ԱԺ ՀԱԿ խմբակցության պատգամավոր Նիկոլ Փաշինյանը ԱԺ նախագահ Հովիկ Աբրահամյանին մեղադրեց, որ նրա մասնակցությամբ ՀՀ Սահմանադրություն եւ օրենք է խախտվում, եւ այդ ուղղությամբ համապատասխան քայլեր չեն ձեռնարկվում:

Խոսքը վերաբերում էր ՀՀ գլխավոր դատախազի կողմից ԱԺ-ին տարեկան հաշվետվություն ներկայացնելուն։ Որպես հիմնավորում Նիկոլ Փաշինյանը նշեց «Դատախազության մասին» ՀՀ օրենքի 5-րդ հոդվածի 2-րդ մասին պահանջը, այն է` «գլխավոր դատախազը յուրաքանչյուր տարի Հայաստանի Հանրապետության Ազգային ժողով (այսուհետ` Ազգային ժողով) և Հանրապետության նախագահին է ներկայացնում հաղորդում դատախազության նախորդ տարվա գործունեության մասին: Ազգային ժողովին հաղորդումը ներկայացվում է Ազգային ժողովի կանոնակարգով սահմանված կարգով»:

«Ե՞րբ է Հայաստանի գլխավոր դատախազը վերջին անգամ հաղորդում ներկայացրել ԱԺ»,-հետաքրքրվեց պատգամավորը:

Հովիկ Աբրահամյանը նախ հակադարձեց Նիկոլ Փաշինյանին, նշելով, որ կարծիք է ստեղծվում, թե նա խոսում է միայն խոսելու համար, ապա տեղեկացրեց, որ իր` ԱԺ նախագահի պաշտոնավարման տարիներին ոչ մի անգամ գլխավոր դատախազը հաշվետվությամբ հանդես չի եկել:

Ավելին` Հովիկ Աբրահամյանը համամիտ չէր պատգամավորի այն կարծիքի հետ, որ Սահմանադրությունը խախտվել է: «Ես պետաիրավական հարցերով մշտական հանձնաժողովի նախագահի առջեւ այդ հարցը բարձրացրել եմ, նշել եմ, որ գլխավոր դատախազը պետք է հաշվետվություն ներկայացնի եւ ամեն ինչ անելու եմ, որ հանդես գա հաշվետվությամբ»,- ասաց Հովիկ Աբրահամյանը եւ հավելեց, որ ԱԺ կանոնակարգ օրենքը հստակ չի սահմանում գլխավոր դատախազի կողմից ԱԺ-ում հանդես գալու պահանջը: