Այսօր Սեւծովյան տնտեսական համագործակցության կազմակերպության (ՍԾՏՀ) անդամ երկրների արտաքին գործերի նախարարների խորհրդի հանդիպման ավարտին տեղի ունեցավ ՀՀ ԱԳ նախարարի, Ադրբեջանի եւ Ալբանիայի փոխարտգործնախարարների եւ ՍԾՏՀ գլխավոր քարտուղարի համատեղ մամլո ասուլիսը:

Ասուլիսի ընթացքում պաշտոնյաները բարձր գնահատեցին Հայաստանի նախագահությունը ՍԾՏՀ-ում` հուսալով, որ առաջիկա վեց ամիսների Ադրբեջանի նախագահությունը եւս կնպաստի կազմակերպության անդամ-պետությունների միջեւ խաղաղության եւ համագործակցության զարգացմանը:

Լրագրողներիր այն հարցին, թե արդյոք Թուրքիան մասնակցում է Ղարաբաղյան կարգավորման գործընթացին, ՀՀ ԱԳ նախարար Էդվարդ Նալբանդյանը պատասխանեց, որ գործընթացն ընթանում է Մինսկի խմբի շրջանակներում, եւ այլ ձեւաչափ գոյություն չունի:

«Թուրքիան միջնորդություն չի կատարում Ղարաբաղյան կարգավորման գործընթացում»,- նշեց ԱԳ նախարարը: Է. Նալբանդյանի խոսքերով ներկայումս որեւէ մտադրություն չկա ստորագրել  որեւէ փաստաթուղթ հայ-թուրքական հարաբերությունների կարգավորման վերաբերյալ. «Բանակցությունները շարունակվում են, մենք առաջընթաց ենք արձանագրել, եւ գտնում ենք որ մենք կարող ենք իսկապես շատ մոտ լինել եւ լուծել այդ հարցերը մոտ ապագայում»:

Ադրբեջանի փոխարտգործնախարար Մահմուդ Մամեդգուլիեւի խոսքերով Ադրբեջանը ողջունում է ցանկացած պետության ջանքերը, որոնք ուղղված են Ղարաբաղյան  հակամարտության լուծմանը, եւ եթե Թուրքիան ունի ռեալ եւ կոնկրետ առաջարկություններ, որոնք ընդունելի կլինեն Ադրբեջանի համար, իրենք պատրաստ են քննարկել դրանք: Մամեդգուլիեւի խոսքերով հայ-թուրքական հարաբերությունների կարգավորումը երկու պետությունների գործն է, եւ Ադրբեջանն ընդհանրապես չի խառնվում այլ պետությունների ներքին գործերին, սակայն հաշվի առնելով հայ-ադրբեջանական գործոնը, իրենք«հետաքրքրությամբ» են հետեւում այս գործընթացին:

«Մեր դիրքորոշումը կայանում է նրանում, որ կապերի վերականգնումը Հայաստանի եւ Թուրքիայի միջեւ կարող է կապված լինել միայն հայ-ադրբեջանական հակամարտության լուծման հետ, քանի որ այդ կապերը Հայաստանի եւ Թուրքիայի միջեւ ժամանակին ընդհատվել են, եւ դրա հիմնական պատճառը ադրբեջանական հողերի օկուպացիան էր»,-ասաց Մ.Մամեդգուլիեւը: Իսկ մամուլում շրջանառվող այն լուրերի մասին, որ Մոսկվայում նախատեսվում է թուրք-ադրբեջանա-ռուսական եռակողմ հանդիպում, Է. Նալբանդյանը եւ Մ. Մամեդգուլիեւը որեւէ տեղեկություն չունեին: