Հանրապետականներն ուզում են հասկանալ Վանաձորում իրենց կուսակցության առաջնորդի պարտության պատճառները
Փետրվարի 27-ին մարզխորհրդի նիստում 2012թ.-ի տարեկան հաշվետվություն ներկայացնելուց հետո մարզպետ Արթուր Նալբանդյանը պատասխանեց մարզի լրագրողների հարցերին:
Լրագրողները մարզպետին խնդրեցին հավաստի տեղեկություններ հաղորդել Վանաձորի քաղաքապետ Սամվել Դարբինյանի հրաժարականի մասին շրջանառվող լուրերի շուրջ: Արթուր Նալբանդյանը վստահեցրեց, որ նման բան չի եղել, այսինքն` քաղաքապետը հրաժարական չի ներկայացրել: Մարզպետը, սակայն հայտնեց, որ կապված բնակչության դժգոհության հետ Հանրապետական կուսակցության գործադիր մարմինը առաջիկայում քննարկելու է Վանաձորի քաղաքապետի հարցը:
«Հետքը» մարզպետին խնդրեց հստակեցնել , թե Հանրապետական կուսակցության գործադիր մարմինը ինչ ձևաչափով է քննարկելու Վանաձորի քաղաքապետի հարցը. «Պետք է անկեղծ լինեմ և ասեմ, որ մեր հանրապետությունում շատ դեպքերում ընտրության մասնակցողը ՀՀ նախագահի թեկնածուին դեմ է քվեարկում, ոչ թե նախագահի վատ աշխատանքը տեսնելով, այլ շատ դեպքերում իր անմիջական ղեկավարից դժգոհ լինելով: Մենք ուզում ենք մեզ համար հասկանալի դարձնել Վանաձորում մեր կուսակցության առաջնորդի պարտության պատճառները: Չի բացառվում, որ ինչ-որ մեկը դժգոհ է քաղաքապետի աշխատանքից, ինչ-որ մեկը կարող է դժգոհ է մարզպետի աշխատանքից կամ մարզային կառույցների ղեկավարների աշխատանքից: Մարդիկ իրենց դժգոհությունը արտահայտել են ընտրության միջոցով: Եթե կա որևէ պաշտոնիայի մեղքի բաժին, իսկ ով է ասել, որ մենք` պաշտոնյաներս ցմահ ենք մեր պաշտոնում: Սա է, որ պետք է վերլուծվի գործադիր մարմնում, որից հետո արդեն վերջնական պարզ կլինի գնահատականը»,- պատասխանեց մարզպետը:
Լրագրողների պահանջով Արթուր Նալբանդյանը ներկայացրեց մարզի հետընտրական իր գնահատականները. «Մենք ամեն ինչ արել ենք օրինական ընտրություններ անցկացնելու համար: Մենք հույս ունեինք, որ ընտրություններից հետո պարտվող թեկնածուները Սերժ Սարգսյանին կշնորհավորեին, և այդ մշակույթը մեզ մոտ կձևավորվեր, բայց, ցավոք սրտի, այդպես չեղավ: Եղավ նախորդների նման»,-ասաց Արթուր Նալբանդյանը, ով մարզի հետընտրական վիճակը բնականոն համարեց, սակայն չթաքցրեց, որ Վանաձորում մեծ է արտագաղթը, մեծ է աղքատության տոկոսը, սոցիալական ծանր վիճակը, որի հիման վրա էլ բնակչությունը կատարել է իր ընտրությունը:
Արթուր Նալբանդյանը նշեց, որ նախագահի ընտրությանը մարզում Սերժ Սարգսյանի ստացած քվեները չեն կարող ազդեցություն չունենալ մարզի կառավարման հետագա աշխատանքների վրա: Մարզպետի կարծիքով, ընտրությունների արդյունքների վրա ազդել է նաև այն փաստը, որ ընտրողների զգալի մասը դժգոհ է եղել մարզի տնտեսության աճի տեմպերից: Ա. Նալբանդյանը ընտրությունների արդյունքները համարեց սթափեցնող, որից ելնելով էլ վստահություն հայտնեց, որ ինչպես ինքը, այնպես էլ ՀՀ կառավարությունը միջոցներ են ձեռնարկելու մարզի տնտեսության զարգացման տեմպերն ավելացնելու համար:
«Հետքը» մարզպետին խնդրեց ներկայացնել մարզի սահմանամերձ համայնքների զարգացման ուղղությամբ կատարված աշխատանքները:
«Ես կուզենայի խոսել նաև Ջիլիզա համայնքի մասին, որը նույնպես սահմանամերձ գյուղ է: Մենք 2011թ.-ին սկզբից համայնքի խմելու ջրի հետ լուրջ ներդրումային ծրագիր ենք իրականացրել: Վերջերս Ջիլիզայում որոշեցինք իրականացնել ևս մի կարևոր ծրագիր, որը վերաբերում է սառնարանային տնտեսությանը: Հիմա մենք արդեն այնտեղ հողահատկացման հարցերն ենք կարգավորել և շատ շուտով այդ ծրագիրը կյանքի կկոչվի, այսինքն` մեր հրատապ ծրագրերի որոշակի գումարներ մենք ուղղորդում ենք դեպի սահմանամերձ գյուղեր: Ինչ վերաբերում է Ձորամուտի և Գոգավանի սահմանային տարածքներին, ապա պետությունը նույնպես այնտեղ լուրջ ծրագիր է իրականացնում` կապված ճանապարհաշինության և գազաֆիկացման հետ: Այնտեղ զուգահեռ այդ երկու աշխատանքները կատարվելու են և վստահեցնում եմ, որ մոտ ապագայում այդ ճանապարհահատվածը կլինի բարեկարգված ու ասֆալտապատված, իսկ շրջակա սահմանամերձ գյուղերը` գազաֆիկացված»:
Մեկնաբանություններ (4)
Մեկնաբանել