Ուսանողները փորձում են հաղթահարել ճգնաժամը
Այսօր «Էրեբունի պլազա» բիզնես կենտրոնում մրցանակներ հանձնվեցին այն 11 ուսանողներին, ովքեր ՀՀ կառավարության եւ ԿԲ-ի հետ համագործակցությամբ «Մեդիամաքս» գործակալության առաջարկած մրցույթին արձագանքելով` «Ես հաղթահարում եմ ճգնաժամը» խորագրով ռեֆերատներ էին ներկայացրել ու արժանացել ժյուրիի հավանությանը:
Մրցույթին ներկայացվել է 36 աշխատանք: Մրցանակների հանձնման արարողությանը ներկա էին Կառավարության ղեկավար Տիգրան Սարսգյանը և Կենտրոնական բանկի նախագահ Արթուր Ջավադյանը:
Վարչապետ Տիգրան Սարգսյանն ասաց, որ իրենց նպատակը երիտասարդության շրջանում հետազոտական աշխատանքները խրախուսելն է. «Դա մեզ համար էական և հիմնարար սկզբունք է այն առումով, որ 21-րդ դարը լինելու է մտագործունեության դաշտ, եւ այն ազգերն են ունենալու հարաբերական մրցակցային առավելություն, որոնք ներսում բացահայտել են ինտելեկտուալ ներուժ, վերլուծական կարողություններ և ձգտում դեպի գիտելիք»:
Տիգրան Սարգսյանը հույս հայտնեց, որ այս «ձեռնարկը» վարակիչ կլինի նաև մասնավոր ընկերությունների համար` կազմակերպելու նման միջոցառումներ եւ ստանալու պետության աջակցությունը:
ՀՊՏՀ-ի ֆինանսական ֆակուլտետի մագիստրատուրայի 1-ին կուրսի ուսանող Վաչիկ Գևորգյանը, ով առաջին տեղը զբաղեցրեց ու ստացավ դրամական պարգև` 150 հազ. դրամ, առաջարկում է հակաճգնաժամային քաղաքականության շրջանակներում ԿԲ-ի կողմից 5-6 տոսոկով իջեցնել վերաֆինանսավորման տոկոսադրույքը, ավելի ակտիվ իրականացնել ենթակառուցվածքային միջոցառումներ, որոնք կխթանեն մասնավոր սպառումը, ինչը շղթայական ձևով աճ կարձանագրի նաև տնտեսության մյուս ճյուղերում: Նրա կարծիքով` առաջին անհրաժեշտության ապրանքների համար պետք է սահմանել ավելի ցածր դրույքաչափեր` ի տարբերություն մյուս ապրանքատեսակների, որը հնարավորություն կտա կատարելագործել գնագոյացման մեխանիզմները և թուլացնել սոցիալական լարվածությունը, մասնավոր սեկտորին օգնություն ցուցաբերելիս առաջնորդվել ոչ թե աշխատողների քանակով, այլ դրա գործունեության արդյունավետությամբ և արտահանման պոտենցիալով:
Արցախի պետական համալսարանի Տնտեսա-իրավաբանական ֆակուլտետի 3-րդ կուրսի ուսանող Սամվել Լազարյանն էլ, ով ստացավ 100 հազ. դրամ մրցանակ, ասաց, որ կառավարությունը ուժեղ հակաճգնաժամային քաղաքականություն պետք է վարի` ուղղված փոքր բիզնեսի զարգացմանը, գործազրկության դեմ պայքարին և սոցիալապես անապահով խավերի պաշտպանությանը:
3-րդ տեղը զբաղեցրած ՀՊՏՀ-ի Կառավարման ֆակուլտետի 3-րդ կուրսի ուսանող Միքայել Չարչյանն էլ ստացավ 78 հազ. դրամ: Մյուս ուսանողները տարբեր պարգևներ ստացան մասնավոր սեկտորի ընկերություների կողմից:
«Ինձ բոլոր առաջարկությունները թվում են շատ հետաքրքրական, բոլորն էլ իրավունք ունեն իրենց հիպոթեզներն առաջ քաշել, անկախ նրանից` մենք ընդունում ենք, թե չենք ընդունում իրենց առաջարկները, բայց բոլորն էլ լուրջ աշխատություններ էին»,-ասաց վարչապետը:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել