Այսօր «Հայելի» ակումբում քաղաքագետ Ալեքսանդր Մարկարովը կարծիք հայտնեց, որ հայ-թուրքական բանակցությունները հասել են այնպիսի մի կետի, երբ բանակցություններից դուրս գալը և այդ կերպ հայտնելով սեփական անպատրաստվածությունը սահմանների բացման կամ հարաբերությունների բարելավման հարցում` վնասարար է լինելու հենց դուրս եկող կողմի համար: Սա արձագանք էր Հայաստանում վերջերս հնչող այն հայտարարությունների, թե հայ-թուրքական հարաբերությունների ներկայիս գործընթացը Հայաստանի շահերից չի բխում, և նախաձեռնողականությունը Թուրքիան լիովին իր ձեռքն է վերցրել: «Եվրոպական ինտեգրացիա» հ/կ նախագահ Կարեն Բեքարյանը կարծիք հայտնեց, որ մենք խնդիր ունենք այն առումով, որ նախաձեռնողականությունը պատշաճ չի մատուցվել հասարակությանը և միջազգային հանրությանը. «Իրականում տարվում է քաղաքականություն` նախաձեռնողականությանը հասարակական հնչեղություն տալու համար, և Թուրքիայում այդ գործընթացը բավականին ակտիվ է տարվում, Հայաստանում այդ գործընթացը բավականին տուժեց»: Այն կարծիքներին ի պատասխան, թե Թուրքիային հայ-թուրքական բանակցություննների ոչ թե արդյունքն է հետաքրքիր, այլ զուտ գործընթացը, որը նա կկարողանա օգտագործել Արևմուտքի հետ իր շփումներում, Կ. Բեքարյանն ասաց. «Երկու երկրների փոխադարձ վստահության աստիճանը մոտ է զրոյի, և այս պարագայում ունենալ ուտոպիական ցանկություն կամ մոտեցում, որ մենք այնքան ազնիվ և վստահելի ենք, իսկ Թուրքիան այնքան անազնիվ ու անվստահելի, այդպես չէ, երկու կողմերն էլ ունեն փոխադարձ անվստահություն, և երկու կողմերն էլ փորձելու են այս գործընթացից քաղել մաքսիմալ դիվիդենտներ, բացի այդ` ցանկացած գոյություն չունեցող ինչ-որ հարաբերություններ գնում են դեպի կարգավորում, սկզբում լինում է ինչ-որ իմիտացիոն գործընթաց, որը հետո վեր է ածվում իներցիայի»: Կարեն Բեքարյանն առհասարակ անբնական է համարում երկու հարևանների միջեւ հարաբերություններ չլինելը: Ըստ նրա` մենք այսօր ունենք ֆոնային գործընթացներ` կա ստորագրված փաստաթուղթ, բայց հարաբերությունների մինիմալ որակ դեռ չունենք: Նա անհարկի է համարում Հայաստանում շրջանառվող այն խոսակցությունները, թե արդյոք անհրաժեշտ է բացել սահմանը, քանի որ մենք միշտ էլ միջազգային հանրությանը հայտնել ենք, որ Հայաստանի նկատմամբ Թուրքիան վարում է հարկադրանքի քաղաքականություն`շրջափակման միջոցով հասնելու սեփական նպատակներին: Ըստ կազմակերպության նախագահի`«Ճանապարհային քարտեզը» երբ հրապարակվի, մենք կարձանագրենք, որ Թուրքիայի նախպայմանային քաղաքականությունը չեզոքացվում է, քանի որ, ըստ նրա, հայ-թուրքական հարաբերություններին վերաբերող հարցերից բացի` այլ հարցեր և մասնավորապես Լեռնային Ղարաբաղի հարցը ներառված չէ այնտեղ: