Քիչ առաջ վերաքննիչ քրեական դատարանում ավարտվեց Արագածոտնի մարզի Կաթնաղբյուր գյուղի բնակիչ Սաշա Դավթյանի բողոքի քննությունը։ Նիստը նախագահող դատավոր Մ. Ռեհանյանը բողոքը բավարարեց մասնակի` 4 տարվա ազատազրկումը դարձրեց 3 տարի և դատարանի դահլիճից ազատ արձակեց` «Համաներում հայտարարելու մասին» ԱԺ որոշման հիման վրա:

Սաշա Դավթյանի փաստաբան Խանում Մկրտչյանը  դատարանից պահանջել էր արդարացնել իր պաշտպանյալին, քանի որ Արագածոտնի մարզի ընդհանուր իրավասության դատարանը անթույլատրելի էր համարել քննիչների` սպառնալիքի արդյունքում տուժողներից ձեռք բերված ապացույցները:

Հիշեցնենք, որ Ս. Դավթյանը 2009 թ. մայիսի 8-ից գտնվում էր կալանքի տակ: Նա մեղադրվում էր դուստրերին՝ անչափահաս աղջկան խոշտանգելու, իսկ մյուսին բռնաբարելու մեջ։

Արագածոտնի մարզի ընդհանուր իրավասության դատարանը 2009-ի դեկտեմբերին Ս. Դավթյանին արդարացրել էր անչափահաս աղջկան բռնաբարելու մասով եւ 4 տարվա ազատազրկման դատապարտել խոշտանգման հոդվածով։