«Վերջին 10 տարվա ընթացքում ՀՀ-ում դեղորայքի մաքուր գնումներ չեն իրականացվել»,- հայտարարեց  դեղերի ներկրմամբ և իրացմամբ զբաղվող «Սզնի» ընկերության ղեկավար Գառնիկ Սահակյանը:

Ըստ գործարարի` երբ դեռ չկար ՀՀ պետգնումների գործակալությունը, և չէր «բարեփոխվել» գնումների մասին օրենքը, մրցակցային դաշտ գոյություն ուներ դեղորայքի շուկայում: Նա նշեց, որ այժմ այդ ոլորտում մենաշնորհ է տիրում. «Նատալի Ֆարմ» ընկերությունն օրեցօր ծաղկում է ապրում, արդյունքում սնանկանում են բազմաթիվ դեղատներ և դեղորայք ներկրող կազմակերպություններ:

«100-ից ավելի բուժհաստատությունների համար դեղորայք է պատվիրվում առանց մրցույթների, ինչը օրենքի պարտադիր պահանջ է: Կամ կազմակերպվում են մրցույթներ, բայց այդ մասին նախնական տեղեկատվություն է տարածվում անհայտ լրատվամիջոցներում: Դեղորայքի ներկրմամբ և իրացմամբ զբաղվող ընկերությունների հանդեպ իրականացվում է դեմպինգային քաղաքականություն: Գնումների մասին օրենքն ընդունվել է, որպեսզի գնումներ չիրականացվի»,- ասաց Գ. Սահակյանը:

Գ. Սահակյանը հավաստիացնում է, որ իր առաջարկած դեղորայքը անհամեմատ էժան է, սակայն բուժհաստատությունները ձեռք են բերում մենաշնորհային քաղաքականությամբ աշխատող ընկերությունների դեղորայքը, իսկ «Նատալի ֆարմ»-ին ընդամենը 50 միլիոն դրամով տուգանելը ցուցադրական բնույթ է կրում, երբ այդ ՍՊԸ-ն շուրջ 3 միլիարդ 450 միլիոն դրամի օգուտ է ունեցել առանց մրցույթի դեղ վաճառելով:

«Սզնի» սպը-ի ղեկավարը նշում է, որ իր ղեկավարած ընկերությունը, որը շուկայում է 1993 թվականից և այս տարիների ընթացքում եղել է բարեխիղճ հարկատու, այժմ հայտնվել է սնանկացման եզրին: