Նախկին դատավոր Պարգեւ Օհանյանը «Հետքի» հետ զրույցում ասաց, որ քրեական գործերով ավելորդ է համարում նախաքննության փուլը, սակայն, ներկայիս պայմաններում ավելորդ չի համարում միասնական քննչական մարմին ստեղծելը:

«Այս դրությամբ հնարավոր է արդարացված լինի, եթե, իհարկե, լուծվի նաեւ օպերատիվ ծառայությունների, այսինքն`հետաքննության մարմնի հետ սերտ համագործակցության հարցը: Բայց ամենակարեւորը, եթե էլ ձեւեր չթափելով՝ հենց իրենք, որպես «երդվյալներ» որոշելով անձի մեղավորության հարցը, դատարանին օրենքով մնա միայն պատիժ նշանակելու հոգսը…»,-ասում է Պ. Օհանյանը:

Ըստ նրա`քննչական մարմինը, այսինքն` նախաքննության փուլն, ընդհանրապես ավելորդ է: «Ավելին՝ չարիք, փաստացի արդարադատություն, ինքնադատաստան իրականացնող մարմին է»,- ասում է նախկին դատավորը:

Նրա կարծիքով` հետաքննությունից հետո (ըստ ՀՀ քրեական դատավարության օրենսգրքի` 10 օրվա ընթացքում) գործն անմիջապես պետք է գնա դատարան եւ «քննությունը»՝ այն դատավարական գործողությունները, որոնք քննիչն է կատարում իր աշխատասենյակում, «գաղտնի» եւ ոչ հրապարակային, անօրինական տարբեր մեթոդներով եւ իր լիազորությունների չարաշահումներով, պետք է կատարվի դատարանում՝ հրապարակային:

Պարգեւ Օհանյանի կարծիքով հրապարակային քննությունը Մարդու իրավունքների եւ հիմնարար ազատությունների մասին Եվրոպական կոնվենցիայի եւ ՀՀ Սահմանադրության պահանջն է: