«Դեպի Հայք» ծրագրի շրջանավարտները` այսօր հայրենադարձ
Ս.թ. դեկտեմբերի 12-ին մեկնարկեց «Դեպի Հայք» ծրագրի հայրենադարձ շրջանավարտների ակումբը:
2004-2012թթ. ընթացքում «Դեպի Հայք» կազմակերպությունը հովանավորել է ավելի քան 750 սփյուռքահայ կամավորների, որոնք երկու ամսից մինչև մեկ տարի տևող ծրագրերի շրջանակում կամավոր աշխատել են Հայաստանի և Արցախի պետական ու հասարակական կազմակերպություններում: Մասնակիցներ են ժամանել շուրջ 30 երկրներից: Այս ընթացքում 750 մասնակիցներից 46-ը տեղափոխվել է Հայաստան՝ երկարաժամկետ բնակություն հաստատելու նպատակով:
Հայաստանի գրասենյակի գործադիր տնօրեն Սևան Կաբակյանը այս առիթով նշում է. « «Դեպի Հայք» ծրագիրը իր մասնակիցներին առիթ է տալիս Հայաստանը դիտել իր բոլոր կողմերով և հնարավորություններով: Այդ նույն առիթն է, որ կամավորների մոտ առաջացնում է Հայաստանին անմիջականորեն կապվելու և Հայաստանում ապրելու կամ երկարաժամկետ մնալու ցանկությունը: Այսօր 46-ին ուզում են միանալ նախկին կամավորներից շատերը, որոնք արդեն իսկ փնտրում են, նաև մեր աջակցությամբ, Հայաստան տեղափոխվելու հնարավորություններ: Հայկական աշխարհում սա եզակի երևույթ է»:
Հայրենադարձներից մեկը՝ Թանիա Սահակյանը, ԱՄՆ-ից նշում է. «Մենք Հայաստան տեղափոխվում ենք միայնակ, առանց ընտանիքների, և գիտակցում ենք անցումային փուլի բարդություններն ու ողջ կարևորությունը: Կարծում եմ՝ ամենաճիշտ ժամանակն է նման ակումբ մեկնարկելու և օգնելու նոր հայրենադարձներին՝ մասնագիտական կամ անձնական հարցերով: Այսօրվա միջոցառումը լավ առիթ հանդիսացավ բոլորիս համար հանդիպելու, մեր տեսակետներն ու հեռանկարները քննարկելու համար»:
Մեկնաբանություններ (1)
Մեկնաբանել