«Հրաչ Մուրադյանի սպանությունը այն վերջին օղակն էր կատարված հանցագործությունների, որոնք ուղղված էին նրա անձի, գույքի, մերձավորների դեմ»,- այսօր հրավիրված ասուլիսում հայտարարեց Պռոշյանի սպանված գյուղապետի իրավահաջորդի՝ նրա եղբոր՝ Արշակ Մուրադյանի շահերի պաշտպան Մելանյա Առուստամյանը: Փաստաբանը շեշտեց, որ 2010 թ. գիշերվա ժամը 4-ին հրդեհել են Հ. Մուրադյանին պատկանող ֆերմայի խոտի դեզը: Հրշեջները դեպքի վայր ժամանալուց հետո նշել են, որ հրդեհը միտումնավոր բնույթ է կրում, քանի որ դեզը հոսանքից հեռու էր, կայծակ էլ չի եղել: Փաստաբանը նշեց, որ այդ գործով նյութերն անհետեւանք են մնացել, սակայն այժմ նախաքննական մարմինը պետք է պահանջի դրանք, որոնք, ըստ Առուստամյանի, կապ ունեն վերջին դեպքի հետ:

Նույն 2010-ին փորձել են առեւանգել Հրաչ Մուրադյանի եղբոր տղային հենց գյուղապետի տան բակից: Տեղի է ունեցել ծեծկռտուք, որից հետո համայնքի ղեկավարը գնացել է՝ պարզելու, թե ինչ եւ ինչու է կատարվել: Ըստ փաստաբանի՝ կրակել են Մուրադյանի մեքենային եւ նրա եղբորորդու ուղղությամբ: «Որոշ անձինք ցուցմունք են տվել, որ Մուրադյանն ինքն է կրակել իր մեքենայի վրա, որպեսզի հանցագործության պատրանք ստեղծի: Գործի շրջանակներում մեղադրանք է առաջադրվել Հրաչ Մուրադյանին, նույնիսկ փորձել են նրան կալանավորել, սակայն խափանման այդ միջոցը չի ընտրվել: Այս գործը հետագայում նույնպես կարճվել է: Սրան հաջորդել է 2012-ի գյուղապետի ընտրություններից հետո կատարված խուլիգանությունը, երբ ընտրվելուց հետո կազմակերպված արարողության ժամանակ նրան դուրս են կանչել, ու տեղի է ունեցել հասարակական կարգի խախտում: Այս գործն էլ էր փակվել, բայց վերջին դեպքից հետո դրա վարույթը վերաբացվել է»,- ներկայացրեց փաստաբան Առուստամյանը:

Պաշտպանը շեշտեց, որ իրենց կողմը դեմ է Քր.դատ.օր.-ի դրույթների խախտումներով ձեռք բերված ապացույցների կիրառմանը, եւ հակված չեն նրան, որ պատասխան տա հանցանքը չկատարած անձը, սակայն եթե նախաքննությունն իրականացնող մարմինը կալանքի տակ է պահում տվյալ անձին (Արայիկ Պետրոսյանին), ուրեմն ինքը կարող է ասել, որ կան որոշակի փաստեր, ապացույցներ, որոնց հիման վրա առաջադրվել է մեղադրանքն ու կիրառվել է կալանքը:

«Լրագրողները հանուն մարդու իրավունքների» կազմակերպության նախագահ Ժաննա Ալեքսանյանն էլ նշեց, որ մտահոգություն կա, որպեսզի անմեղ մարդիկ չդատապարտվեն: «Ես կողմ կլինեի, որ Վահե Ավետյանի, Բուդաղյանների եւ այս գործով մեծ շարժում սկսվեր»,- հայտնեց բանախոսը:      

Լուս.՝ Հակոբ Պողոսյանի