«Ռուբին» ՍՊԸ-ն շուկայում հայտնի էր որպես բջջային հեռախոսների ալեհավաք կայաններ տեղադրող ընկերություն: ՍՊԸ-ն գրանցված է Իջեւանում եւ ունեցել է բարեխիղճ հարկատուի համբավ: Ընկերության տնօրեն Արթուր Մարդանյանը, չենթարկվելով հարկային տեսչության «չգրված օրենքներին», չի համագործակցել հարկային տեսչության ղեկավարության հետ, ինչից հետո սեւ ամպեր են կուտակվել իր ղեկավարած ընկերության գլխին: 2009թ. մինչ օրս «Ռուբին» ՍՊԸ-ն դատական գործընթացների մեջ է եւ այդպես էլ չի կարողանում հարկային տեսուչների գրած հավելագրումներն ու օրենքին հակասող ակտերը անվավեր ճանաչել:

Արթուր Մարդանյանը «Հետքի» հետ զրույցում ասաց, որ 2010թ. դադարեցրել է ընկերության գործունեությունը: «Մեր վրա հարկայինն այդքան պարտք է դրել, որ չենք կարող աշխատել: Մեր գործընկերները, ում հետ ուզում ենք աշխատել, հարկայինից տեղեկանք են ուզում, որ պարտքեր չունենք, հենց այդ պատճառով չենք կարողանում ոչ մի մրցույթի մասնակցել»,-ասաց նա:

Այսպես, ՊԵԿ նախագահի 04.12.2008թ. թիվ 1002835 հանձնարարագրի հիման վրա ՊԵԿ Իջևանի տարածքային հարկային տեսչության կողմից 2008թ. դեկտեմբերի 16-ից մինչև դեկտեմբերի 29-ը կատարվել է «Ռուբին» ՍՊԸ-ի բյուջեի հետ փոխհարաբերությունների ճշտության և հարկային մարմնի կողմից վերահսկվող օրենսդրության առանձին պահանջների կատարման ճշտության ստուգում: Արդյունքում նույն տարվա դեկտեմբերի 29-ին կազմված ակտով ընկերությանը բյուջե վճարման է առաջադրվել 29.208.300 դրամ:

«Ռուբին» ՍՊԸ-ն թեեւ տուգանքը վճարել է, սակայն ակտը բողոքարկել է վարչական դատարան եւ 2009թ. սեպտեմբերի 23-ին այն ճանաչվել է անվավեր, իսկ Վճռաբեկ դատարանը չի բավարարել գլխավոր դատախազի տեղակալի բողոքը (պետության գույքային և ոչ գույքային շահերի պաշտպանության հիմքով-հեղ.) եւ օրինական ուժի մեջ է թողել վարչական դատարանի վճիռը:

«Ռուբին» ՍՊԸ-ի տնօրենն ասաց, որ ստիպված են վճարել ակտի գումարը, քանի որ եթե իրենց հաշվին պարտք գրանցվեր, ապա չէին կարողանա մասնակցել մրցույթներին:

Բայց մինչեւ Վճռաբեկ դատարան դիմելը (23-10-2009թ.), ՊԵԿ-ը չհաշտվելով դատարանում իր պարտության հետ, նոր ստուգում է նախաձեռնել: Նույն թվականի հոկտեմբերի 21-ին վարչապետի հանձնարարականի հիման վրա, ՊԵԿ նախագահը արձակել է հանձնարարագիրը, ըստ որի` ՊԵԿ Իջևանի ՏՀՏ հարկային ստուգումների բաժնի գլխավոր հարկային տեսուչներ՝ Արմեն Ծատուրյանը, սոցիալական վճարների և եկամտահարկի բաժնի գլխավոր հարկային տեսուչ Արթուր Սարգսյանը, ներքին դիտարկումների և վերահսկողության վարչաթյան համալիր և տեսչական ստուգումների բաժնի գլխավոր հարկային տեսուչներ Արսեն Ալեքսանյանը, Հայկուհի Վարդանյանը, ավագ հարկային տեսուչ Մկրտիչ Ավետիսյանը 18.11.2009թ-֊ից մինչև 29.12.2009թ. «Ռուբին» ՍՊԸ-ում անցկացրել են բյուջեի հետ փոխհարաբերությունների և հարկային մարմինների կողմից վերահսկվող օրենսդրության առանձին պահանջների կատարման ճշտության վերստուգում։

Վերստագման արդյունքում, դեկտեմբերի վերջին կազմվել է ակտ, որով ընկերությանն առաջադրվել է 66.922.200 դրամի լրացուցիչ հարկային պարտավորություն, որն ուղարկել է ՊԵԿ հետաքննության վարչություն եւ «Ռուբին» ՍՊԸ-ի տնօրենի նկատմամբ ՀՀ քրեական օրենսգրքի 205 հոդվածի 2-րդ մասի հատկանիշներով (հարկերը, տուրքերը կամ պարտադիր այլ վճարումները վճարելուց չարամտորեն խուսափելը, որը կատարվել է առանձնապես խոշոր չափերով ) 2010թ. փետրվարի 27-ին հարուցվել է քրեական գործ:

Վերստուգման ընթացքում կիրառված մեթոդների, ակտում նշված հետևությունների ճշտությունը պարզելու նպատակով նշանակվել է դատահաշվապահական փորձաքննություն։ «Փորձաքննությունների ազգային բյուրո» ՊՈԱԿ-ի փորձագետը 19.08.2010թ. եզրակացության համաձայն, վերստուգմամբ կազմված ակտում արձանագրված դրվագներով փորձաքննությամբ կատարված ճշգրտումներով «Ռուբին» ՍՊԸ-ում, ըստ հարկատեսակների, տույժ և տուգանքներով հանդերձ, առաջանում է ընդամենը 19.106.839 դրամի լրացուցիչ պարտավորություններ։

ՍՊԸ-ի տնօրենը լրացուցիչ հարցաքննվել է և անհամաձայնություն հայտնել եզրակացության որոշ դրվագների կապակցությամբ։ Նույն թվականի օգոստոսի 30-ին  որոշում է կայացվել կրկնակի դատահաշվապահական փորձաքննություն անցկացնելու մասին։

«Հայասաանի Հանրապետության փորձագիտական կենտրոն» ՊՈԱԿ-ի փորձագետը  01.10.2010թ. տվել է եզրակացություն, ըստ որի` «Ռուրին» ՍՊԸ-ում ըստ հարկատեսակների տույժ և տուգանքներով հանդերձ առաջանում է ընդամենը 18.343.400 դրամի լրացուցիչ պարտավորություններ։ Հիմք ընդունելով փորձագիտական երկու եզրակացությունները, քննիչը կարճել է քրեական գործը եւ դադարեցրել է քրեական հետապնդումը: 

«Ռուբին» ՍՊԸ-ն այս ակտը եւս բողոքարկել է վարչական դատարան: Հակընդդեմ հայց է ներկայացրել նաեւ ՊԵԿ Իջևանի տարածքային հարկային տեսչությունը` պահանջելով հօգուտ պետբյուջեի բռնագանձել 42.861.700 դրամ: Ըստ հարկային տեսչության` ՍՊԸ-ի պարտքը գոյացել է տարբեր հարկատեսակների` շահութահարկի, եկամտահարկի, ԱԱՀ-ի պարտադիր սոց. վճարների գծով, ինչպես նաեւ տույժ-տուգանքները:

ՍՊԸ-ի տնօրենն ասում է, որ ստուգման ակտում եղել են բազմաթիվ բացթողումներ եւ ստուգող աշխատակիցները ցուցաբերել են կանխամտածված վերաբերմունք` առաջադրելով ոչ իրավաչափ հարկային պարտավորություններ:

«Հիմնական խախտումներից մեկը գրել են, թե ընկերությունը 19 մլն դրամով ավել է վճարել օրապահիկը, բայց ընկերությունը վճարել է ընդամենը 8 մլն դրամ օրապահիկ, մնացած գումարը գիշերակացի, ճանապարհածախսի եւ գործուղման այլ ծախսերի գումարներն են: Մեզ համար անհասկանալի է, թե որտեղից ն վերցրել այդ փաստերը: Ընկերությունը ամեն ամիս ունի գործուղման հաշվարկ եւ օրապահիկը առանձին հաշվարկով չի արվել եւ միասին է հաշվարկվել»,-ասում է Արթուր Մարդանյանը:

Նրա խոսքերով` միայն օրապահիկի սխալ հաշվարկի համար մոտ 30 մլն դրամի լրացուցիչ պարտավորություն են առաջադրել ինչպես եկամտահարկի, այնպես էլ շահութահարկի գծով:

«Դատարանում ներկայացրել ենք, որ աշխատակիցները գերազանցել են իրենց լիազորությունները: 2007թ. առաջին կիսամսյակը վերստուգման հանձնարարականով նշված չի եղել, իսկ իրենք օգտվելով նախորդ ստուգման փաստաթղթերից, որոնք անվավեր են ճանաչվել Վճռաբեկ դատարանի որոշմամբ, մտցրել են այդ ակտի մեջ: Հանձնարարականով եղել է 5 անձ ստուգող, բայց մեր կազմակերպությունում աշխատել են 2-ը, մինչդեռ 5-ն էլ ստորագրել են ստուգման ակտը դրա համար էլ առկա է բազմաթիվ թերություններ»,-ավելացրեց «Ռուբին» ՍՊԸ-ի տնօրենը:

Դատարանը` Արգիշտի Ղազարյանի նախագահությամբ, «Ռուբին» ՍՊԸ-ի հայցը եւ ՊԵԿ Իջևանի տարածքային հարկային տեսչության հակընդդեմ հայցը բավարարել է մասնակի եւ ՍՊԸ-ից բռնագանձել է 19.098.200 դրամ` հիմք ընդունելով փորձագիտական եզրակացությունները:

Իջևանի հարկային տեսչությունը գործը բողոքարկվել է վերաքննիչ վարչական դատարան, որտեղ բեկանվել եւ ուղարկվել է նոր քննության: 2012թ. դեկտեմբերի 7-ին վարչական դատարանը` նախագահությամբ Արթուր Ծատուրյանի, մերժել է «Ռուբին» ՍՊԸ-ի հայցն ընդդեմ ՊԵԿ Իջեւանի հարկային տեսչության 29.12.2009թ. թիվ 1007511 ստուգման ակտն անվավեր ճանաչելու պահանջի մասին։ Իսկ Հարկային տեսչության հակընդդեմ հայցը բավարարել է` «Ռուբին» ՍՊԸ-ից հօգուտ պետական բյուջեի բռնագանձելով 42.861.700 դրամ, ինչպես նաեւ նախապես վճարված պետական տուրքը` 857.234 դրամ։

«Այսօր հարկային տեսչության հետ չենք կարողանում ճշտել մեր պարտքը: Հարկային հաշվառման քարտում գրված է, որ ընկերության պարտքը կազմում է 39 մլն դրամ, որի հետ մենք համաձայն չենք, իսկ իրենք հակընդդեմ հայցով ընկերությունից պահանջում են բռնագանձել 42 մլն 800 հազար դրամ: Մեզ համար անհասկանալի է, թե որտեղից է գոյացել այդ գումարը, ընկերությունը երբեւիցէ այդքան պարտք չի ունեցել».-տարակուսած է «Ռուբին» ՍՊԸ-ի տնօրենը:

«Ռուբին» ՍՊԸ-ն այդ  դատական ակտը եւս բողոքարկել է վարչական վերաքննիչ դատարան, որտեղ առաջին նիստը հետաձգվել է հարկային տեսչության աշխատակիցների բացակայության պատճառով:

«Նախորդ առաջին ատյանը մեր ոչ մի ասածը չի ընդունել, չի քննարկել, մեր բարձրացրած հարցերին ոչ մի պատասխան չենք ստացել, որովհետեւ պատասխանող կողմը չի գալիս դատարան: Դատարան ապացույցներ ենք ներկայացրել կոնկրետ հիմնավորված հաշվարկներ, բայց առաջին ատյանը հաշվի չի առել մեր ասածները: Մտավախություն ունենք, որ մեր ասածները չեն լսի նաեւ այս դատարանում»,-ասում է Արթուր Մարդանյանը:

ՍՊԸ-ի տնօրենը մտածել է, որ քրեական գործի կարճումից հետո կավարտվեն բոլոր վեճերը, ընկերության հարկային քարտում կկատարվեն ճշգրտումներ եւ գոնե 2011թ-ից աշխատելու հնարավորություն կունենան, մանավանդ ստեղծվել էին բոլոր նախադրյալները բջջային կապի ոլորտում գլխավոր կապառալու դառնալու համար:

«Այդպես մտածելու բոլոր հիմքերն ունեի, որովհետեւ քննիչի որոշումը ստանալուց հետո ես հրավիրվել եմ Իջևանի տարածքային հարկային տեսչություն, որտեղ պետն ինձ առաջարկել է կնքել հաշտության պայմանագիր` հիմք ընդունելով փորձագիտական եզրակացությունները, որոնց ես համաձայնվել եմ: Բայց դատական նիստից մի քանի ժամ առաջ Իջեւանի տարածքային հարկային տեսչության աշխատողների կողմից ես տեղեկացվել եմ, որ հաշտության համաձայնագիր չի կնքվելու»,-ասաց Արթուր Մարդանյանը:

Այս գործով դատաքննության օր է նշանակվել հունիսի 26-ը: