ԱԺ պատգամավոր Արմեն Աշոտյանի վերջին առաջարկը, թե պետք է որոշակի վերահսկում սերիալների նկատմամբ, առիթ դարձավ դերասանուհի Հասմիկ Տեր-Կարապետյանի եւ գրող-հրապարակախոս Մարինե Պետրոսյանի բանավեճի համար:

«Եթե Արմեն Աշոտյանը հարձակում չգործեր սերիալների վրա, ես ավելի հավասարակշիռ կլինեի, բայց քանի որ նա հարձակվում է, ես կրծքով կպաշտպանեմ»,- ասում է Մ. Պետրոսյանը: Նա գտնում է, որ սերիալների մեջ ճշմարտության բաժին կա, եւ եթե այդ ոլորտն էլ վերահսկվի, «հեռուստատեսությունում ճշմարտության հատիկ չի մնա, հեռուստատեսությունը կդառնա կեղծ, զզվելի, մարմելադե մի բան»: Իսկ «ճշմարտության հատիկը», ըստ հրապարակախոսի, կերպարների մարմնավորած ճշմարիտ այլանդակության մեջ է. «Թող մարդիկ նայեն, իրենց պատկերը տեսնեն»,- խորհուրդ է տալիս բանախոսը: Դերասանուհի Հասմիկ Տեր-Կարապետյանն էլ գտնում է, որ այդ կերպարները պետք է «չափավոր այլանդակ» լինեն, այսինքն` չհատվի այն սահմանը, որը պարտադրում են մարդկային չափանիշները: Մ. Պետրոսյանն էլ ընդդիմանում է. «Այլանդակ բանը պիտի լինի այլանդակ»: Բանախոսները գտնում են, որ սերիալները դրական հերոսի պակաս ունեն, ինչը Մ. Պետրոսյանը բացատրում է նրանով, որ հնարավոր չէ ստեղծել ազնիվ դատավորի կամ ոստիկանի կերպար, քանի որ այդպիսիք մեր իրականությունում բացակայում են, «իսկ լավ գողի կերպար ստեղծել հնարավոր է, քանի որ նախատիպեր կան»: Հ. Տեր-Կարապետյանն էլ շեշտում է. «Ինչի վրա ուշադրությունդ շեշտում ես, դա էլ զարգացնում ես»: Թե' Հ. Տեր-Կարապետյանը, թե' Մ. Պետրոսյանը համամիտ են, որ սերիալներին հակակշիռ պետք է լինեն մաքուր հայերենով հաղորդումները, ինչը, ըստ նրանց, բացակայում է հայկական հեռուստաեթերում: