Այսօր լրագրողների հետ հանդիպման ժամանակ Կենտրոնական ընտրական հանձնաժողովի նախագահ Գարեգին Ազարյանը տեղեկացրեց, որ ընտրությունների անցկացման համար անհրաժեշտ նախապատրաստական աշխատանքներն իրականացվել են Ընտրական օրենսգրքի շրջանակներում: Առաջադրված 6 կուսակցությունները`ՀՀԿ, ԲՀԿ, ՀՅԴ, ՕԵԿ, ՀԱՍԿ, ԺԿ և մեկ դաշինքը`ՀԱԿ-ը, գրանցվել են, խնդիրներ չեն եղել նաև առաջադրված 629 թեկնածուների գրանցման հետ: Գարեգին Ազարյանը նաև նշեց, որ այս ընտրություններում կիրառվելու են մեկանգամյա օգտագործման քվերակության թղթե խցիկներ ու հետզհետե հրաժարվելու են փայտե քվեախցիկներից: Ըստ նրա` փայտե ընտրախցիկներով պետք է իրականցվեին 3 ընտրություններ, բայց արդեն իրականացվել է 5 ընտրություն. «Դրանք կամաց-կամաց շարքից դուրս են գալիս, և ունենում էինք խնդիրներ դրանց տեղափոխման հետ կապված, քանի որ ծավալով և կշռով ավելի մեծ են: Բացի այդ, եթե փայտինը պատրաստում էինք 8000 դրամով, ապա այս քվեախցիկների արժեքը մոտ 1000 դրամ է»: Գարեգին Ազարյանի խոսքերով, ի տարբերություն նախկին ընտրությունների, երբ ընտրատարածքներից արձանագրություններն ուղղակի տեղափոխվում էին Կենտոնական ընտրական հանձնաժողով և մուտք արվում, այս ընտրություններում ընտրատեղամասային հանձնաժողովներից արձանագրությունները տեղափոխվելու են ընտրատարածք, այնտեղ տվյալները մուտք են արվելու և ցանցի միջոցով անմիջապես երևալու են ԿԸՀ-ում: «Այս համակարգը ապահովում է անհրաժեշտ անվտանգություն, թափանցիկություն և քվերակության արդյունքների արագ տեղափոխում»,- ասաց ԿԸՀ  նախագահ Գարեգին Ազարյանը: Ի դեպ, տեսողության հետ խնդիրներ ունեցողների համար քվեաթերթիկի նոր նմուշներ են թողարկվելու, որոնք էլ ավելի կհեշտացնեն նրանց ընտրության գործընթացը: Ոստիկանության անձնագրերի և վիզաների վարչության պետ, ոստիկանության փոխգնդապետ Նորայր Մուրադխանյանն էլ տեղեկացրեց, որ Հայաստանում ապրիլի 21-ի դրությամբ ընտրողների ընդհանուր թիվը կազմում է 2 մլն 291 հազար 963 ընտրող, որից, ըստ նախնական ցուցակների, Երևանի քաղաքապետի և ավագանու ընտրություններին մասնակցելու է 771 հազար  353 ընտրող: Հավելենք, որ ընտրատարածքների թիվը 13-ն է, ընտրատեղամասերի թիվը` 439: