ԱԺ-ում փնտրում են «դավաճաններին»
Ազգային ժողովում շարունակում են «գուշակել», թե ընդդիմադիր խմբակցությունների պատգամավորներից ովքեր են կողմ քվեարկել գլխավոր դատախազի թեկնածու Գեւորգ Կոստանյանի նշանակմանը:
Մինչեւ քվեարկությունը ՀՅԴ-ն ու ԲՀԿ-ն հայտարարել էին, թե խմբակցության պատգամավորներն ազատ են իրենց քվեարկությունը կատարելու հարցում, իսկ ՀԱԿ-ն ու «Ժառանգությունը» պետք է դեմ քվեարկեին, քանի որ խմբակցություններում այդպես էր որոշվել:
Սակայն, Գեւորգ Կոստանյանի թեկնածությանը դեմ է քվեարկել ընդամենը 3 պատգամավոր: Հստակ է միայն Նիկոլ Փաշինյանի «դեմ»-ը, իսկ մյուս երկուսը դեռ «անհայտ» են:
Ընդդիմադիր խմբակցությունների ղեկավարները խուսափում են պատասխանել այն հարցին, թե ինչո՞ւ պատգամավորները չհարգեցին խմբակցության դիրքորոշումը եւ կողմ քվեարկեցին իշխանության թեկնածուին:
ՀԱԿ խմբակցության քարտուղար Արամ Մանուկյանը «Հետքի» հետ զրույցում ասաց, որ զարմացած է քվեարկության արդյունքներից, քանի որ ՀԱԿ խմբակցությունից քվեարկությանը մասնակցել են Գագիկ Ջհանգիրյանը, Ստեփան Դեմիրճյանը, ում քվեաթերթիկը անվավեր է ճանաչվել, Լյուդմիլա Սարգսյանը, Հրանտ Բագրատյանը, Նիկոլ Փաշինյանը եւ ինքը:
Բոլորն էլ հայտարարել են, որ դեմ են քվեարկել դատախազի թեկնածուի նշանակմանը, սակայն արդյունքում 3 դեմ է ստացվել, այն դեպքում, երբ քվեարկությանը մասնակցել է նաեւ «Ժառանգություն» խմբակցության ղեկավար Ռուբեն Հակոբյանը, ով նույնպես պետք է դեմ քվեարկեր:
Կուլիսներում պատգամավորները փնտրում են «դավաճան» պատգամավորներին:
Հիշեցնենք, որ այսօր 103 կողմ 3 դեմ ձայներով ՀՀ գլխավոր դատախազ նշանակվեց Գեւորգ Կոստանյանը, ում նշանակմանը դեմ էին ընդդիմադիր պատգամավորները:
Մեկնաբանություններ (1)
Մեկնաբանել