Արդարադատության նախարար Հրայր Թովմասյանն այսօր լրագրողների հետ տարեվերջյան հանդիպումն անցկացրեց անկաշկանդ մթնոլորտում` սուրճի սեղանի շուրջ ամփոփելով արդարադատության ոլորտի մեկամյա գործունեությունը, ձեռքբերումներն ու ոլորտում նախատեսվող բարեփոխումները: Նախարարն այսօր գնահատեց նաեւ արդարադատության ոլորտը լուսաբանող լրատվամիջոցների գործունեությունը` «Hetq.am» էլեկտրոնային օրաթերթին, «Panorama.am», «Iravaban.net» լրատվական կայքերին, «Առավոտ», «Ժողովուրդ» օրաթերթերին, «Armnews» հեռուստաընկերությանը, շնորհակալագրերի հետ միասին նրանց նվիրելով կալանավորների պատրաստած հուշանվեր-ջութակը:

Պրն Թովմասյանը նշեց, որ լրատվամիջոցներն ընտրվել են արդարադատության ոլորտի խնդիրները հետեւողականորեն եւ պրոֆեսիոնալ լուսաբանելու համար, միաժամանակ նշելով, թե միշտ չէ, որ համակարծիք է եղել նրանց հրապարակումների հետ:

«Հետքին» շնորհակալագիրը հանձնելիս նախարարը, վերհիշելով նախարարությանն ուղղված թերթի վերջին հրապարակումը, այնուամենայնիվ, խորհուրդ տվեց չջնջել իրենց հեռախոսահամարները, որովհետեւ դրանք կարող են մեզ մի օր պետք գալ: Արդարադատության նախարարը գնահատել էր նաեւ ցմահ դատապարտվածների խնդիրներով զբաղվող քաղաքացիական նախաձեռնության ու Սախարովի անվան հիմնադրամի ներկայացուցիչների գործունությունը: