«Հետքի» հարցրեին պատասխանել է «Ջավախք» ժողովրդական շարժման առաջնորդ, «Վրացական երազանք» դաշինքի մեծամասնական ցուցակով Ախալքալաքում առաջադրված թեկնածու Նորիկ Կարապետյանը 

Պրն Կարապետյան, ինչպե՞ս կգնահատեք հոկտեմբերի 1-ին կայացած խորհրդարանական ընտրությունները թե' ողջ Վրաստանի տարածքում, թե' Ախալքալաքում: 

Ընդհանուր առմամբ Վրաստանի որոշ տեղերում ընտրությունները նորմալ ընթացան, ենթադրենք` Թբիլիսիում, նորմալ ընտրություններ են եղել, և ժողովուրդը իր ձայնը հնարավորություն ունեցավ պաշտպանել: Իսկ որոշ տեղերում ժողովուրդն ուզում էր պաշտպաներ, բայց հնարավորություն չեղավ, որովհետև ոստիկանությունից, անվտանգության ծառայությունից, ադմինիստրատիվ լրիվ օրգաններից սկսեցին ճնշումներ գործադրել, որպեսզի ձայներն իրենք կարողանան կեղծել: Մեր մոտ ընտրությունները 95 տոկոսով կեղծվեցին: 

95 տոկոս կեղծիքի մասին խոսելիս ի՞նչ հիմքեր ունեք: 

Նախ և առաջ մենք տեղադրել էինք տեսախցիկներ ցանկացած ընտարտեղամասում, ունեինք երկու հանձնաժողովի անդամ և դիտորդներ: Տեսախցիկները արձանագրել են, թե ինչպես են առանց անձնագրի քվեարկություններ կատարվում: Նրանք տեղյակ չէին, որ նկարահանվում է, և այնպիսի անգրագետ մասսա էր հանձնաժողովներում, որպեսզի այդ անգրագետ մասսան չմտածի, որ կեղծելուց հետո նրանք պատասխան են տալու, իսկ խելացի մարդը դա մտածում է, որ պատասխան է տալու, դրա համար բոլոր տեղերում այդպիսի մասսա էին դրել: 

Կոնկրետ ո՞ր ընտրատեղամասերում են այդպիսի խախտումներ արձանագրվել: 

Բոլոր տեղերում: Տեղեր կան, որ քվեարկություն կատարում էին առանց անձնագրի, տեղեր կան, որ նկարահանվել են լցոնումները, տեղեր կան, որ ընտրողները արտասահմանում են, անգամ ամերիկացի դիտորդներն են բռնել (մենք լրիվ ստուգումներն անցկացրել էինք, թե որ տեղամասում ինչքան ընտրող կա), և նրանք ազգանունով գնացել և հարցրել են` այս մարդիկ ընտրել են, թե ոչ: Բացել տեսել են, որ այդ մարդկ ընտրել են: Բայց ո՞նց են ընտրել, եթե այստեղ չեն: Ընտրատեղամաս է եղել, որ ժամը 4-ին արդեն քվեաթերթիկ չի եղել: Քաղաքի մի ընտրատարածքում տեսել են, որ մերոնք հաղթել են, իրենց ներկայացուցիչները գնացել են, ու կռիվ-շամաթա է սկսվել, դրանից հետո կարուսել են սկսել` մեկ անձը տաս անգամ է քվեարկել: Այսօր որ մենք ներկայացել էինք բողոքի, հանել էին քաղաքի մի ընտրատեղամասի արդյունքները, հետաքրքիր բան է ի հայտ եկել. մեկ անձը մի 10 հոգու դիմաց ստարագրել է նույն ստորագրությամբ: Մեր ներկայացուցիչը ուզեցել է այդ փաստաթուղթը պատճենել, չեն թույլատրել, ոստիկանություն են կանչել և նրան դուրս են հանել: Ցանկացած տեղամաս վերցնես, այդպիսի բան կա: 

Ի՞նչ եք մտադիր անել: 

Մենք բողոքարկել ենք տարածքային ընտրական հանձնաժողով, հետո եթե այստեղ հրաժարվեն և պատասխան չտան, կներկայացնենք մեր բողոքը ԿԸՀ, դրանից հետո էլ դատարան: Մենք գնալու ենք մինչև վերջ, որովհետև այստեղ ընտրությունները կեղծել են: Նորից քվեարկության ենք պատրաստվելու:

«Վրացական երազանքը» մեծամասնություն է լինելու Վրաստանի խորհրդարանում, իսկ ի՞նչ է փոխվելու Ջավախքում դրանից: 

Առաջնահերթություններից մեկը լեզվին է տրված, որ պետք է լեզուն պահպանվի: 

Այսինքն` հայերենը տարածաշրջանում կարգավիճա՞կ կստանա:

Դա հետագայում կիմանանք, ես չեմ ուզում առաջ ընկնել:

Դրանից հետո հայ-վրացական համալսարան կբացվի Ջավախքում, հետո էլ գյուղատնտեսությանը արագ թափ է տրվելու, որպեսզի այստեղ ժողովուրդը ոչ թե արտագնա աշխատանքի գնա, պիտի աշխատանք ստանա տեղում: Բացի դրանից` այն աշխատուժը, որը բերվում է դրսից, դրանք այլևս չպետք է լինեն, որովհետև այստեղ աշխատուժը և որակյալ է, և էժան: Այդ առաջնահերթությունների մասին խոսել է պրն Իվանիշվիլին Ախալքալաքում ելույթ ունենալիս: 

Բիձինա Իվանիշվիլին «New Times»-ին տված հարցազրույցում ասել է, որ «հայերը, տարօրինակ ազգ են: Նրանց երկիրը մեր կողքին է, իսկ նրանք ապրում են Վրաստանում»: Ինչպե՞ս կմեկնաբանեք այս արտահայտությունը` որպես կուսակցության ներկայացուցիչ: 

Ես չգիտեմ այդպիսի բան: Կարող է «New Times»-ը ինչ-որ թյուրիմացություն է տվել, ես այդպիսի բան չեմ լսել:  Դա կարող է նաև Սահակաշվիլու կուսակցության կողմից պրովոկացիա է: Այդպիսի բան ես չեմ լսել երբեք: Այդպիսի բան չէր կարող ասել Իվանիշվիլին: 

Դուք Ախալքալաքում պարտվեցիք, ի՞նչ գործունեություն  եք ծավալելու «Վրացական երազանքի» հետ, շարունակելո՞ւ եք համագործակցել: 

Մեր գործունեությունը շարունակելու ենք: Նախ և առաջ ես ասացի, որ պետք է մինչև վերջ գնանք, որպեսզի ես պատգամավոր դառնամ, որպեսզի այն հարցերը, որոնք գոյություն ունեն, ես դրանք առաջ քաշեմ: Կարևորը պատգամավոր դառնալը չէ, դա ինքնանպատակ չէ, դա պարտադիր միջոց է, որպեսզի Ջավախքի ժողովրդի հարցերը ներկայացնեմ խորհրդարան, որտեղ կարելի է լուծում տալ այդ խնդիրներին: 

Ջավախքցի ակտիվիստների ձերբակալության հարցը, օրինակ` Վահագն Չախալյանի և մյուսների, երբևէ քննարկե՞լ եք «Վրացական երազանքի» հետ, ի՞նչ դիրքորոշում ունեն: 

Քննարկել ենք: Մի քանի անգամ մեր դատապաշտպանին ուղարկել ենք Վահագն Չախալյանի մոտ: Իշխանության գալուց հետո անպայման  պետք է վերանայենք և արդարացնենք Վահագն Չախալյանին: Ոչ միայն նրան, մենք երկուսն էլ ունենք` Գիորգի Մխչյանին անօրինական ձերբակալել են և Մելիք Ռաիսյանին հեռակա դատապարտել են: 

Իսկ Գուրգենի Շիրինյանի հարցով չե՞ք զբաղվելու: 

Գուրգեն Շիրինյանի գործը պետք է վերանայվի, որովհետև նա էլ աքսորվածի կարգավիճակով է, այսինքն`  քաղբանտարկյալների գործերը պետք է վերանայվեն: Դա պրն Իվանիշվիլին է ասել իր լեզվով, որ բոլոր քաղբանտարկյալների հարցը պետք է վերանայել, ովքեր մեղավոր չեն, պետք է ազատ արձակվեն: 

Հայ-վրացական համալսարանի հարցը որքանո՞վ է իրատեսական, ե՞րբ է սկսվելու դրա կառուցումը կամ հիմնադրումը: 

Ես չեմ կարող ասել, որ այսօրվանից կարող ենք բացել, բայց դա պարտադիր է, մյուս տարվանից պիտի աշխատենք, որ բացենք: Կարող է շենքի կառուցում չլինի, այլ ինչ-որ շենքում տեղակայվի, բայց դա ոչ թե մենակ մեզ է պետք, այլ այսօրվա Վրաստանի պետությանն է պետք, որպեսզի մեր ժողովուրդը լեզուն սովորելով ինտեգրվի վրաց ժողովրդին: Միանգամից պիտի անցնենք այդ ծրագրերին:

Մենք պետք է մեր հարաբերությունները նորմալացնենք Ռուսաստանի հետ: Մեր ծրագրում կա նաև այն, որ հայ-վրացական սահմանը լինի թափանցիկ: Այսինքն` ցանկացած արհեստական խոչընդոտները պետք է վերջանան, որովհետև մեր ժողովուրդը մայր հայրենիքի հետ կապված է: Ես կուզեի, որ Հայաստանի Հանրապետությունը ինչ-որ չափով աջակցեր մեզ: Արհեստական խոչընդոտները հանեն, օրինակ` ԱՊՊԱ-ն հանեն գոնե Ջավախքի համար: Բայց, փոխանակ Հայաստանի Հանրապետական կուսակցության պատգամավորներ գային հակառակ աշխատելու, մտածեին էստեղի ժողովրդի մասին, չէ որ այսօր պրն Իվանիշվիլին ներկայացրել է իր մեծամանական ներկայցուցչին` Ջավախք ժողովրդական շարժման նախագահին, ուրեմն ամբողջ ժողովրդի կարծիքն են ուզում իմանալ, այսինքն` այն հարցերը, որոնք այսօր ներկայացնում է Ջավախքի ժողովուրդը, կուսակցությունը պատրաստ է այդ հարցերը լուծել: Իսկ Հայաստանի Հանրապետական կուսակցությունից պրն Վարդան Այվազյանը և Հովհաննես Սոխեյանը մեզ հակառակ աշխատանք են տանում:

Ի՞նչ են արել:

Եկել են գյուղերը ման են եկել և հակառակ մեզ աշխատել են:

Ինչո՞ւ պիտի ձեր դեմ աշխատեին, ի՞նչ շահ ունեին:

Որովհետև Վարդան Այվազյանը բիզնես ունի Վանո Մերաբիշվիլիի հետ:

Ո՞ր բիզնեսը նկատի ունեք:

Տաբածղուրի լճի հսկայական ձկնաբուծարանը: Մարդիկ պետք է իմանան, որ Հանրապետական կուսակցությունն ինչ խոչընդոտներ է ստեղծում Ջավախքի ժողովրդի համար: Օգնելու փոխարեն խոչընդոտներ է ստեղծում: Գալիս է օգնելու ոստիկանապետին, բռնապետին, որ ամբողջ ժողովրդի հոգին հանել է: