միլիոն գրանտ ա վերցրել ու հիմա պիտի ցուցանիշ ապահովի»:
Ամբաստանյալների փաստաբանները դատարանին միջնորդեցին նիստը հետաձգել: «Իհարկե, մենք պատրաստ էինք ճառին, բայց մեղադրողի նման ճառից հետո դրանում փոփոխություններ կատարելու անհրաժեշտություն առաջացավ: Խնդրում ենք ժամանակ տրամադրել ամբաստանյալների հետ խորհրդակցելու եւ պաշտպանական ճառը ներկայացնելու համար»,- պարզաբանեց փաստաբան Ռուբիկ Մովսիսյանը:
Դատավարությունը կշարունակվի մարտի 18-ին:
Մեկնաբանել