Երեւանի ավագանու ընտրությունների քվեարկության արդյունքները կեղծելու դեպքի առթիվ Հատուկ քննչական ծառայության վարույթում քննվող քրեական գործով ձեռք են բերվել ապացույցներ, որ մասնավորապես թիվ 8/05 ընտրատեղամասում  քվեարկվել են  կեղծ քվեաթերթիկներ: Նշանակվել է դատափաստաթղթաբանական փորձաքննություն, որի շրջանակներում փորձագետներն այսօր` ժամը 14:00-ին, կկատարեն նշված ընտրատարածքի քվեաթերթիկների վերահաշվարկ եւ զննում:

«Հաշվի առնելով հանրության հետաքրքրությունը եւ կարեւորելով քվեաթերթիկների վերահաշվարկի գործընթացի թափանցիկությունը՝ քվեաթերթիկների պարկի բացումը տեղի կունենա հրապարակային, որին կարող են ներկա գտնվել բոլոր շահագրգիռ կողմերի՝ ԶԼՄ-ների, դիտորդական առաքելություն իրականացրած կազմակերպությունների, կուսակցությունների, նախընտրական դաշինքների ներկայացուցիչները»,- հաղորդում է գլխավոր դատախազության մամլո ծառայությունը:

Տվյալ գործընթացը տեղի կունենա գլխավոր դատախազության վարչական շենքում:

Հիշեցնենք, որ հունիսի 1-ին Երեւանի ավագանու ընտրությունների ընթացքում արձանագրված ընտրախախտումների կապակցությամբ ձերբակալվել են հիշյալ ընտրատարածքի (թիվ 8/05) տեղամասային ընտրական հանձնաժողովի անդամ Նորայր Եղիազարյանը եւ նույն տեղամասի ընտրող Արմեն Օհանյանը:
Մեր տեղեկություններով` Նորայր Եղիազարյանն ԱԺ պատգամավոր, Հանրապետական Սամվել Ալեքսանյանի (մականունը` Լֆիկ Սամո) մարդն է: Երկու օր է` «Հետքին» չի հաջողվում կապ հաստատել պատգամավոր Ալեքսանյանի հետ: Վերջինիս բջջային հեռախոսն անջատած է, իսկ պատգամավորի օգնական ասում է, թե ինքը «ոչ մի բանից տեղյակ չէ»:

Ձերբակալված Նորայր Եղիազարյանը Վահան Զատիկյանի անվան դպրոցում տեղակայված 8/05 ընտրատեղամասում մայիսի 31-ի ընտրությունների ժամանակ «տիրություն է արել»` որպես ՀՀԿ-ի վստահված անձ: «168 ժամ» թերթի լրագրող Արմինե Ավետյանը նախօրեին հրապարակված իր հոդվածում նկարագրել է, թե ինչպես է Նորայր Եղիազարյանը հանձնաժողովի կնիքը վերցրել եւ վազելով մտել զուգարան: Նրան հետեւել է պատգամավոր Ս. Ալեքսանյանի քրոջ որդին` 23-ամյա Վարդան Հովհաննիսյանը, ու զուգարանի դուռը ներսից փակել է: «Երկու-երեք րոպե անց «վրա հասավ» հանձնաժողովի նախագահ Պետրոս Ավետիսյանն ու, իբր թե բարկանալով` նրանց դուրս հանեց»:

Մոտ կես ժամ անց Վարդան Հովհաննիսյանը փորձել է մի տրցակ քվեաթերթիկ լցնել քվեատուփի մեջ, ինչին խոչընդոտել են տեղամասում գտնվող լրագրողները եւ «Թրանսփարենսի ինտերնեյշնլ» հ/կ-ի ներկայացուցիչ Սոնա Այվազյանը: Երիտասարդը սկսել է վերջիններիս համոզել, որ մաղարիչի, թեկուզ` դոլարի դիմաց, նրանք որոշ ժամանակով ընտրատեղամասը լքեն:

Արդյունքի չհասնելով` Վարդան Հովհաննիսյանն օգնության է կանչել ընկերներին` մոտ 20 ամրակազմ տղաների: Նրանք բռնություն են գործադրել ընտրակեղծարարությանը խոչընդոտողների, այդ թվում` Արմինե Ավետյանի նկատմամբ, ինչի «շնորհիվ» Վարդան Հովհաննիսյանը մեկ այլ երիտասարդի հետ լցոնել է երկու կապոց քվեաթերթիկ: Իսկ պատգամավոր Սամվել Ալեքսանյանը, տեղեկանալով միջադեպի մասին, լրագրող Արմինե Ավետյանին ասել է. «Բա որ այս տարածքն էիր գալիս, շուտ ձեն հանեիր, որ ասեի` քեզ ձեռ չտան»:

Այս ամենի արդյունքում «պատասխան է տալու» միայն Նորայր Եղիազարյանը: Չնայած մամուլում արդեն հնչել են կարծիքներ, որ նրան եւ Արմեն Օհանյանին ձերբակալել են պարզապես կրքերը հանդարտեցնելու համար, ինչը «թամաշայի բաղկացուցիչ մասն է»: