Երեկ  Լոռու մարզի ընդհանուր իրավասության դատարանում դատավոր Բորիկ Գրիգորյանի կողմից հրապարակվեց Վանաձորի մանկավարժական ինստիտուտի մանկավարժության ֆակուլտետի դեկան Թերեզա Շահվերդյանն ընդդեմ «Հետքի» լրագրող Ադրինե Թորոսյանի, երրորդ անձ «Հետք» թերթի՝ պատվին, արժանապատվությանը և գործարար համբավին պատճառված վնասի հատուցման պահանջի մասին  քաղաքացիական գործով վճիռը:

Դատարանը վճռեց կարճել գործի վարույթը՝ հիմք ընդունելով հայցվոր Շահվերդյանի՝ հայցից հրաժարվելու մասին դիմումը, և Թերեզա Շահվերդյանից հօգուտ Ադրինե Թորոսյանի բռնագանձել 185 հազար դրամ՝ որպես փաստաբանի խելամիտ վարձատրության գումար: Հիշեցնենք, որ դիմելով դատարան՝ դեկանն ինքն էր պահանջում լրագրողից հօգուտ իրեն բռնագանձել՝ սկզբում 2 միլիոն, ապա 200 հազար դրամ, ինչպես նաև դատական ծախսերը:

Սույն գործով «Հետքի» լրագրողի իրավունքները դատարանում պաշտպանել են փաստաբաններ Լուսինե Հակոբյանն ու Տիգրան Եգորյանը: