Արսեն Վարդանյան

Բասենցի փոքրիկները մի քանի ամսից կճաշակեն սեփական ջերմոցում աճեցված էկոլոգիապես մաքուր պտուղ բանջարեղենը: Նման արտոնություն առայժ կունենան միայն Բասեն գյուղի մանկապարտեզ հաճախող 50 փոքրիկները: Նորաստեղծ ջերմոցը փոքր է եւ նախատեսված է բավարարելու մանկապարտեզի սաների կարիքները, սակայն համայնքապետն այն ընդլայնելու հեռանկարը չի բացառում: «Եթե արեւային ջրատաքացուցիչների ծրագիրը չանեինք, դժվար թե այս փոքրիկ ջերմոցն էլ ունենայինք: Հետագայում ձգտելու ենք տարածքն ընդլայնել»,- ասում է Բասենի համայնքապետ Համլետ Պետրոսյանը:

Բասենն, ինչպես նաեւ հարակից չորս գյուղերը, գազիֆիկացված չեն, մարդիկ տները տաքացնում են աթարով ու փայտով: «Նման պայմաններում մտածել ջերմոցային տնտեսության մասին, առնվազն ֆանտաստիկայի ժանրից էր լինելու»,- ասում է համայնքապետը:

Մարզպետարանի բնապահպանության վարչությունից Բասեն համայնքի ղեկավար Համլետ Պետրոսյանը տեղեկացել էր, որ 2012թ.-ին Ամասիայի տարածաշրջանի Շաղիկ համայնքում իրականացվել է արեւային ջրատաքացուցիչների ներդրման ծրագիր, որը բավականին դրական արդյունքներ է գրանցել: Ծանոթացել էր պայմաններին, հավանել եւ որոշել այն իրականացնել նաեւ Բասենում: «Շենք-շինությունների էներգաարդյունավետության միջոցառումների եւ արեւային ջրատաքացուցիչ համակարգի կառուցում ու շահագործում համայնքներում» ծրագրի մեկնարկը տրվեց 2013 թ·-ի մարտին: Համայնքապետարանի հետնամասում գտնվող բակային հատվածում տեղադրվեցին արեւային ջրատաքացուցիչներ, շենքի մի հատվածում էլ բաղնիք կառուցվեց:

«Երրորդ բնություն» հ/կ-ի տնօրեն Ռաֆայել Մխիթարյանի հետ միասին փորձարկել ենք ջերմային պոմպի նոր տեխնոլոգիա, որը 20-25 աստիճան ցրտի դեպքում, բայց արեւ լինելու պայմաններում պաղ օդը վերածում է տաք օդի եւ նույնիսկ դրսում ցուրտ լինելու դեպքում հնարավոր է ունենալ տաք ջուր»,- պատմում է համայնքապետը: Հենց այդ ժամանակ էլ Շիրակի մարզի «Օրհուս» բնապահպանական կենտրոնի ղեկավար Գեւորգ Պետրոսյանի հետ որոշել են ջերմոց կառուցել:

Համայնքային ջերմային պոմպերը հատկացրել է ԵԱՀԿ գրասենյակը: Շնորհիվ այս ծրագրի՝ գյուղում նաեւ անվճար բաղնիք է գործում: Հասարակական բաղնիքը, որից օգտվում են գյուղի բնակիչները, աշխատում է արեւային էլեկտրատաքացուցիչներով:

Համլետ Պետրոսյանը վստահեցնում է, որ  եթե յուրաքանչյուր ընտանիք տան տանիքին ունենա նման համակարգ, ապա շոշափելի ձեւով՝ մինչեւ 30-40%, կարող է նվազեցնել ծախսերը, որոնք սովորաբար կատարում է բնակարանի տաքացման եւ մշտապես տաք ջուր ունենալու համար: Մեկ համակարգն արժե 120.000 դրամ: Գյուղում տեղադրված արեւային համակարգն առայժմ կարողանում է բավարարել միայն համայնքապետարանի, մանկապարտեզի եւ հասարակական բաղնիքի պահանջները:

«Մարտ ամսվա վերջին տեղի կունենա ծրագրի շնորհանդեսը: Մինչ այդ, պիտի իհարկե լոլիկի, վարունգի սածիլներ տնկենք, կանաչու տեսականի կունենանք, որովհետեւ ջերմոցի բացումը եւս նախատեսվում է այդ օրը,- ասում է համայնքապետը: -Ջերմոցն ունենալու է հատուկ որդանոց, եւ տեղում աճեցված որդերը աղբը վերածելու են օրգանական պարարտանյութի: Ջերմոցի մշակման, պահպանման աշխատանքները համատեղության կարգով իրականացնելու են մանկապարտեզի աշխատակիցները»: